.jpg)
ជនអន្ដោប្រវេសន៍ជនជាតិវៀតណាម ៨ នាក់ លួចឆ្លងដែនចូលមកកម្ពុជាកាលពីម្សិលមិញ។ រូបថត GDI
ភ្នំពេញ: ក្រសួងមហាផ្ទៃបានរៀបចំកិច្ចប្រជុំអន្ដរក្រសួងកាលពីថ្ងៃទី ១២ មករា ដោយបានបន្តពិនិត្យ និងពិភាក្សាលើសេចក្ដីព្រាងច្បាប់ស្ដីពីអន្ដោប្រវេសន៍ថ្មី ត្រង់មាត្រា ១២ នៃជំពូកទី ៣ បន្ទាប់ពីអន្តរក្រសួងបានបញ្ចប់កិច្ចពិភាក្សាលើមាត្រា ១១ នៃជំពូកទី ៣ កាលពីអំឡុងខែវិច្ឆិកា ឆ្នាំ ២០២០។
លោក ប៊ុន ហុន រដ្ឋលេខាធិការក្រសួងមហាផ្ទៃដែលជាប្រធានក្រុមបច្ចេកទេសអន្ដរក្រសួងរៀបចំតាក់តែងសេចក្ដីព្រាងច្បាប់នេះ ប្រាប់ ភ្នំពេញ ប៉ុស្ដិ៍ ពីម្សិលមិញថា ខ្លឹមសារក្នុងមាត្រា ១២ ដែលកំពុងពិភាក្សានេះបានចែងពីសិទ្ធិជនបរទេស ដែលមកបម្រើការងារនៅកម្ពុជាដោយមាត្រានេះនឹងកំណត់អំពីលក្ខខណ្ឌឱ្យជនបរទេសគោរពតាម ហើយជនបរទេសត្រូវតែអនុវត្ត ដើម្បីឱ្យស្របតាមច្បាប់ការងារ និងច្បាប់អន្តោប្រវេសន៍។
លោកថា៖ «ក្នុងកិច្ចប្រជុំនេះ យើងបានពិភាក្សាលើកឡើងពីបរិបទច្បាប់នៅកម្ពុជា និងច្បាប់បរទេសដើម្បីយើងពិនិត្យមើលថា តើគួររៀបចំបញ្ញត្តិឱ្យល្អត្រឹមត្រូវបែបណា ដើម្បីបម្រើឱ្យប្រយោជន៍ប្រជាពលរដ្ឋ និងប្រទេសជាតិយើងក៏ធានាមិនឱ្យផ្ទុយពីគោលការអន្តរជាតិដែរ ពោលគឺយើងត្រូវពិនិត្យមើលឱ្យគ្រប់ជ្រុងជ្រោយទាំងអស់»។
បើតាមលោក ប៊ុន ហុន នៅក្នុងអង្គប្រជុំនោះ សមាជិកសមាជិកាភាគច្រើនបានឯកភាពនៅក្នុងចំណុចដែលបានសម្រេច ប៉ុន្ដែភាគីមន្ត្រីជំនាញក្រសួងការងារ បណ្តុះបណ្តាលវិជ្ជាជីវៈស្នើសុំកែសម្រួលនូវចំណុចខ្លះ។ ដោយឡែក ច្បាប់ចាស់ដែលកំពុងអនុវត្តរាល់ថ្ងៃនេះ មានបញ្ហាខ្លះដែលមិនសមស្របតាមបរិបទសង្គមបច្ចុប្បន្ន ដោយមានចំណុចខ្លះត្រូវកែសម្រួលឡើងវិញ ខ្លះត្រូវបានលុបចោល ខ្លះត្រូវបន្ថែមខ្លឹមសារ និងចំណុចខ្លះទៀតគឺត្រូវបានតាក់តែងថ្មី ទើបគណៈកម្មការស្នើសុំគោលការណ៍ពីរាជរដ្ឋាភិបាលដើម្បីរៀបចំសេចក្ដីព្រាងច្បាប់ថ្មីនេះ។
លោក ហេង សួរ អ្នកនាំពាក្យក្រសួងការងារមិនទាន់អាចទាក់ទងសុំការបញ្ជាក់បន្ថែមពីបញ្ហានេះបានទេ ពីម្សិលមិញដោយទូរស័ព្ទលោកគ្មានអ្នកទទួល។
លោក ស៊ឹង សែនករុណា មន្ត្រីអង្កេតផ្នែកសិទ្ធិមនុស្សនៃសមាគមអាដហុកបានគាំទ្រចំពោះការធ្វើសេចក្តីព្រាងច្បាប់ថ្មី ស្តីពីអន្តោប្រវេសន៍នេះ ដើម្បីឱ្យឆ្លើយតបតាមស្ថានភាពបច្ចុប្បន្ន។
លោកបញ្ជាក់ថា៖ «បើយើងមានច្បាប់ល្អ ស្របនឹងការអនុវត្តច្បាប់ល្អថែមទៀតនឹងធ្វើឱ្យប្រទេសជាតិយើងមានសណ្ដាប់ធ្នាប់ល្អ សន្ដិសុខល្អ។ ប៉ុន្ដែអ្វីដែលខ្ញុំនៅព្រួយបារម្ភ គឺត្រង់ចំណុចដែលអនុវត្តទៅលើជនបរទេសដែលធ្វើការស្ម័គ្រចិត្តនៅតាមអង្គការ សង្គមស៊ីវិលដែលចូលមកជួយការងារអភិវឌ្ឍន៍សង្គមជាតិយើង។ អ៊ីចឹងចំណុចនេះគួរតែគិតគូរធ្វើយ៉ាងណាកុំឱ្យប៉ះពាល់ពួកគាត់ច្រើនពេក»។
បើតាមរបាយការណ៍របស់ក្រសួងមហាផ្ទៃ សេចក្ដីព្រាងច្បាប់ថ្មីនេះមានគោលបំណងគ្រប់គ្រងជនបរទេសគ្រប់រូបនៅក្នុងព្រះរាជាណាចក្រកម្ពុជា ដោយកំណត់អំពីវិធាន និងលក្ខខណ្ឌសម្រាប់អនុវត្តចំពោះជនបរទេសដែលចូល-ចេញ ឆ្លងកាត់ និងស្នាក់នៅប្រទេសកម្ពុជា។ កិច្ចប្រជុំអន្ដរក្រសួងកាលពីថ្ងៃទី ១២ ខែមករា គឺជាកិច្ចប្រជុំលើកទី៥ ដោយពិភាក្សាលើជំពូកទី៣ ។ បើតាមក្រសួងមហាផ្ទៃ សេចក្ដីព្រាងច្បាប់ស្ដីពីអន្ដោប្រវេសន៍ថ្មីនេះមានចំនួន ៩ ជំពូក និង ៥០ មាត្រា៕
