.jpg)
លោកអធិការស្រុកកោះធំ ដែលរងការចោទប្រកាន់។ រូបថត ហ្វេសប៊ុក
កណ្ដាលៈ មន្ត្រីនគរបាល និងពលរដ្ឋដែលរស់នៅស្រុកកោះធំខេត្តកណ្តាលសុំមិនបញ្ចេញឈ្មោះស្នើរដ្ឋមន្ត្រីក្រសួងមហាផ្ទៃលោក ស ខេង ជួយអន្តរាគមន៍ និងពិនិត្យមើលការងាររបស់លោក ស៊ីម ឃាង អធិការនគរបាលស្រុកកោះធំដោយមន្ត្រីក្រោមឱវាទចោទលោកអធិការថា ប្រកាន់បក្ខពួកធ្វើឱ្យបែកបាក់សាមគ្គីភាពផ្ទៃក្នុង និងប្រព្រឹត្តអំពើពុករលួយជាដើម។
ក្នុងពាក្យបណ្តឹងរបស់មន្ត្រីនគរបាល និងពលរដ្ឋនៅស្រុកកោះធំដែល ភ្នំពេញ ប៉ុស្តិ៍ ទទួលបានពីម្សិលមិញបានស្នើរដ្ឋមន្ត្រីក្រសួងមហាផ្ទៃ ស ខេង លោក នេត សាវឿន អគ្គស្នងការនគរបាលជាតិ និងលោក ឈឿន សុចិត្រ ស្នងការនគរបាលខេត្តកណ្តាលឱ្យអន្តរាគមន៍លើករណីនេះ។
ក្នុងពាក្យបណ្តឹងបានសរសេរថា៖ «ចាប់តាំងពីលោកអធិការ ស៊ីម ឃាង បានចូលមកកាន់មុខតំណែងជាអធិការនគរបាលស្រុកកោះធំក្នុងឆ្នាំ ២០១៧ មកគឺលោកបានធ្វើឱ្យមន្ត្រីនគរបាលជាតិនៅក្នុងអធិការដ្ឋាននគរបាលស្រុកកោះធំទាំងមូលមានការបែកបាក់សាមគី្គភាពផ្ទៃក្នុងដោយសារលោក ស៊ីម ឃាង ប្រកាន់បក្ខពួកនិយម ហើយបានប្រព្រឹត្តអំពើពុករលួយ...»។
ជាមួយនេះដែរ ក្នុងពាក្យបណ្តឹងបានចោទលោកអធិការថាពុំបានយកចិត្តទុកដាក់បំពេញតួនាទីការងារឡើយ ដែលនាំឱ្យមានអំពើចោរកម្ម លួចឆក់អសន្តិសុខ អ្នកលក់ និងចែកចាយថ្នាំញៀនកើតមាននៅពេញស្រុក។
ក៏ប៉ុន្តែ អ្នកនាំពាក្យក្រសួងមហាផ្ទៃលោក ខៀវ សុភ័គ ប្រាប់ ភ្នំពេញ ប៉ុស្តិ៍ថា លោកពុំទាន់បានឃើញពាក្យបណ្តឹងនោះនៅឡើយទេ ប៉ុន្តែលោកថា ក្រសួងមហាផ្ទៃមិនព្រងើយកន្តើយឡើយបើមានករណីនេះពិតមែន។
លោកថា៖ «យ៉ាងណាក៏ដោយប្រសិនបើលិខិតបានមកដល់ដៃក្រសួងមហាផ្ទៃ ក្រសួងមិនព្រងើយកន្តើយទេ ព្រោះពេលខ្លះ យន្តការថ្នាក់ក្រោម ត្រឹមអភិបាលខេត្តកណ្តាលគេធ្វើបានជួនកាលគេឃើញលិខិតនោះយកទៅដោះស្រាយទៅ ពេលខ្លះមកដល់រដ្ឋបាល (ក្រសួងមហាផ្ទៃ) គេមានមន្ត្រីជំនាញដោះស្រាយលើកលែងតែការងារធំពេកបានផ្ញើជូនសម្តេច (ស ខេង)»។
ចំណែកអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បានប្រាប់ ភ្នំពេញ ប៉ុស្តិ៍ថា លោកក៏ពុំទាន់ទទួលបានពាក្យបណ្តឹងដែរ ប៉ុន្តែលោកបានបញ្ជាក់ដែរថា បើមានករណីនេះមែនមន្ត្រីជំនាញនឹងចុះស្រាវជ្រាវ។
លោកថា៖ «ខ្ញុំអត់ទាន់ដឹងទេយើងមានសមត្ថកិច្ចជំនាញមាននាយកដ្ឋានអង្គភាពជំនាញគេស្រាវជ្រាវ មិនចាំបាច់មានដល់បណ្តឹងទេ គ្រាន់តែឃើញនៅតាមហ្វេសប៊ុកក៏សមត្ថកិច្ចស្រាវជ្រាវស៊ើបបញ្ជាក់ដែរ»។
លោក ស៊ីម ឃាង អធិការនគរបាលស្រុកកោះធំដែលរងការចោទប្រកាន់បានប្រាប់ភ្នំពេញ-ប៉ុស្តិ៍ពីម្សិលមិញថា៖ «ខ្ញុំមិនមានអ្វីឆ្លើយតបទេ ប៉ុន្តែថ្នាក់លើគាត់បានដឹងរឿងនេះហើយ បានចុះមកស្រាវជ្រាវហើយអរគុណច្រើនដោយសារខ្ញុំកំពុងធ្វើរឿងនេះ»។
ក្នុងពាក្យបណ្តឹងបន្តថា លោកអធិការនគរបាល ស៊ីម ឃាង បានបញ្ជាឱ្យកូនចៅដើរប្រមូលលុយពីកន្លែងបើកល្បែងស៊ីសងជាថ្នូរនឹងការបើកអាជីវកម្ម។
«ប្រើឱ្យកូនចៅជំនិតៗរបស់ខ្លួនធ្វើសកម្មភាពដូចជា ជំរិតទារប្រាក់ពីមន្ត្រីណាដែលចង់ឡើងតួនាទី ឡើងស័ក្តិ...បង្ខំឱ្យប្រជាពលរដ្ឋដែលជាម្ចាស់ហាងផឹកស៊ី និងម្ចាស់ផ្ទះសំណាក់/ជួល និងហាងខារ៉ាអូខេនានានៅមូលដ្ឋានឃុំសំពៅលូនយកលុយបង់ថ្លៃការពារទាំងអស់ជូនលោកអធិការ ស៊ីម ឃាង រាល់ខែ»។
ពាក្យបណ្តឹងដដែលឱ្យដឹងថា ជាក់ស្តែងលោកអធិការ ស៊ីម ឃាង តែងយករថយន្តស៊ីរ៉ែនជាអំណោយសម្តេចក្រឡាហោម ស ខេង ទៅប្រើផ្ទាល់ខ្លួន។
រដ្ឋមន្ត្រីក្រសួងមហាផ្ទៃលោក ស ខេង ធ្លាប់បានថ្លែងក្នុងពិធីប្រគល់រថយន្តពីថ្ងៃទី ១៦ កុម្ភៈ ឆ្នាំនេះដោយបានរំឭកដល់ស្នងការនគរបាលរាជធានី ខេត្ត ដែលទទួលរថយន្តត្រូវយកទៅប្រើឱ្យចំគោលដៅ និងបំពេញតួនាទីភារកិច្ចដើម្បីប្រយោជន៍សាធារណៈមិនមែនបម្រើបុគ្គល ឬក៏យកទៅដឹកទំនិញគេចពន្ធឡើយ៕
