ភ្នំពេញៈ នៅទីបញ្ចប់មានអនុសាសន៍ចំនួន ១៧៦ ត្រូវបានប្រទេស ៧៣ លើកឡើងសម្រាប់ធ្វើឲ្យប្រសើរឡើងបញ្ហាសិទ្ធិមនុស្សនៅកម្ពុជាក្រោយពីប្រជុំពិនិត្យសកលតាមកាលកំណត់បានបញ្ចប់កាលពីថ្ងៃសុក្រ នៅទីក្រុងហ្សឺណែវ ប្រទេសស្វ៊ីស។ ប៉ុន្តែមន្ត្រីកម្ពុជាថា អនុសាសន៍ដែលមានចរិតនយោបាយទំនងជាមិនត្រូវបានពិចារណាទេ។
នៅក្នុងកិច្ចប្រជុំបូកសរុបចុងក្រោយកាលពីថ្ងៃសុក្រ លោក Farukh Amil តំណាងអចិន្រៃ្តយ៍របស់ប្រទេសប៉ាគីស្ថានប្រចាំមន្ទីរអង្គការសហប្រជាជាតិ និងអង្គការអន្តរជាតិនានាដែលបានកត់ត្រាបានរាយការណ៍ថា មានអនុសាសន៍ ១៧៦ ត្រូវបានលើកឡើង ហើយតម្រូវឲ្យកម្ពុជាឆ្លើយតបមុនការប្រជុំពេញអង្គក្រុមប្រឹក្សាសិទ្ធិមនុស្សអង្គការសហប្រជាជាតិនៅខែកក្កដាខាងមុខ។ ប៉ុន្តែប្រតិភូដែលផ្ដល់អនុសាសន៍មានពេលដល់ថ្ងៃ ១៥ កុម្ភៈ ដើម្បីកែប្រែចំណុចដែលគេបានលើកឡើង។
លោក ណី សំអុល ឯកអគ្គរាជទូត និងជាតំណាងអចិន្រៃ្តយ៍កម្ពុជាប្រចាំមន្ទីរអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវថ្លែងក្នុងកិច្ចបូកសរុបចុងក្រោយថា កម្ពុជានឹងយកចំណុចទាំង ១៧៦ ទៅពិចារណា។
លោកថ្លែងថា៖ «យើងនឹងចាត់វិធានការសមស្របដោយផ្អែកលើរបៀប វិធីសាស្ត្រ និងធនធានដែលយើងមាន ដើម្បីឆ្លើយតបនឹងការចូលរួមនេះ ហើយយើងនឹងឆ្លើយតបលើក្តីបារម្ភទាំងនេះដើម្បីធ្វើឲ្យប្រសើរឡើង ការពារ និងគោរពសិទ្ធិរបស់ពលរដ្ឋកម្ពុជាដែលមានភាពប្រសើរឡើងយ៉ាងខ្លាំងក្នុងឆ្នាំកន្លងទៅ ដែលយើងមានមោទនភាព»។
លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជាដែលបានចូលរួមក្នុងកិច្ចប្រជុំដែរនោះបានថ្លែងពីម្សិលមិញថាអនុសាសន៍ដែលពីដំបូងមាន ២០២ ចំណុច ប៉ុន្តែបានធ្លាក់មកនៅ ១៧៦ វិញ ក្រោយបូកសរុបចុងក្រោយដោយសារអនុសាសន៍ខ្លះដូចគ្នា។
លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជាបានថ្លែងក្នុងសន្និសីទសារព័ត៌មានកាលពីយប់ថ្ងៃសុក្រពេលមកដល់កម្ពុជាវិញដោយលោកថា បេសកកម្មនេះបាន «ជោគជ័យ»។
លោកថ្លែងនៅព្រលានយន្តហោះអន្តរជាតិភ្នំពេញថា៖ «ហេតុអ្វីបានខ្ញុំថា ជោគជ័យ ពីព្រោះយើងបានការពារ និងបង្ហាញអ្នកចូលរួម។ ខ្ញុំថា យើងបានរួមគ្នាដើម្បីការពារមុខមាត់ជាតិ នៅអង្គការសហប្រជាជាតិមិនឲ្យកម្ពុជាបាក់មុខទេ។យើងបានប្ដេជ្ញាមុនរួចហើយមុនពេលប្រជុំ ហើយយើងធ្វើបាន»។
លោកកែវ រ៉េមី ថ្លែងថា ការពិនិត្យជាសកលតាមកាលកំណត់ (UPR) នេះ គឺជាឱកាសមាសសម្រាប់កម្ពុជាបង្ហាញអន្តរជាតិថា លទ្ធិប្រជាធិបតេយ្យ សិទ្ធិមនុស្សនិងការអភិវឌ្ឍសេដ្ឋកិច្ចកើនហើយធ្វើឱ្យពួកគេយល់បន្ថែមពីកម្ពុជា។
លោកថា៖ «យើងបានគន់គូរមើលថា តើមានប៉ុន្មានប្រទេសដែលបាននិយាយថាយើងខ្មៅ ហើយតើមានប្រទេសប៉ុន្មានថាយើងស ហើយគាំទ្រយើង។ ប្រទេសភាគច្រើនគឺបានគាំទ្រយើង។ ពួកគេបានអបអរសាទរយើងនិងរដ្ឋាភិបាលរបស់យើង»។
យ៉ាងណាក្ដី លោក រ៉េមី បានថ្លែងថានៅមានប្រទេស១ចំនួនតូចនៅប្រកាន់ជំហរអវិជ្ជមានមកលើកម្ពុជា។
លោកថា៖ «គាត់នៅតែប្រកាន់របៀបអវិជ្ជមានជាមួយយើង ហើយប្រទេសណាខ្លះបងប្អូនដឹងហើយ មានប្រទេសណាខ្លះនៅអឺរ៉ុប ហើយអាមេរិកគាត់លើកដដែលៗរឿងនយោបាយ ប្រជាធិបតេយ្យ...។ អ្នកខ្លះបងប្អូនយើងសង្កេត អ្នកខ្លះមុខឡើងក្រហមទៅៗដូចរងើកភ្លើងអ៊ីចឹង! គាត់ឈឺដែរ យើងដាក់ឡើងស្ពឹកមុខនៅកណ្ដាលអង្គប្រជុំ»។
លោកបន្ថែមទៀតថា គ្រប់ប្រទេសគឺសុទ្ធតែមានបញ្ហាសិទិ្ធមនុស្ស។
លោក ជិន ម៉ាលីន ថ្លែងថា អនុសាសន៍ទាំងនោះនឹងត្រូវពិនិត្យឡើងវិញជាមួយភាគីពាក់ព័ន្ធដើម្បីពិនិត្យមើលថា តើអនុសាសន៍ណាដែលមិនឆ្លុះបញ្ចាំងពីការពិតនៅកម្ពុជាឬប្រឆាំងនឹងច្បាប់កម្ពុជាមុនពេលយើងឆ្លើយតបទៅអង្គការ UNHRC នៅក្នុងខែកក្កដា។
លោកបន្ថែមថា អនុសាសន៍ទាំងអស់នោះគ្របដណ្តប់លើវិស័យជាច្រើន ក្នុងនោះមានដូចជា សិទ្ធិសេដ្ឋកិច្ច សង្គមវប្បធម៌ និងសង្គមស៊ីវិល និងសិទ្ធិនយោបាយជាដើម។
លោកបន្ថែមថា៖ «ប៉ុន្តែអនុសាសន៍មួយចំនួនទាក់ទងនឹងនយោបាយដែលបង្កប់របៀបវារៈនយោបាយ និងមិនស្របតាមច្បាប់ជាតិ ឬច្បាប់អន្តរជាតិជាពិសេសច្បាប់របស់កម្ពុជាដែលធ្វើឲ្យប៉ះពាល់ដល់នីតិវិធី និងឯករាជភាពរបស់តុលាការ ការជ្រៀតជ្រែកលទ្ធិប្រជាធិបតេយ្យកម្ពុជា និងនីតិរដ្ឋរបស់យើងគឺយើងនឹងមិនទទួលយកនោះទេពីព្រោះវាខុសច្បាប់»។
លោក សឹង សារឿន នាយកប្រតិបត្តិអង្គការគណៈកម្មាធិការប្រតិបត្តិដើម្បីកម្ពុជា (CCC) យល់ថា អនុសាសន៍ទាំងនេះឆ្លុះបញ្ចាំងស្ថានការណ៍ជាក់ស្តែងនៅកម្ពុជា។
លោកថា៖ «ខ្ញុំជឿជាក់ថា រដ្ឋាភិបាលមិនត្រឹមតែបង្ហាញការប្ដេជ្ញាខ្ពស់ទេ ថែមទាំងមានសកម្មភាពសមស្រប»៕