.jpg)
អធិការរងស្រុកភ្នំស្រួច ខេត្តកំពង់ស្ពឺ ត្រូវបានផ្អាកការងារដោយរងពីបទលួច។ សហការី
កំពង់ស្ពឺៈ រដ្ឋមន្ត្រីក្រសួងមហាផ្ទៃ បានសម្រេចផ្អាកការងារ ជាបណ្តោះអាសន្ន លោកអនុសេនីយ៍ឯក អុឹង ឡាយឆាយ អធិការរងស្រុកភ្នំស្រួច ខេត្តកំពង់ស្ពឺ ពីបទលួចមានស្ថានទម្ងន់ទោសពាក់ព័ន្ធទៅនឹងការធ្វើឲ្យបាត់បង់ថវិកានិងមាសដែលត្រូវបានរឹបអូស នៅក្នុងការបង្ក្រាបបទល្មើសកន្លងមក។
បើយោងតាមសេចក្តីសម្រេច របស់ លោក ស ខេង រដ្ឋមន្ត្រីក្រសួងមហាផ្ទៃ ចុះថ្ងៃទី ១៩ ខែ កក្កដា ២០១៩ បានសម្រេចផ្អាកការងារបណ្ដោះអាសន្ន ចំពោះលោកអនុសេនីយ៍ឯក អឹុង ឡាយឆាយ អធិការរង នៃអធិការដ្ឋាននគរបាលស្រុកភ្នំស្រួច ដោយសារតែមានប្រជាពលរដ្ឋចោទប្រកាន់ពីបទ លួចមានស្ថានទម្ងន់ទោស រំលោភលើលំនៅឋានមានស្ថានទម្ងន់ទោស ចាប់ឃុំឃាំងនិងបង្ខាំងដោយខុសច្បាប់ មានស្ថានទម្ងន់ទោស និងគំរាមកំហែង។
កាលពីថ្ងៃទី ១៦ ខែ មីនា ឆ្នាំ ២០១៩ វេលាម៉ោង ១ រំលងអ្រធាត្រ កម្លាំងគណៈបញ្ជាការឯកភាពខេត្ត ស្រុក ដែលក្នុងនោះ មានលោកអនុសេនីយ៍ឯក អឹុង ឡាយឆាយ ផងដែរបានចូលរួមបង្ក្រាបក្លិបកម្សាន្ត «គិរីរម្យ» ស្ថិតនៅភូមិ ៤ ក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ហើយនៅថ្ងៃទី ១ មេសា ឆ្នាំ ២០១៩ ឈ្មោះទិត្យ ស៊ីណាត ម្ចាស់ក្លិបកម្សាន្តគិរីរម្យ បានដាក់ពាក្យបណ្តឹងទៅកាន់ក្រសួងមហាផ្ទៃ ប្តឹងលោក អឹុង ឡាយឆាយថា បានរំលោភលើលំនៅឋានមានស្ថានទម្ងន់ទោស ចាប់ឃុំឃាំងនិងបង្ខាំងដោយខុសច្បាប់ មានស្ថានទម្ងន់ទោស និងគំរាមកំហែងទៅលើ ប្តីរបស់អ្នកស្រីកាលពីខែមីនា ឆ្នាំ ២០១៩។
សេចក្តីសម្រេចនោះ បានបញ្ជាក់ដូច្នេះថា៖ «ត្រូវបានផ្អាកការងារ បណ្តោះអាសន្ត ចំពោះអនុសេនីយ៍ឯក អឹុង ឡាយឆាយ មូលហេតុ៖សាមីខ្លួន ត្រូវបានប្រជាពលរដ្ឋចោទប្រកាន់ពីបទ លួចមានស្ថានទម្ងន់ទោសរំលោភលើលំនៅឋានមានស្ថានទម្ងន់ទោស ចាប់ឃុំឃាំង និងបង្ខាំងដោយខុសច្បាប់ មានស្ថានទម្ងន់ទោស និងបទគំរាមកំហែង»។
សេចក្តីសម្រេចបានបញ្ជាឲ្យលោកអនុសេនីយ៍ឯក អឹុង ឡាយឆាយ ត្រូវមកបង្ហាញខ្លួនរៀងរាល់ម៉ោងការងារនៅការិយាល័យ បុគ្គលិក នៃស្នងការដ្ឋាន នគរបាលខេត្តកំពង់ស្ពឺ។
លោក សាយ ប៊ុនថន អធិការស្រុកភ្នំស្រួចបានថ្លែងថា លោក អឹុង ឡាយឆាយ បាននឹងកំពុងស្ថិត នៅក្រោមការត្រួតពិនិត្យនិងស៊ើបអង្កេត របស់ស្នងការនគរបាលខេត្តកំពង់ស្ពឺហើយការផ្អាកនេះ គឺមានការពាក់ព័ន្ធទៅនឹងពាក្យបណ្តឹងរបស់ឈ្មោះ ទិត្យ ស៊ីណាត ដែលត្រូវជាម្ចាស់ក្លិបកម្សាន្ត «គិរីរម្យ»។ លោក ប៊ុនថន មានការសោកស្តាយ នៅពេលមន្ត្រីរបស់លោកត្រូវបានផ្អាកការងារជាបណ្តោះអាសន្ន។
លោកបញ្ជាក់ថា៖ «រឿងនេះ វាពាក់ព័ន្ធទៅនឹងការដែលយើងចុះទៅបង្ក្រាបការជួញដូរគ្រឿងញៀនហើយការផ្អាកនេះពាក់ព័ន្ធនឹងពាក្យបណ្តឹងរបស់ប្រជាពលរដ្ឋឥឡូវគេកំពុងស្រាវជ្រាវ»។
ក៏ប៉ុន្តែលោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានបដិសេធថា ការផ្អាកការងារបណ្តោះអាសន្នមន្ត្រីរូបនេះ មិនបានពាក់ព័ន្ធទៅនឹងការចុះបង្ក្រាបក្លិបកម្សាន្ត «គិរីរម្យ» នោះទេហើយចាត់ទុកការលើកឡើងនេះមិនសមហេតុផល។
លោកបញ្ជាក់ថា៖ «វាមានបញ្ហាទាក់ទងនឹងការប្តឹងរបស់ប្រជាពលរដ្ឋហើយគេផ្អាកការងារបណ្តោះអាសន្ន គឺដើម្បីធ្វើការស៊ើបអង្កេត។ នៅពេលដែលស៊ើបអង្កេតឃើញថាពាក់ព័ន្ធ យើងនឹងធ្វើការពិន័យទៅតាមបទបញ្ជារបស់កងកម្លាំងវាមិនមែនមកពីការបង្ក្រាបក្លិបហ្នឹងទេ»។
ទន្ទឹមនឹងនេះដែរ លោក វ៉ី សំណាង អភិបាលខេត្តកំពង់ស្ពឺ ក៏បានបដិសេធផងដែរថា ការផ្អាកការងារ លោក អឹុង ឡាយឆាយ នេះ គឺមិនបានជាប់ពាក់ព័ន្ធនឹងការបង្ក្រាបទៅលើក្លិបកម្សាន្ត «គិរីរម្យ» នោះទេ តែវាពាក់ព័ន្ធទៅនឹងការដែលមន្ត្រីរូបនេះ បានធ្វើឲ្យបាត់បង់នូវថវិកា និងមាសដែលមន្ត្រីរូបនេះ បានរឹបអូសពីការបង្ក្រាបបទល្មើសកាលពីកន្លងទៅ។
លោកបញ្ជាក់ប្រាប់ភ្នំពេញប៉ុស្តិ៍ពីម្សិលមិញថា៖ «គេសុំដកគាត់យូរហើយ តែដោយសារនីតិវិធីវាយឺតយ៉ាវ។ វាចំពេលដែលយើងហៅគាត់ទៅបង្ក្រាបករណីផ្សេងទៀត គេភ្ជាប់វាទៅករណីហ្នឹង តែតាមពិតគឺគាត់ជាប់ពាក់ព័ន្ធទៅនឹងករណីមុននោះទេ»៕
