The Phnom Penh Post Search

Search form




Logo of Phnom Penh Post newspaper Phnom Penh Post - អត្រា​អ្នក​ស្លាប់​ដោយ​ជំងឺ​គ្រុន​ចាញ់​ថយ​ចុះ ១៨ ភាគ​រយ

អត្រា​អ្នក​ស្លាប់​ដោយ​ជំងឺ​គ្រុន​ចាញ់​ថយ​ចុះ ១៨ ភាគ​រយ

អត្រា​អ្នក​ស្លាប់​ដោយ​ជំងឺ​គ្រុន​ចាញ់​ថយ​ចុះ ១៨ ភាគ​រយ

ភ្នំពេញៈ អត្រា​អ្នក​ស្លាប់ និង​ករណី​អ្នក​ឆ្លង​ជំងឺ​គ្រុន​ចាញ់​ក្នុង​រយៈ​ពេល ៦​ខែ ដើម ឆ្នាំ​២០១៤ នេះ មាន​ការ​ធ្លាក់​ចុះ បើ​ប្រៀប​ធៀប​ទៅ​នឹង​ពេល​វេលា​ដូច​គ្នា​នឹង ឆ្នាំ​២០១៣ ដែល​មាន​ការ​ថយ​ចុះ ១៨ ភាគ​រយ។

យោង​តាម​របាយ​ការណ៍​របស់​មជ្ឈមណ្ឌល​កម្ចាត់​ជំងឺ​គ្រុន​ចាញ់​បាណក​សាស្រ្ត និង​ប៉ារ៉ាស៊ីត​សាស្រ្ត​នៃ​ក្រសួង​សុខាភិបាល ដែល​បាន​ចេញ​ផ្សាយ​កាល​ពី​ថ្ងៃ​សៅរ៍​ដែល​កាសែត ភ្នំពេញ ប៉ុស្តិ៍ ទទួល​បាន​កាល​ពី​ថ្ងៃ​អាទិត្យ​ម្សិល​មិញ​បាន​ឲ្យ​ដឹង​ថា ក្នុង ៦ ខែ​ដើម ឆ្នាំ​២០១៤ នេះ ចំនួន​ករណី​គ្រុន​ចាញ់​ដែល​ព្យាបាល​នៅ​មន្ទីរពេទ្យ​រដ្ឋ ឬ​មណ្ឌល​សុខភាព​រដ្ឋ ឬ​ភ្នាក់ងារ​ស្ម័គ្រ​ចិត្ត​ភូមិ​មាន​ចំនួន ១៥ ៩៨២ ករណី គឺ​ថយ​ចុះ ១៨ ភាគរយ​បើ​ប្រៀប​ធៀប​រយៈ​ពេល​ដូច​គ្នា ឆ្នាំ​២០១៣ ដែល​មាន​ចំនួន ១៩ ៥៦២ ករណី។

លោក​វេជ្ជបណ្ឌិត ច ម៉េង ចួ ជា​ប្រធាន​មជ្ឈមណ្ឌល​កម្ចាត់​ជំងឺ​គ្រុន​ចាញ់​បាណក​សាស្រ្ត និង​ប៉ារ៉ាស៊ីត​សាស្រ្ត​នៃ​ក្រសួង​សុខាភិបាល បាន​ឲ្យ​ដឹង​តាម​រយៈ​របាយ​ការណ៍​នេះ​ថា ចំនួន​អ្នក​ស្លាប់​ដោយ​ជំងឺ​គ្រុន​ចាញ់​ពី ខែ​មករា ដល់ ខែ​មិថុនា ឆ្នាំ​នេះ​មាន​ចំនួន ៥ នាក់​ដែល​រយៈ​ពេល​ដូច​គ្នា​ក្នុង ឆ្នាំ​២០១៣ មាន​អ្នក​ស្លាប់​ចំនួន ៦ នាក់។

យោង​ទៅ​តាម​របាយ​ការណ៍​នោះ​បាន​ឲ្យ​ដឹង​ទៀត​ថា អត្រា​ជំងឺ​គ្រុន​ចាញ់​គិត​ជា​មធ្យម​ទូទាំង​ប្រទេស​ក្នុង​ប្រជាជន ១០០០ នាក់​មាន ១,១ ករណី​ហើយ​ក្នុង​នោះ​ខេត្ត​ដែល​មាន​អត្រា​ខ្ពស់​ជាង​គេ​គឺ ខេត្ត​រតនគិរី និង ខេត្ត​ស្ទឹងត្រែង។

លោក​វេជ្ជបណ្ឌិត ច ម៉េង ចួ បាន​គូស​បញ្ជាក់​បន្ថែម​ឲ្យ​ដឹង​ទៀត​ថា៖ «នេះ​មាន​ន័យ​ថា គ្រុន​ចាញ់​លែង​ជា​មូល​ហេតុ​ចម្បង​នៃ​ការ​ស្លាប់​ទូទៅ​របស់​ប្រជាជន​កម្ពុជា​ទៀត​ហើយ។ ប៉ុន្តែ ការ​ថយ​ចុះ​នេះ​មិន​មែន​ជា​សារ​មួយ​ទាក់ទាញ​ឲ្យ​យើង​បន្ធូរ​បន្ថយ​អន្តរាគមន៍​ដែល​យើង​កំពុង​ធ្វើ​ទេ បើ​ពុំ​នោះ​ទេ អត្រា​ឈឺ និង​ស្លាប់​នឹង​អាច​កើន​ឡើង​វិញ​ភ្លាម»៕

អត្ថបទគួរចាប់អារម្មណ៍