ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទាកាលពីថ្ងៃទី ១៥ មិថុនា បានបើកកិច្ចប្រជុំជាមួយអន្តរក្រសួង និងអ្នកពាក់ព័ន្ធជាលើកទី ៣ ដើម្បីពិភាក្សាពីការកំណត់អត្តសញ្ញាណកម្មជនមានពិការភាពដែលមន្ត្រីអះអាងថានឹងផ្តល់អត្ថប្រយោជន៍ជាច្រើនដល់ជនមានពិការភាពនៅកម្ពុជា។
លោក ញ៉ឹក វណ្ណារ៉ា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ប្រាប់ភ្នំពេញប៉ុស្តិ៍កាលពីថ្ងៃទី ១៥ មិថុនា ថា កិច្ចប្រជុំដែលធ្វើឡើងនាទីស្ដីការក្រសួងនេះ គឺជាកិច្ចប្រជុំលើកទី ៣ ជាមួយអន្តរក្រសួងបន្ទាប់ពីបានប្រជុំពិភាក្សាជាលក្ខណៈមន្ត្រីបច្ចេកទេសចំនួន ២ លើករួចមកហើយ។
លោកបន្តថា កិច្ចប្រជុំនេះគឺដើម្បីប្រមូលធាតុចូលពីក្រសួងពាក់ព័ន្ធ ព្រោះករណីកំណត់អត្តសញ្ញាណកម្មជនមានពិការភាពត្រូវការការចូលរួមពីក្រសួងផ្សេងៗក្នុងការបំពេញបន្ថែមនូវចំណុចខ្វះខាត។
លោកបានបញ្ជាក់ថា៖ «ជាលទ្ធផលអន្តរក្រសួងបានផ្តល់ធាតុចូលច្រើន យើងនឹងរៀបចំរបាយការណ៍ចុងក្រោយដើម្បីដាក់ចូលទៅថ្នាក់ដឹកនាំឯកឧត្តមរដ្ឋមន្ត្រី ហើយ និងក្រសួងពាក់ព័ន្ធដែលអាចពិភាក្សាគ្នាថា តើយើងនឹងត្រូវអនុវត្តរបៀបម៉េច។ ព្រោះកិច្ចការងារនេះមិនមែនមានតែក្រសួងសង្គមកិច្ចទេ គឺមានក្រសួងផ្សេងទៀតដែលមានតួនាទីចូលរួមអនុវត្តលើកិច្ចការកំណត់អត្តសញ្ញាណកម្មជនមានពិការភាពនេះ»។
លោក ញ៉ឹក វណ្ណារ៉ា លើកឡើងថា ការកំណត់អត្តសញ្ញាណជនមានពិការភាពនេះនឹងផ្តល់ផលប្រយោជន៍ជាច្រើនទៅដល់ជនមានពិការភាពទូទាំងប្រទេសតាមរយៈការចេញបណ្ណដល់ជនមានពិការភាព ដែលអាចនឹងទទួលបានផលប្រយោជន៍ពីរដ្ឋ និងវិស័យឯកជន។
លោកថ្លែងថា៖ «ដោយសារតែពេលហ្នឹងយើងមានចេញបណ្ណជូនគាត់ ហើយបណ្ណនេះ គាត់អាចទទួលបានប្រយោជន៍ជារបបគោលនយោបាយតាមលក្ខណៈវិនិច្ឆ័យនៃពិការភាព និងភាពក្រីក្ររបស់គាត់។ គាត់ក៏អាចទទួលបានជាសិទ្ធិអាទិភាពទទួលការងារពីរដ្ឋចំនួន ២ ភាគរយ និងពីវិស័យឯកជន ១ ភាគរយ។ ម្យ៉ាងទៀតការធ្វើដំណើរលើសេវាសាធារណៈនឹងទទួលបានដោយឥតគិតថ្លៃ រួមទាំងការពិនិត្យសុខភាពនៅតាមមូលដ្ឋានសាធារណៈ រួមទាំងសេវាផ្សេងៗទៀត»។
បើតាមលោក វណ្ណារ៉ា រដ្ឋាភិបាលបានកំណត់ជនមានពិការភាពជា ៣ ប្រភេទ គឺកម្រិតធ្ងន់ កម្រិតមធ្យម និងកម្រិតស្រាល។ អត្ថប្រយោជន៍នីមួយៗនឹងផ្តល់ជូនដល់ជនពិការទៅតាមកម្រិតដែលទទួលបាន ខណៈការស្នើសុំបណ្ណនេះ អាចធ្វើទៅបានដោយជនពិការខ្លួនឯងផ្ទាល់ ឬអាណាព្យាបាលរបស់ជនពិការនៅពេលគោលការណ៍នេះចេញជាធរមាន។
អ្នកស្រី ជាតិ សុខា ជាជនពិការជិះរទេះបានប្រាប់ភ្នំពេញប៉ុស្តិ៍កាលពីថ្ងៃ ១៥ មិថុនា ថា កន្លងទៅសាធារណជនមួយចំនួនមិនសូវស្គាល់ជនមានពិការភាពផ្នែកសតិបញ្ញាទេ ដោយបានកំណត់តែលើជនមានពិការភាពលើរូបរាងកាយប៉ុណ្ណោះ។
អ្នកស្រីបន្តថា ប្រសិនបើអ្នកស្រី និងជនមានពិការភាពដទៃទៀតទទួលបានការកំណត់អត្តសញ្ញាណមួយពីរដ្ឋនោះអត្ថប្រយោជន៍ផ្សេងៗនឹងអាចទទួលបាន។ ជាពិសេសជនមានពិការភាពមិនមែនលើរូបរាងកាយនឹងមានទំនុកចិត្តជាងមុន។
អ្នកស្រីថា៖ «អ្វីដែលខ្ញុំបានជួបគឺជនពិការមិនទាន់ទទួលបាននូវអ្វីដែលសមស្របតាមតម្រូវការរបស់គាត់នោះទេ។ ជាពិសេសឥរិយាបថមិនសមរម្យមួយចំនួននៅពេលប្រើប្រាស់សេវាអ្វី ហើយសំណង់អគារក៏មិនទាន់សមស្របសម្រាប់ជនមានពិការភាព [សម្រាប់បំផ្លាស់ទី]ដែរ ហើយពិបាកទទួលយក។ ខ្ញុំរំពឹងថា គោលការណ៍នេះនឹងជួយដល់ពួកយើងបានប្រសើរជាងមុន»។
លោក ចាន់ សារិន នាយកប្រតិបត្តិអង្គការជំនួយនៃក្តីសង្ឃឹមសម្រាប់សហគមន៍ប្រាប់ភ្នំពេញប៉ុស្តិ៍កាលពីថ្ងៃ ១៥ មិថុនា ថា ការកំណត់អត្តសញ្ញាណសម្រាប់ជនមានពិការភាពក្នុងនាមកម្ពុជាជារដ្ឋភាគីរបស់អង្គការជនពិការអន្តរជាតិគឺត្រូវតែកំណត់អំពីអត្តសញ្ញាណរបស់ជនពិការក្នុងប្រទេស ខណៈប្រទេសក្នុងតំបន់ ឬអាស៊ានបានធ្វើកិច្ចការនេះរួចអស់ហើយ។
លោកថ្លែងថា៖ «ការកំណត់អត្តសញ្ញាណជនមានពិការភាពអាស្រ័យទៅតាមប្រទេសនីមួយៗដែលមានប្រទេសខ្លះ កំណត់មាន ៤ ប្រភេទ មាន ៦ ប្រភេទ និងមាន ៣ ប្រភេទជាដើមអី។ កាលពីមុនជាធម្មតានៅពេលយើងកំណត់កម្រិតបែបនេះ មានន័យថា កម្រិតធ្ងន់គឺគាត់មិនអាចធ្វើការបានទេ ដែលមានន័យថា អត្ថប្រយោជន៍ដែលយើងនឹងផ្តល់ឲ្យជនពិការកម្រិតធ្ងន់គឺបានច្រើនជាងជនពិការកម្រិតស្រាល»។
តាមការចុះស្រាវជ្រាវរបស់លោក ចាន់ សារិន ឲ្យដឹងថា ក្នុងពេលបច្ចុប្បន្ន ជនមានពិការភាពនៅទូទាំងប្រទេសកម្ពុជាមានជាង ១០ ភាគរយ ដោយរាប់បញ្ចូលទាំងជនមានពិការភាពផ្នែកសតិបញ្ញា និងផ្នែកកាយសម្បទាផងដែរ៕