ភ្នំពេញៈ សេចក្តីព្រាងអនុក្រឹត្យស្តីពីការពិន័យអន្តរការណ៍ ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោកដែលនឹងចេញឲ្យប្រើប្រាស់បណ្តោះអាសន្ន ជំនួសច្បាប់ចរាចរណ៍ផ្លូវគោកដែលគ្រោងនឹងធ្វើវិសោធនកម្មក្នុងពេលឆាប់ៗ នឹងដំឡើងការផាកពិន័យអ្នកមិនគោរពច្បាប់ចរាចរណ៍ដល់គុណនឹង ៣ ទៅ ៤ ដងដែលបទល្មើសមិនពាក់មួកសុវត្ថិភាពអាចនឹងឡើងដល់ ៥ ម៉ឺនរៀល។
កាលពីថ្ងៃចន្ទលោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានដឹកនាំកិច្ចប្រជុំឆ្លងសេចក្តីព្រាងអនុក្រឹត្យស្តីពីការផាកពិន័យអន្តរការណ៍ ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោកនៅទីស្តីការក្រសួងមហាផ្ទៃ។
តាមទំព័រហ្វេសប៊ុករបស់លោក ស ខេង បានឲ្យដឹងថា កិច្ចប្រជុំនេះមានការចូលរួមពីថ្នាក់ដឹកនាំ រដ្ឋលេខាធិការ អនុរដ្ឋលេខាធិការក្រសួងមហាផ្ទៃតំណាងក្រសួងនានា ក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រីសមាជិក សមាជិកានៃគណៈកម្មាធិការជាតិសុវត្ថិភាពចរាចរណ៍ផ្លូវគោកអគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានីភ្នំពេញព្រមទាំងមន្ត្រីពាក់ព័ន្ធជិត ៧០ រូប។
លោក ប៉ាល់ ចន្ទតារា អ្នកនាំពាក្យក្រសួងសាធារណការ និងដឹកជញ្ចូន និងជាសមាជិកគណៈកម្មាធិការជាតិសុវត្ថិភាព ចរាចរណ៍ផ្លូវគោកដែលចូលរួមក្នុងកិច្ចប្រជុំនោះបានប្រាប់ភ្នំពេញប៉ុស្តិ៍ថា សេចក្តីព្រាងអនុក្រឹត្យស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោកនេះត្រូវបានឯកភាពស្ទើរតែ ១០០ ភាគរយនៅក្នុងកិច្ចប្រជុំ ដោយរង់ចាំតែការកែប្រែតែបន្តិចបន្តួចប៉ុណ្ណោះនឹងត្រូវប្រកាសឲ្យប្រើប្រាស់ជាផ្លូវការជំនួសឲ្យច្បាប់ចរាចរណ៍ផ្លូវគោកចាស់បណ្តោះអាសន្នសិនក្នុងអំឡុងច្បាប់នោះកំពុងត្រូវធ្វើវិសោធនកម្ម។
លោកបានប្រាប់ថា ក្នុងនោះអនុក្រឹត្យស្តីពីការពិន័យអន្តរការណ៍នឹងដំឡើងការផាកពិន័យ ខ្ពស់ជាងមុនដល់ទៅ ៣ ឬ ៤ ដងនៃការផាកពិន័យពីមុនដែលលោករំពឹងថា ការកើនឡើងនៃការផាកពិន័យនេះនឹងអាចចូលរួមរក្សាអាយុជីវិតរបស់ប្រជាពលរដ្ឋបានច្រើន ដោយឲ្យពួកគាត់ងាកមកគោរពច្បាប់ឲ្យបានគ្រប់ៗគ្នា។
លោកបញ្ជាក់ថា៖ «សំខាន់គឺមានការផាកពិន័យធ្ងន់ជាងមុន ដែលចាប់បង្ខំឲ្យបងប្អូនពលរដ្ឋយើងឲ្យងាកមកគោរពច្បាប់ ដោយកុំខ្លាចតែប៉ូលិសឲ្យគាត់ ខ្លាចច្បាប់ ព្រោះយើងមិនចង់បានលុយគាត់ទេ ប៉ុន្តែយើងចង់រក្សាអាយុជីវិតគាត់»។
លោក គង់ សុវណ្ណ ជាទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទបានប្រាប់ភ្នំពេញប៉ុស្តិ៍ថា នៅក្នុងក្រុមការងារបច្ចេកទេសដែលកន្លងទៅ នៅពេលសមត្ថកិច្ចអនុវត្តតែទៅលើវិធានការអប់រំ តែមួយមុខគត់នោះមិនបានធ្វើឲ្យប្រជាពលរដ្ឋខ្លាចរអា និងចូលរួមគោរពច្បាប់បានជាប់លាប់នោះទេ។
លោកបន្តថា ទន្ទឹមនឹងវិធានការអប់រំ ការអនុវត្តច្បាប់ និងការផាកពិន័យធ្ងន់ធ្ងរដល់អ្នកប្រព្រឹត្តល្មើស គឺជាវិធានការមួយដែលមានប្រសិទ្ធភាពខ្ពស់បំផុត ដែលរំពឹងថានឹងធ្វើឲ្យពលរដ្ឋ ងាកមកគោរពច្បាប់ចរាចរណ៍បានច្រើនជាងមុន។
លោកលើកឡើងថា៖ «នៅពេលដែលធ្វើការអប់រំផ្សព្វផ្សាយតែមួយប្រជាពលរដ្ឋបានត្រឹមតែមួយដឹង និងជឿជាក់ថាពេលបើកបរទៅមិនពាក់មួក ពេលដួលទៅអាចនឹងរបួសក្បាលធ្ងន់ធ្ងរ ប៉ុន្តែបើពួកគាត់អនុវត្តពាក់មួកបានត្រឹមត្រូវគ្រប់ពេលវេលាពេលធ្វើដំណើរសម្រាប់អ្នកបើកបរ និងអ្នកជិះពីក្រោយហ្នឹង អត់បានត្រឹមត្រូវទេ។ ដូច្នេះបើយើងអនុវត្តតឹងរឹតបន្ដឹងច្បាប់ បានតឹងតែងនោះការពាក់មួកហ្នឹងមានការកើនឡើងភ្លាម ហើយការផឹកគ្រឿងស្រវឹងមានការថយចុះភ្លាម»។
លោកបន្ថែមថា៖ «ក្នុងនេះយើងគ្រាន់តែនិយាយថា យើងត្រូវមើលក្នុងការធ្វើយ៉ាងណាក្នុងការទប់ស្កាត់ភាពមិនប្រក្រតី និងឲ្យការអនុវត្តច្បាប់នេះបានពិតប្រាកដ និងមានប្រសិទ្ធភាព។ នៅស្រុកគេមានការផាកពិន័យមានការកើនឡើងខ្ពស់ និងការអនុវត្តបានជោគជ័យ ដោយការរឹតបន្តឹងច្បាប់ជាក់លាក់ មាំទាំ ដោយប្រសិទ្ធភាពក្នុងការសង្គ្រោះអាយុជីវិតមនុស្ស»។
បើតាមលោក ប៉ាល់ ចន្ទតារា ក្នុងករណីដែលសេចក្តីព្រាងអនុក្រឹត្យស្តីពីការពិន័យអន្តរការណ៍ចេញជាធរមាននោះការផាកពិន័យដែលមានក្នុងច្បាប់ពីមុនតម្លៃ ១៥០០០ រៀលដោយការមិនពាក់មួកសុវត្ថិភាពនឹងឡើងដល់ជិត ៥ ម៉ឺនរៀលហើយករណីការផាកពិន័យដែលមានតម្លៃ ២ ម៉ឺនរៀលអាចឡើងដល់ ៦ ម៉ឺនរៀលជាដើម៕
វីដេអូ៖