ភ្នំពេញៈ រដ្ឋមន្ដ្រីក្រសួងមហាផ្ទៃលោក ស ខេង បានដឹកនាំកិច្ចប្រជុំ អន្តរក្រសួងស្ដីពីការដោះស្រាយការកកស្ទះសំណុំរឿង និងភាពចង្អៀតណែនក្នុងពន្ធនាគារកាលពីថ្ងៃទី ៨ ឧសភា។ កិច្ចប្រជុំនេះបានស្នើឡើងដោយលោក កើត រិទ្ធ រដ្ឋមន្ដ្រីក្រសួងយុត្តិធម៌ ដើម្បីស្វែងរកការគាំទ្រ និងកិច្ចសហការពីក្រសួងមហាផ្ទៃក្នុងការអនុវត្ដយុទ្ធនាការដោះស្រាយបញ្ហាកកស្ទះដែលគ្រោងប្រកាសអនុវត្ដនៅចុងសប្ដាហ៍នេះផងដែរ។
កិច្ចប្រជុំនេះមានការចូលរួមពីលោក កើត រិទ្ធ រដ្ឋមន្ត្រីក្រសួងយុត្តិធម៌លោក ចាន់ គីមសេង អគ្គនាយកនៃអគ្គនាយកដ្ឋានពន្ធនាគារព្រមទាំងរដ្ឋលេខាធិការ អនុរដ្ឋលេខាធិការ និងអគ្គនាយកនៃក្រសួងមហាផ្ទៃ និងក្រសួងយុត្តិធម៌ជាច្រើនរូបទៀត។
លោក ស ខេង ដែលជាឧបនាយករដ្ឋមន្ត្រីផងនោះថ្លែងក្នុងពេលបើកកិច្ចប្រជុំថា៖ «កិច្ចប្រជុំអន្តរក្រសួងនាថ្ងៃនេះគឺឆ្លើយតបតាមសំណើពីរដ្ឋមន្ត្រីក្រសួងយុត្តិធម៌ពាក់ព័ន្ធនឹងភាពចង្អៀតណែនក្នុងពន្ធនាគារ និងការកកស្ទះសំណុំរឿង។ ក្នុងស្ថានភាពនៃការប្រឈមមុខនឹងវិបត្តិកូវីដ១៩ ថ្វីដ្បិតថាមានបណ្ដាប្រទេសមួយចំនួនបានសម្រេចដោះលែង អ្នកទោសខ្លះប៉ុន្តែនៅកម្ពុជាស្ថានភាពមិនទាន់ឈានដល់ដំណាក់កាលនេះនៅឡើយទេ»។
លោកបន្តថា៖ «យុទ្ធនាការដោះស្រាយការកកស្ទះសំណុំរឿង និងភាពចង្អៀតណែនក្នុងពន្ធនាគារគឺជាកិច្ចការសំខាន់បំផុតមួយរបស់ក្រសួងមហាផ្ទៃ និងក្រសួងយុត្តិធម៌ ទន្ទឹមនឹងយុទ្ធនាការប្រយុទ្ធប្រឆាំងគ្រឿងញៀនខុសច្បាប់។ ប៉ុន្មានឆ្នាំចុងក្រោយនេះ បទល្មើសគ្រឿងញៀនបានស្ថិតក្នុងភាគរយខ្ពស់ជាងគេធៀបនឹងបទល្មើសផ្សេងៗ ដែលបានបញ្ជូនមកតុលាការ ខណៈបទល្មើសនេះក៏មិនត្រូវបានអនុញ្ញាតឲ្យស្នើសុំលើកលែង និងបន្ធូរបន្ថយទោសដែរ»។
លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្ដិធម៌ថ្លែងថ្ងៃទី ១០ ឧសភា ថាកិច្ចប្រជុំជាមួយក្រសួងមហាផ្ទៃកាលពីថ្ងៃសុក្រគឺដើម្បីស្វែងរកការគាំទ្រ និងការសហការពីក្រសួងមហាផ្ទៃក្នុងការអនុវត្ដយុទ្ធនាការស្ដីពីការដោះស្រាយការកកស្ទះសំណុំរឿង និងភាពចង្អៀតណែនក្នុងពន្ធនាគារ។
លោកថ្លែងថា៖ «យុទ្ធនាការនេះនឹងដាក់ចេញប្រកាសជាសាធារណៈនៅចុងសប្ដាហ៍នេះ។ អ៊ីចឹងមុននឹងដាក់ចេញឲ្យអនុវត្ដទូទាំងប្រទេសគឺក្រសួងយុត្ដិធម៌បានជួបជាមួយគ្រប់ភាគីពាក់ព័ន្ធទាំងអស់រួមមានគណៈមេធាវី មេធាវីសម្ដេចតេជោ តុលាការទូទាំងប្រទេស និងគ្រប់ជាន់ថ្នាក់រួមនឹងតុលាការកំពូល ដើម្បីសុំការគាំទ្រ និងកិច្ចសហការ»។
លោក ជិន ម៉ាលីន បញ្ជាក់ថា នៅពេលដែលយុទ្ធនាការនេះប្រកាសជាសាធារណៈនឹងបង្ហាញតែម្ដងថាតើយុទ្ធនាការនេះត្រូវការរយៈពេលប៉ុន្មាន មានវិធានការ និងយន្តការអ្វីខ្លះ ផែនការអ្វីខ្លះ អ្នកណាខ្លះជាអ្នកអនុវត្តហើយត្រូវការការចូលរួមពីភាគីណាខ្លះ និងលទ្ធផលរំពឹងទុកយ៉ាងដូចម្ដេចខ្លះជាដើម។
លោក ចាន់ គីមសេង អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃបដិសេធធ្វើអត្ថាធិប្បាយបន្ថែមជុំវិញរឿងនេះកាលពីថ្ងៃទី ១០ ឧសភា ដោយប្រាប់ឲ្យទាក់ទងទៅអ្នកនាំពាក្យក្រសួងមហាផ្ទៃ លោក ខៀវ សុភ័គ ដែលមិនអាចទាក់ទងបានដោយទូរស័ព្ទគ្មានអ្នកទទួល។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃប្រាប់ភ្នំពេញប៉ុស្ដិ៍កាលពីសប្ដាហ៍មុនថា បច្ចុប្បន្នទណ្ឌិតកំពុងជាប់ឃុំក្នុងពន្ធនាគារទូទាំងប្រទេសជិត ៤ ម៉ឺននាក់ ដែលទណ្ឌិតភាគច្រើនជាប់ឃុំក្នុងបទល្មើសគ្រឿងញៀន។
លោកថ្លែងថា ក្នុងការដោះស្រាយភាពចង្អៀតណែនក្នុងពន្ធនាគារ តុលាការគួរពន្លឿនការកាត់ទោស និងជម្រះក្ដីក្នុងចំណោមជនជាប់ឃុំនេះឲ្យមានសាលក្រមស្ថាពរយ៉ាងតិច ៥០ ភាគរយនោះ វិស័យ ការអប់រំកែប្រែនឹងមានការប្រែប្រួលជាងមុន លែងមានភាពកកស្ទះក្នុងពន្ធនាគារទៀតហើយ។
លោក ស៊ឹង សែនករុណា មន្ត្រីអង្កេតជាន់ខ្ពស់នៃសមាគមការពារ សិទ្ធិមនុស្សអាដហុកនៅតែលើកឡើងថា បើពិនិត្យមើលទៅលើនីតិវិធីច្បាប់ចាប់តាំងពីមន្ដ្រីយុត្ដិធម៌ចាប់ផ្ដើមអនុវត្ដច្បាប់តែម្ដងគឺរាល់បទល្មើសដែលស្រាលៗមិនគួរជ្រើសរើសយកមធ្យោបាយឃុំខ្លួននោះទេ ព្រោះសំណុំរឿងនិង ពន្ធនាគារកំពុងមានការកកស្ទះ។
លោក ករុណា ថ្លែងថា៖ «មួយទៀតនោះ គឺគួរតែមានការពិនិត្យនៅក្នុងពន្ធនាគារផងដែរថាតើឥរិយាបថអ្នកទោសដែលពួកគាត់មានការកែប្រែខ្លួន មានឆន្ទៈខ្លួនគាត់ដោយយល់ពីកំហុសខ្លួន គួរតែមានការពិចារណាឲ្យពួកគាត់ទទួលបានឱកាសក្នុងការលើកលែងទោស និងបន្ធូរបន្ថយទោសផងដែរ»៕