ភ្នំពេញៈ ក្រោយកិច្ចប្រជុំអន្ដរក្រសួងពិនិត្យលើសេចក្ដីព្រាងច្បាប់ស្ដីពីសិទ្ធិទទួលព័ត៌មានដឹកនាំដោយលោក ខៀវ កាញារីទ្ធ រដ្ឋមន្ដ្រីក្រសួងព័ត៌មានកាលពីម្សិលមិញ បានសម្រេចឯកភាពគ្នាទៅលើជំពូកទី ១ ក្នុងចំណោម ៩ ជំពូកនៃច្បាប់នេះខណៈការតាក់តែងធ្វើឡើងតាំងពីច្រើនឆ្នាំមកហើយ។
សេចក្ដីព្រាងច្បាប់សិទ្ធិទទួលព័ត៌មានដែលមាន ៩ ជំពូក ចែកចេញជា ៣៨ មាត្រានេះ ត្រូវបានដឹកនាំរៀបចំតាក់តែងដោយក្រសួងព័ត៌មានដោយមានការចូលរួមពីតំណាងសង្គមស៊ីវិល អង្គការយូណេស្កូ ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជានិងក្លិបអ្នកកាសែតកម្ពុជាដែលបានចំណាយពេលច្រើនឆ្នាំមកហើយក្រោមការគាំទ្រថវិកាពីអង្គការយូណេស្កូ។
លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា លទ្ធផលនៃកិច្ចប្រជុំពិនិត្យលើសេចក្ដីព្រាងច្បាប់ស្ដីពីសិទ្ធិទទួលបានព័ត៌មាននេះគឺបានទទួលលទ្ធផលល្អនិងបានសម្រេចនូវជំពូក ១ រួចហើយ។
លោកបន្ដថា៖ «យើងបានសម្រេចទៅលើជំពូក ១ រួចហើយ គណៈកម្មការយើងបានកំណត់នូវថ្ងៃប្រជុំជាបន្ដបន្ទាប់ទៀត នៅក្នុងពេលវេលាមួយដែលសមស្រប»។
លោកបញ្ជាក់ថា៖ «ព្រឹកមិញនេះ វាជាសញ្ញាមួយដែលល្អដោយសារក្រសួងនិងស្ថាប័នពាក់ព័ន្ធសំខាន់បានឈានដល់ការឯកភាពគ្នានៅក្នុងការសម្រេចបាននូវការអនុម័តទៅលើសេចក្ដីព្រាងច្បាប់យើងនូវជំពូកទី ១ រួចហើយ»។
បើតាមលោក មាស សុភ័ណ្ឌ កិច្ចការងារបន្ទាប់លើការតាក់តែងសេចក្ដីព្រាងច្បាប់នេះ ក្រសួងព័ត៌មានបានជ្រើសរើសនូវនីតិវិធីពន្លឿនដោយជំហានទី ១ នៅក្នុងកិច្ចពិភាក្សាអន្ដរក្រសួងនេះគឺអញ្ជើញក្រសួងសំខាន់ៗដែលពាក់ព័ន្ធខ្លាំងទៅនឹងសេចក្ដីព្រាងច្បាប់នេះមកពិភាក្សាមុន។
ទាក់ទងនឹងការសម្រេចជាផ្លូវការនៃច្បាប់នេះត្រង់ជំពូក ១ លោក សុភ័ណ្ឌ បានឲ្យដឹងថា៖ «នៅក្នុងជំពូក ១ នេះ យើងកំណត់ថា បុគ្គលគ្រប់រូបមានសិទ្ធិសេរីភាពក្នុងការទទួលបានព័ត៌មាន។ដោយច្បាប់នៅជំពូកនេះ បានចែងពីភារកិច្ចដែលស្ថាប័នសាធារណៈធានាត្រូវផ្ដល់ និងធ្វើការផ្សព្វផ្សាយព័ត៌មានជាសាធារណៈជាដើម»។
លោក ប៉ែន បូណា ប្រធានក្លិបអ្នកកាសែតកម្ពុជា (CCJ) បានលើកឡើងថា តាមរយៈលទ្ធផលនៃការប្រជុំអន្ដរក្រសួងបែបនេះ បានបញ្ជាក់ដំណើរការនៃច្បាប់សិទ្ធិទទួលព័ត៌មាននេះ កាន់តែទៅមុខលឿនហើយ ដោយដំណាក់កាលបន្ដបន្ទាប់ទៀតនិងឈានដល់កិច្ចប្រជុំគណៈរដ្ឋមន្ដ្រីសម្រេច និងបញ្ជូនទៅសភាដើម្បីអនុម័ត។
លោកបន្ដថា៖ «ជាសញ្ញាល្អមួយដែលយើងឃើញថា ច្បាប់នេះបានដំណើរការទៅមុខហើយ។ច្បាប់នេះសំខាន់សម្រាប់ប្រជាពលដ្ឋទូទៅក៏ដូចជាយើងជាអ្នកសារព័ត៌មានត្រង់ថាវានឹងជាច្បាប់មួយដែលកំណត់ឲ្យអាជ្ញាធរត្រូវផ្ដល់ព័ត៌មានទៅតាមការស្នើសុំ និងឆ្លើយតបទៅតាមការកំណត់មួយដែលអ្នកស្នើសុំចង់បានដែលពីមុនយើងអត់មានពេលយើងសុំព័ត៌មាន គេឲ្យមិនឲ្យស្រេចតែគេ»។
លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា (UJFC) បានសាទរចំពោះការសម្រេចបានរបស់ក្រសួងព័ត៌មាន ជាមួយក្រសួង និងស្ថាប័ន្ធពាក់ព័ន្ធជុំវិញការអនុម័តការតាក់តែងច្បាប់សិទ្ធិទទួលព័ត៌មាននេះ។
លោកថា៖ «ក្រសួងបានតាក់តែងច្បាប់មួយដែលមានប្រយោជន៍ទាំងសងខាងជាពិសេសធានាបាននូវសិទ្ធិទទួលបានព័ត៌មាននៃអ្នកសារព័ត៌មាន ដើម្បីធ្វើកិច្ចការងាររបស់ខ្លួនបម្រើទៅមហាជន ប៉ុន្ដែខ្ញុំជឿថា ច្បាប់មួយហើយ លើសពីច្បាប់គឺឆន្ទៈនយោបាយរបស់ស្ថាប័ននីមួយៗក្រោមចំណុះរបស់រាជរដ្ឋាភិបាល គឺសំខាន់បន្ថែមទៀតជាមួយនឹងច្បាប់នេះ»។
លោក ខៀវ កាញារីទ្ធ រដ្ឋមន្ដ្រីក្រសួងព័ត៌មានថ្លែងថា ច្បាប់ស្តីពីសិទ្ធិទទួលព័ត៌មានត្រូវបានរាជរដ្ឋាភិបាលប្រគល់ភារកិច្ចឱ្យក្រសួងព័ត៌មានកាលពីខែវិច្ឆិកាឆ្នាំ ២០១៣ កន្លងមកដើម្បី ដឹកនាំវេទិកាពិគ្រោះយោបល់ជាមួយអ្នកសារព័ត៌មាន អង្គការសង្គមស៊ីវិលនិងក្រសួងស្ថាប័នពាក់ព័ន្ធ ដើម្បីរៀបចំ តាក់តែងសេចក្តីព្រាងច្បាប់ស្តីពីសិទ្ធិទទួលព័ត៌មាននេះ។
លោកបានបញ្ជាក់ថាបន្ទាប់មកនៅក្នុងខែ កុម្ភៈ ឆ្នាំ ២០១៥ ក្រសួងព័ត៌មានបានសហការជាមួយ អង្គការយូណេស្កូ ប្រចាំកម្ពុជាដោយបានបង្កើតក្រុមការងារបច្ចេកទេសហៅកាត់ថា (TWGA2I) សម្រាប់កិច្ចពិភាក្សាកែសម្រួលសេចក្តីព្រាងច្បាប់នេះដែលក្រុមការងារបច្ចេកទេសនេះទើបតែបញ្ចប់កាលពីពេលឆ្នាំ ២០១៨ កន្លងទៅនេះដែរ៕