ភ្នំពេញៈ អន្តរក្រសួងកំពុងពិនិត្យ និងចងក្រងឯកសារទីតាំងដីក្នុងតំបន់ការពារធម្មជាតិ និងរបៀងអភិរក្សជីវចម្រុះដែលពលរដ្ឋបានប្រើប្រាស់ និងអាស្រ័យផលជាក់ស្តែងក្នុងភូមិសាស្ត្រខេត្តកោះកុង ក្រោយពីប្រជុំអន្តរក្រសួង តាមការណែនាំរបស់ថ្នាក់ដឹកនាំដែលជំរុញឲ្យមានការទប់ស្កាត់ការទន្ទ្រានយកដីដោយខុសច្បាប់ ខណៈមានការស្នើសុំកាត់ឆ្វៀលដីក្នុងខេត្តនេះជាង ៨ ម៉ឺនហិកតាជូនពលរដ្ឋ។
កាលពីថ្ងៃ ១១ ខែសីហា លោក សាយ សំអាល់ រដ្ឋមន្ត្រីក្រសួងបរិស្ថានដឹកនាំកិច្ចប្រជុំអន្តរក្រសួងមួយតាមការណែនាំរបស់ថ្នាក់ដឹកនាំដែលជំរុញឲ្យមានការទប់ស្កាត់ ការកាប់រានទន្ទ្រានយកដី ដោយខុសច្បាប់ក្នុងតំបន់ការពារធម្មជាតិ។ កិច្ចប្រជុំមានការចូលរួមពីគ្រប់សមាសភាពពាក់ព័ន្ធជាង ២០០ នាក់ ក្នុងនោះមានស្ថាប័នព្រឹទ្ធសភា រដ្ឋសភា តំណាងក្រុមការងារថ្នាក់ជាតិ ក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ ក្រសួងសេដ្ឋកិច្ច និងហិរញ្ញវត្ថុ ក្រសួងយុត្តិធម៌ ក្រសួងកសិកម្ម រុក្ខាប្រមាញ់ និងនេសាទ ក្រុមប្រឹក្សាអភិវឌ្ឍន៍កម្ពុជា អង្គភាពប្រឆាំងអំពើពុករលួយ អភិបាលខេត្តកោះកុង និងមន្ត្រីថ្នាក់ក្រោមជាតិនៃខេត្តនេះ។
លោក សាយ សំអាល់ លើកឡើងក្នុងឱកាសនោះថា កិច្ចប្រជុំនេះធ្វើឡើងគោរពតាមអនុសាសន៍ ណែនាំរបស់ថ្នាក់ដឹកនាំក្នុងការជំរុញការទប់ស្កាត់ ការកាប់រានទន្ទ្រានយកដីដោយខុសច្បាប់ក្នុងតំបន់ការពារធម្មជាតិនៅតាមបណ្តាខេត្តនានា។ លើសពីនេះ ក៏ដើម្បីឲ្យស្ថាប័នពាក់ព័ន្ធពិនិត្យក្នុងការកាត់ឆ្វៀលដីជូនពលរដ្ឋដែលកំពុងរស់នៅអាស្រ័យផលក្នុងតំបន់អភិរក្សតំបន់សត្វព្រៃ និងតំបន់ ការពារផ្សេងៗរបស់រដ្ឋផងដែរ។
លោកបញ្ជាក់ថា៖ «ខេត្តកោះកុងមានក្រុមការងារអន្តរក្រសួង និងអនុក្រុមការងារចុះទីវាលក្រុងស្រុកទាំង ៧ នៃខេត្តកោះកុង និងសេចក្តីសម្រេចស្តីពីការបង្កើតក្រុមការងារពិនិត្យសិក្សា និងចងក្រងឯកសារទីតាំងដែលប្រជាពលរដ្ឋបានប្រើប្រាស់ និងអាស្រ័យផលជាក់ស្តែងក្នុងតំបន់ការពារធម្មជាតិ និងរបៀងជីវចម្រុះ»។
កាលពីថ្ងៃទី ៣ ខែកក្កដា ឆ្នាំ ២០២០ ក្នុងកិច្ចប្រជុំពេញអង្គគណៈរដ្ឋមន្ត្រី លោកនាយករដ្ឋមន្ត្រី ហ៊ុន សែន បានប្រគល់ភារកិច្ចជូនទៅក្រសួងទាំង ៣ គឺក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ និងក្រសួងរៀបចំដែនដី នគរូបនីយកម្ម និងសំណង់ឲ្យពិនិត្យលទ្ធភាពក្នុងការកាត់ឆ្វៀលដីជូនពលរដ្ឋដែលកំពុងរស់នៅអាស្រ័យផលក្នុងតំបន់អភិរក្ស តំបន់សត្វព្រៃ និង តំបន់ការពារផ្សេងៗរបស់រដ្ឋ។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ភ្នំពេញប៉ុស្តិ៍ពីថ្ងៃទី ១២ សីហា ថាបន្ទាប់ពីមានការប្រកាសរបស់លោកនាយករដ្ឋមន្ត្រីយ៉ាងដូច្នេះ ក៏មានជនខិលខូចជាច្រើនបានចូលទៅទន្ទ្រានកាន់កាប់ដីរបស់រដ្ឋរួមទាំងខេត្តកោះកុងផងដែរ។ លោកបានបន្តថា តាមរបាយការណ៍ដែលទទួលបានពីមន្ត្រីថ្នាក់ក្រោមជាតិគឺនៅក្នុងខេត្តកោះកុងមានការស្នើកាត់ឆ្វៀលដីជូនប្រជាពលរដ្ឋជាង ៨ ម៉ឺនហិកតាពីតំបន់ការពារ។
លោក នេត្រ ភក្ត្រា ថា៖ «ប៉ុន្តែយើងមិនទាន់អនុវត្តនីតិវិធីយ៉ាងណាទេ ដោយសារតែយើងត្រូវចុះសិក្សាស្រាវជ្រាវឲ្យបានច្បាស់លាស់។ បញ្ជាក់ អត្តសញ្ញាណ និងក្បាលដីឲ្យបានច្បាស់លាស់ថាពួកគាត់កាន់កាប់ដីនោះយូរតាមអនុសាសន៍របស់សម្តេចតេជោដែរឬក៏អត់? ឬក៏ពួកគាត់ទើបតែកាប់ [ដីព្រៃ] ថ្មីៗ ហើយមកទាមទារដែរ ព្រោះអនុសាសន៍របស់សម្តេចតេជោគឺអត់យោគយល់ទេ គឺយើងបង្ក្រាប ទប់ស្កាត់ និងអនុវត្តច្បាប់ចំពោះអ្នកឆ្លៀតឱកាស»។
លោក ថោង ច័ន្ទដារ៉ា អ្នកសម្របសម្រួលផ្នែកសិទ្ធិមនុស្សនៃសមាគម អាដហុក ប្រចាំខេត្តកោះកុងថ្លែងថា ទំហំដីជាង ៨ ម៉ឺនហិកតាដែលមន្ត្រីថ្នាក់ក្រោមជាតិបានស្នើកាត់ឆ្វៀលនេះមិនប្រាកដ ថាជាដីកាន់កាប់ដោយពលរដ្ឋដែលបានរស់នៅលើដីជាយូរឆ្នាំនោះទេ។ ដូច្នេះលោកថា រដ្ឋាភិបាលត្រូវតែពិនិត្យស្រាវជ្រាវករណីនេះឲ្យបានហ្មត់ចត់ ចៀសវាងមានជនឆ្លៀតឱកាស និងបក្ខពួកមន្ត្រីមួយចំនួនដែលមានចេតនាអាក្រក់ចង់បានដីរបស់រដ្ឋ៕