ភ្នំពេញ៖ បុគ្គលណាដែលមិនគោរពដោយចេតនានូវវិធានការរដ្ឋបាល ត្រូវដាក់ទណ្ឌកម្មពិន័យអន្តរការណ៍ជាប្រាក់ពី ១ លានរៀល ទៅ ៥ លានរៀល ដោយមិនគិតដល់បទល្មើសព្រហ្មទណ្ឌដទៃ ដែលការពិន័យនេះ ជាសមត្ថកិច្ចរបស់រដ្ឋបាលថ្នាក់ក្រោមជាតិ។ នេះបើយោងតាមប្រកាសអន្តរក្រសួងរវាងក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ។
សេចក្តីប្រកាសនេះ បានចេញនៅថ្ងៃសុក្រ ទី ០៩ ខែមេសានេះ ដែលត្រូវបានចុះហត្ថលេខាដោយលោក ស ខេង រដ្ឋមន្រ្តីក្រសួងមហាផ្ទៃ និងលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។
លិខិតនេះ បានលើកឡើងថា កម្រិតទឹកប្រាក់សម្រាប់ការដាក់ទណ្ឌកម្មពិន័យអន្តរការណ៍ទៅតាមវិធានការរដ្ឋបាលនីមួយៗ ចំពោះបុគ្គលដែលមិនគោរពដោយចេតនានូវវិធានការរដ្ឋបាល ត្រូវសម្រេចដោយរដ្ឋបាលរាជធានី-ខេត្តនីមួយៗ។
សេចក្តីប្រកាសនេះថា៖ «រដ្ឋបាលថ្នាក់ក្រោមជាតិមានសមត្ថកិច្ចចេញបង្កាន់ដៃពិន័យអន្តរការណ៍ ដើម្បីបង្គាប់ឱ្យបុគ្គលដែលមិនគោរពវិធានការរដ្ឋបាលត្រូវបង់ប្រាក់ពិន័យអន្តរការណ៍ទៅតាមកំហុសដែលខ្លួនបានប្រព្រឹត្ត»។
ប្រភពដដែលបានបញ្ជាក់ថា ចំណូលដែលប្រមូលបានពីការពិន័យចំពោះអំពើមិនគោរពវិធានការរដ្ឋបាល ត្រូវកត់ត្រាជាចំណូលរបស់រដ្ឋបាលរាជធានី-ខេត្ត ហើយរដ្ឋបាលរាជធានី-ខេត្ត ត្រូវរៀបចំគម្រោងចំណូលពីការពិន័យចំពោះអំពើមិនគោរពវិធានការរដ្ឋបាលនេះ ដើម្បីដាក់បញ្ចូលទៅក្នុងគម្រោងថវិកាប្រចាំឆ្នាំរបស់ខ្លួន។
ក្នុងករណីទទួលបានប្រាក់ពិន័យអន្តរការណ៍ដោយផ្ទាល់ជាសាច់ប្រាក់ ឬជាមួលប្បទានបត្រ រដ្ឋបាលថ្នាក់ក្រោមជាតិត្រូវប្រើប្រាស់បង្កាន់ដៃបង់ប្រាក់ដែលបោះពុម្ព និងបើកផ្តល់ដោយក្រសួងសេដ្ឋកិច្ច និងហិរញ្ញវត្ថុ៕