ភ្នំពេញៈ លោក សេង សុវណ្ណារ៉ា ត្រូវបានព្រះមហាក្សត្រចេញព្រះរាជក្រឹត្យដកតំណែងជាអនុរដ្ឋលេខាធិការក្រសួងយុត្តិធម៌បន្ទាប់ពីលោកឧបនាយករដ្ឋមន្ត្រី ស ខេង ដកចេញពីក្រុមការងារចុះជួយខេត្តមណ្ឌលគិរីស្របពេលដែលអភិបាលខេត្តនេះបានដកហូតដីពីគាត់ប្រហែល ១ ៧៥៤ ហិកតា ដោយសាររំលោភលើដែនអភិរក្សនៅស្រុកអូររាំង និងស្រុកកោះញែកខេត្តមណ្ឌលគិរី។
ព្រះរាជក្រឹត្យ ចុះថ្ងៃទី ២៤ ខែ សីហា បានបញ្ជាក់ថា៖ «បញ្ចប់មុខតំណែងឯកឧត្តម សេង សុវណ្ណារ៉ា ពីអនុរដ្ឋលេខាធិការក្រសួងយុត្តិធម៌។ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីព្រះរាជាណាចក្រកម្ពុជា ត្រូវទទួលបន្ទុកអនុវត្តរាជក្រឹត្យនេះចាប់ពីថ្ងៃឡាយព្រះហស្តលេខាតទៅ»។
កាលពីថ្ងៃទី ១៣ សីហា លោក សេង សុវណ្ណារ៉ា ត្រូវបានលោក ស ខេង រដ្ឋមន្ត្រីក្រសួងមហាផ្ទៃប្រកាសដកចេញពីសមាជិកក្រុមការងារថ្នាក់ជាតិចុះមូលដ្ឋានខេត្តមណ្ឌលគិរីដែរដោយដាក់លោក មាស ប្រុស ប្រធានរដ្ឋបាលសាលាដំបូងខេត្តមណ្ឌលគិរីជំនួសវិញ។
ការដកតំណែងជាបន្តបន្ទាប់នេះបន្ទាប់ពីមានការបែកធ្លាយលិខិតចំនួន ៣ សន្លឹក របស់លោក សេង សុវណ្ណារ៉ា កាលពីដើមខែកក្កដាដែលបានស្នើសុំធ្វើជាម្ចាស់កម្មសិទ្ធិដីធ្លីចំនួន ៣ ទីតាំងផ្សេងៗគ្នាសរុបចំនួន ១ ៧៥៤ ហិកតា ក្នុងនោះមានលិខិត ២ ត្រូវបានលោក ស្វាយ សំអ៊ាង អភិបាលខេត្តមណ្ឌលគិរី ចុះហត្ថលេខាទទួលស្គាល់ ខណៈទីតាំងទាំង ៣ នោះត្រូវបានពលរដ្ឋចេញតវ៉ាថា ជាដីអភិរក្ស។
ក្រោយមកនៅថ្ងៃទី ២៤ ខែ កក្កដា លោក ស្វាយ សំអ៊ាង បានចេញលិខិតសាជាថ្មីដកហូតដីពីលោក សេង សុវណ្ណារ៉ា ចំនួន ៩៩០ ហិកតា នៅឃុំអូរបួនលើ ស្រុកកោះញែកវិញ ដោយសារពិនិត្យឃើញថាជាដីអភិរក្ស ហើយលោក សុក សេរ៉ា មន្ត្រីនាំពាក្យខេត្តមណ្ឌលគិរីបានប្រាប់ភ្នំពេញប៉ុស្ដិ៍ថា មូលហេតុលោក ស្វាយ សំអ៊ាង ចុះហត្ថលេខាទទួលស្គាល់ថាជាដីលោក សេង សុវណ្ណារ៉ា ពីដំបូងនោះគឺដោយសារកំហុសរបស់អាជ្ញាធរមូលដ្ឋានដែលមិនបានពិនិត្យ និងផ្ទៀងផ្ទាត់ឱ្យបានច្បាស់លាស់។
លោក សុក សេរ៉ា បានប្រាប់ភ្នំពេញប៉ុស្ដិ៍ពីម្សិលមិញដែរថា ដី ២ កន្លែងទៀតរបស់លោក សេង សុវណ្ណារ៉ា ដែលរំលោភលើដីអភិរក្សគឺចំនួន ២៩២ ហិកតា នៅភូមិពូហ្សាម និងដីចំនួន ៤៧២ ហិកតាស្ថិតក្នុងភូមិពូរាំង ឃុំសែនមនោរម្យ ស្រុកអូររាំងក៏ត្រូវបានដកហូតដែរ។
លោកថា៖ «ត្រូវបានដកជាបន្តបន្ទាប់គ្នាអស់ហើយហើយប្រគល់ឱ្យជំនាញពាក់ព័ន្ធទាំងអស់គ្រប់គ្រង»។
លោក កែវ សុភ័ក្រ ប្រធានមន្ទីរបរិស្ថានខេត្តមណ្ឌលគិរីបានប្រាប់ភ្នំពេញប៉ុស្ដិ៍ម្សិលមិញដែរថា ដីចំនួន ៩៩០ ហិកតានោះ ស្ថិតក្នុងដែនជម្រកសត្វព្រៃស្រែពកក្នុងស្រុកកោះញែក។ រីឯដីចំនួន ២៩២ ហិកតា និងដីចំនួន ៤៧២ ហិកតា ស្ថិតក្នុងដែនជម្រកសត្វព្រៃកែវសីមាក្នុងស្រុកអូររាំង។
លោកថា៖ «ចំណាត់ការក្រោយយ៉ាងម៉េចទៀតអត់ទាន់ដឹងទេ ដោយសារធ្លាប់បានរាយការណ៍ទៅថ្នាក់លើ (ស ខេង) អស់ហើយ ហើយការសម្រេចបែបណាទៀតអាហ្នឹងជារបស់ថ្នាក់លើ។ អត់ទាន់មានឈូសឆាយ អត់ទាន់មានព័ទ្ធរបងអីទេ គ្រាន់តែគាត់ធ្វើប្លង់យក»។
កាលពីថ្ងៃម្សិលមិញ ភ្នំពេញប៉ុស្ដិ៍ មិនអាចទាក់ទងសុំការបញ្ជាក់ពីលោក ខៀវ សុភ័គ អ្នកនាំពាក្យក្រសួងមហាផ្ទៃជុំវិញការដកតំណែងលោក សេង សុវណ្ណារ៉ា បានទេ។ ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌ធ្លាប់បានប្រាប់ភ្នំពេញប៉ុស្ដិ៍ថា រឿងរំលោភយកដីអភិរក្សរបស់លោក សេង សុវណ្ណារ៉ា គឺជារឿងបុគ្គល មិនពាក់ព័ន្ធនឹងក្រសួងឡើយ ហើយលោកបានលើកទឹកចិត្តឱ្យមានការអនុវត្តតាមនីតិវិធី។
កាលពីថ្ងៃម្សិលមិញ ភ្នំពេញប៉ុស្ដិ៍ ក៏មិនអាចសុំការអត្ថាធិប្បាយពីលោក សេង សុវណ្ណារ៉ា បានដែរដោយសារទូរស័ព្ទរបស់លោកមិនអាចទាក់ទងបាន។
លោក ប៉ែន ប៊ុណ្ណារ៍ មន្ត្រីកម្មវិធីសិទ្ធិមនុស្សសិទ្ធិដីធ្លីអង្គការអាដហុកបានលើកឡើងថា ការចុះហត្ថលេខាបោះត្រាទទួលស្គាល់ឱ្យលោក សេង សុវណ្ណារ៉ា រំលោភយកដីរដ្ឋចាប់ពីថ្នាក់ភូមិឃុំ រហូតដល់អភិបាលខេត្ត គឺការប្រព្រឹត្តខុសច្បាប់ដ៏ធ្ងន់ធ្ងរហើយស្ថាប័នអយ្យការគួរតែកោះហៅមន្ត្រីទាំងនេះទៅឆ្លើយបំភ្លឺ ដោយលោកបានថ្លែងថាអ្នកដែលអាចសម្រេចធ្វើអនុបយោគដីរដ្ឋទៅជាដីឯកជនបានគឺមានតែអនុក្រឹត្យរបស់នាយករដ្ឋមន្ត្រីប៉ុណ្ណោះ។
លោកថា៖ «ប្រសិនបើតាមផ្លូវច្បាប់ ពួកគាត់ត្រូវតែទទួលខុសត្រូវចំពោះមុខច្បាប់។ នេះជាការតវ៉ារកឃើញពីប្រជាពលរដ្ឋ ហើយបើមិនមានការតវ៉ារបស់ប្រជាពលរដ្ឋ អ៊ីចឹងដីសាធារណៈរបស់រដ្ឋជាង ១ ពាន់ហិកតានឹងក្លាយជាដីឯកជន ដោយមិនឆ្លងកាត់អនុក្រឹត្យអនុបយោគទៅហើយ។ អ៊ីចឹងមន្ត្រីដែលចុះហត្ថលេខាលើលិខិតរបស់លោក សេង សុវណ្ណារ៉ា ទាំងអស់ត្រូវតែមកឆ្លើយបំភ្លឺហើយទទួលខុសត្រូវចំពោះមុខច្បាប់»។
លោក ម៉ម វ៉ាន់ដា ព្រះរាជអាជ្ញារង និងអ្នកនាំពាក្យតុលាការខេត្តមណ្ឌលគិរីបានប្រាប់ភ្នំពេញប៉ុស្ដិ៍ថា តុលាការមិនទាន់មានគម្រោងកោះហៅមន្ត្រីពាក់ព័ន្ធនឹងការចុះហត្ថលេខាឱ្យលោក សេង សុវណ្ណារ៉ា ធ្វើជាម្ចាស់កម្មសិទ្ធិលើដីរដ្ឋនោះទេ។
លោកថា៖ «ខាងខ្ញុំនេះអត់ទាន់ទទួលបានពាក្យបណ្ដឹងណាមួយ ឬក៏ការចាត់ការណាមួយទេ គ្រាន់តែចង់ជម្រាបជូនប៉ុណ្ណឹង»៕