ភ្នំពេញៈ តុលាការក្រុងភ្នំពេញបានចេញដីកាឱ្យសមត្ថកិច្ចតាមស្វែងរកចាប់ខ្លួនអនុប្រធានគណបក្ស និងយុវជនរបស់គណបក្សមហាសាមគ្គីជាតិខ្មែរ ក្រោយពីតុលាការបានចោទប្រកាន់អ្នកទាំង ២ នាក់ពីបទញុះញង់ និងប្រមាថ។ អ្នកទាំង ២ នាក់នេះត្រូវបានលោក ពេជ្រ ស្រស់ ប្រធានគណបក្សយុវជនកម្ពុជាប្ដឹងទៅតុលាការកាលពីប៉ុន្មានខែមុន ដោយសារធ្វើឱ្យប៉ះពាល់ដល់ស្ថាប័នឧត្តមក្រុមប្រឹក្សាពិគ្រោះ និងផ្ដល់យោបល់។
លោក កូយ សៅ អនុប្រធានសាលាដំបូងរាជធានីភ្នំពេញ និងចៅក្រមស៊ើបសួរបានចេញដីកាដាច់ដោយឡែកពីគ្នាចំនួន ២ កាលពីថ្ងៃទី ២០ មេសាដើម្បីបង្គាប់ឱ្យសមត្ថកិច្ចតាមចាប់ខ្លួនឈ្មោះ ហ៊ាង គឹមស្រឿន អនុប្រធានគណបក្សមហាសាមគ្គីជាតិខ្មែរ និងឈ្មោះ ថុល សុផាន់ណា ជាយុវជនរបស់គណបក្សនេះដែលអ្នកទាំង ២ នាក់ត្រូវបានចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទប្រមាថកាលពីថ្ងៃទី ១០ ខែតុលា ឆ្នាំ ២០១៩។
នៅក្នុងដីកាបន្តថា អ្នកទាំង ២ មានលំនៅបច្ចុប្បន្ននៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ ប៉ុន្តែលោក នង សាបុង នាយប៉ុស្ដិ៍នគរបាលសង្កាត់ទួលសង្កែ ១ បានប្រាប់ភ្នំពេញប៉ុស្ដិ៍ម្សិលមិញដែរថា តាមការស្រាវជ្រាវលំនៅជាក់ស្ដែងរបស់បុគ្គលទាំង ២ នេះមិនស្ថិតនៅក្នុងសង្កាត់ទួលសង្កែ ១ ឡើយ។
លោក សាបុង បានថ្លែងថា៖ «លំនៅជាក់ស្ដែង អត់នៅក្នុងមូលដ្ឋានខ្ញុំទេ អ៊ីចឹងមិនដឹងថា មានលំនៅនៅឯណាទេ»។
លោក ស្រស់ ថ្លែងថា៖ «ឧត្តមក្រុមប្រឹក្សាពិគ្រោះ និងផ្ដល់យោបល់គឺជាស្ថាប័នកើតឡើងពីការស្ម័គ្រចិត្តរបស់គណបក្សនយោបាយទាំងអស់អត់មានអ្នកណាមួយមកចង្អុលបង្ហាញឱ្យយើងធ្វើអីទេគឺយើងធ្វើតែទៅតាមឆន្ទៈនយោបាយរបស់ពួកយើងទាំងអស់គ្នា។ ប៉ុន្តែគាត់ (ហ៊ាង គឹមស្រឿន) មកបរិហារកេរ្តិ៍ថា ពួកយើងជាស្ថាប័នស្ដាប់តាមការបង្គាប់បញ្ជា។ ប៉ុន្តែពួកខ្ញុំគឺប្រឹងធ្វើការណាស់ ដើម្បីប្រយោជន៍ជាតិ និងពលរដ្ឋ»។
លោកបន្តថា៖ «ចំពោះលោក ថុល សុផាន់ណា មិនដឹងថា គាត់មានទិន្នន័យ និងភ័ស្ដុតាងមកពីណាទេ ចោទខ្ញុំថាទទួលលុយ ២០ ម៉ឺនដុល្លារពីគណបក្សកាន់អំណាចក្នុងការជួយរំលាយគណបក្សសង្គ្រោះជាតិ។ នេះគឺជាការលាបពណ៌ធ្វើឱ្យខូចឈ្មោះខ្លួនខ្ញុំផង និងគណបក្សយុវជនកម្ពុជាទាំងមូលផង»។
លោក ហ៊ាង គឹមស្រឿន មិនអាចទាក់ទងតាមទូរស័ព្ទដើម្បីសុំអត្ថាធិប្បាយបានទេកាលពីថ្ងៃម្សិលមិញ៕