.jpg)
កិច្ចប្រជុំអន្តរក្រសួងក្នុងការចេញប័ណ្ណបើកបរដល់ជនពិការភាព។ រូបថត ក្រសួងសង្គមកិច្ច
ភ្នំពេញៈ លោក ឈួន វន់ អគ្គនាយកដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូនបានឲ្យដឹងកាលពីម្សិលមិញថា អន្តរក្រសួងបានបញ្ចប់កិច្ចប្រជុំពិភាក្សាលើសេចក្តីព្រាងប្រកាសស្តីពីលក្ខខណ្ឌនៃការចេញបណ្ណបើកបរសម្រាប់ជនមានពិការភាពនឹងបញ្ជូនទៅថ្នាក់ដឹកនាំសម្រេចចុងក្រោយដើម្បីសម្រេចប្រកាសឱ្យប្រើប្រាស់ក្នុងពេលឆាប់ៗ។
លោក ឈួន វន់ បានថ្លែងថា កាលពីថ្ងៃសុក្រទី ១៧ ខែកក្កដា មន្ដ្រីជំនាញតំណាង ក្រសួងសាធារណការ និងដឹកជញ្ជូន ក្រសួងសុខាភិបាល និងក្រសួងសង្គមកិច្ចអតីតយុទ្ធជន និងយុវនីតិសម្បទាបានបញ្ចប់កិច្ចប្រជុំ ពិភាក្សា និងបានឯកភាពគ្នាទាំងស្រុងលើសេចក្ដីប្រកាសស្តីពីលក្ខខណ្ឌនៃការចេញបណ្ណបើកបរសម្រាប់ជនមានពិការភាពនៅក្នុងប្រទេស។
លោកបានថ្លែងថា៖ «យើងបានឯកភាពគ្នាហើយលើសេចក្ដីព្រាងនេះរួចនឹងដាក់ជូនថ្នាក់ដឹកនាំសម្រេចក្នុងពេលឆាប់ៗនេះ។ ខ្ញុំមិនទាន់អាចកំណត់ថា នឹងដាក់សេចក្ដីព្រាងនេះទៅថ្នាក់ដឹកនាំក្នុងពេលណាបានទេ ប៉ុន្តែគឺនៅក្នុងពេលឆាប់ៗនេះហើយ»។
លោក ឈួន វន់ បានឲ្យដឹងទៀតថា លក្ខខណ្ឌនៃការចេញបណ្ណបើកបរសម្រាប់ជនមានពិការភាពនេះមិនមានភាពខុសប្លែកគ្នាពីបណ្ណបើកបរផ្សេងៗទេ គឺជនមានពិការភាព ពេលចង់ធ្វើបណ្ណបើកបរត្រូវភ្ជាប់មកជាមួយឯកសារពាក់ព័ន្ធមានដូចជាអត្តសញ្ញាណប័ណ្ណជាដើម។
លោកបញ្ជាក់ថា៖ «យើងត្រូវមើលទៅលើកាយសម្បទារបស់គាត់។ មានន័យថា តើជនមានពិការភាពដែលចង់ធ្វើបណ្ណបើកបរនោះ តើគាត់អាចបើកបរយានយន្តប្រភេទណាបានជាដើម»។
លោកថ្លែងថាតាមសេចក្ដីព្រាងនៃប្រកាសនេះបញ្ជាក់ដែរថា បើជនមានពិការភាពនោះអាចបើកយានយន្តបានធម្មតានោះក្រសួងនឹងអនុញ្ញាតឱ្យពួកគាត់ប្រឡងយកបណ្ណបើកបរដូចប្រជាពលរដ្ឋដែរ មិនមានលក្ខខណ្ឌអ្វីច្រើនទេ។
លោក ឈួន វន់ បានឱ្យដឹងថា សេចក្តីព្រាងប្រកាសអន្តរក្រសួងនេះមានគោលបំណងលើកកម្ពស់សិទ្ធិជនមានពិការភាពដែលមានសមត្ថភាពអាចបើកបរយានយន្តនៅក្នុងព្រះរាជាណាចក្រកម្ពុជា។ ប្រកាសនេះមានគោលដៅកំណត់លក្ខខណ្ឌនៃការចេញបណ្ណបើកបរសម្រាប់ជនមានពិការភាព ដែលអនុញ្ញាតឱ្យបើកបរ ប្រភេទយានយន្តសម្រាប់ជនមានពិការភាពបើកបរបាន និងផ្នែកនៃយានយន្តដែលត្រូវកែច្នៃ។
លោកស្រី លឹម សុខជា ទីប្រឹក្សាជាន់ខ្ពស់ អង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោកបានឲ្យដឹងថា អង្គការសង្គមស៊ីវិលធ្វើការងារលើសុវត្ថិភាពចរាចរណ៍ផ្លូវគោក តែងតែជំរុញដល់រដ្ឋាភិបាលក្នុងការលើកទឹកចិត្ដដើម្បីចេញបណ្ណបើកបរដល់ពួកគាត់ដែរនាពេលកន្លងមក។
ឥឡូវនេះ បើសិនជាអន្តរក្រសួងបានសម្រេចអនុញ្ញាតចេញបណ្ណបើកបរដល់ជនមានពិការភាព និងជនមិនចេះអក្សរនេះ វាគឺជារឿងល្អណាស់ ព្រោះប្រទេសក្នុងតំបន់អាស៊ី និងពិភពលោក គេតែងតែមានការលើកទឹកចិត្ដបែបនេះ។
លោកស្រីអំពាវនាវដល់ក្រសួងគួរធ្វើការកំណត់លក្ខខណ្ឌក្នុងការប្រើប្រាស់យានយន្តដល់ជនមានពិការភាពឱ្យបានច្បាស់លាស់។ លោកស្រីថ្លែងថា៖ «ខ្ញុំសូមឱ្យយានយន្តដែលជនពិការប្រើប្រាស់ទាំងអស់ត្រូវឆ្លងកាត់ការទទួលស្គាល់ដោយក្រសួងសាធារណការតាមលក្ខណៈស្ដង់ដាជាតិរបស់គាត់ មិនមែនគ្រាន់តែចេញបណ្ណឱ្យគាត់ហើយចប់នោះទេ គឺកំណត់យានយន្តពិសេសសម្រាប់ពួកគាត់ហើយឱ្យពួកគាត់ប្រឡងយកបណ្ណបើកបរលើយានយន្តនោះ»៕
