.jpg)
អាជ្ញាធរចុះពិនិត្យអាចម៍ដីដែលក្រុមហ៊ុនមួយចាក់លុបចូលស្ទឹងសិរីសោភ័ណ។ រូបថត រដ្ឋបាលក្រុងសិរីសោភ័ណ
បន្ទាយមានជ័យ: អភិបាលក្រុងសិរីសោភ័ណ លោក ហ៊ឹល រ៉ាយ៉ា បានបញ្ជាឲ្យក្រុមហ៊ុន តាន់ គីមអេង ត្រូវកាយអាចម៍ដីចេញពីស្ទឹងសិរីសោភ័ណស្ថិតនៅភូមិព្រះពន្លា សង្កាត់ព្រះពន្លាវិញ បន្ទាប់ពីក្រុមហ៊ុនបានដឹកអាចម៍ដីយកទៅចាក់ចូលស្ទឹងប្រមាណជា ១០ ម៉ែត្រ ដើម្បីយកដីធ្វើជាកម្មសិទ្ធិ។
លោក ហ៊ឹល រ៉ាយ៉ា បានប្រាប់ភ្នំពេញប៉ុស្ដិ៍ពីថ្ងៃទី ១ កញ្ញា ថា លោកបានចុះទៅត្រួតពិនិត្យទីតាំងលុបចំណីស្ទឹងសិរីសោភ័ណស្ថិតនៅទីតាំងខាងលើ ដោយមានការចូលរួមពីសំណាក់លោក តាន់ គឹមហួត ប្រធានក្រុមហ៊ុន «តាន់ គីមអេង» ខូ អិល ធី ឌី និងអាជ្ញាធរក្រុងជាច្រើនផងដែរ។
លោកបានបញ្ជាឲ្យក្រុមហ៊ុនត្រូវតែកាយដីដែលចាក់ចូលមាត់ស្ទឹងសិរីសោភ័ណទាំងអស់វិញបន្ទាន់។ លោកបន្តថាលើសពីនេះអាជ្ញាធរត្រូវឃ្លាំមើលសកម្មភាពកាយដីចេញវិញ ដោយរក្សាស្ថានភាពដើមនៃស្ទឹងសិរីសោភ័ណឲ្យនៅដដែល។
លោកអភិបាលក្រុងព្រមានថា លោកនឹងចាត់វិធានការទៅលើបុគ្គល ឬក្រុមហ៊ុនណាដែលហ៊ានចាក់ដីរំលោភលើដីស្ទឹង អូរ បឹង ឬប្រឡាយដែលជាទ្រព្យសម្បត្តិរបស់រដ្ឋដោយគ្មានការលើកលែងឡើយ។
លោកបញ្ជាក់ថា៖ «ក្នុងនាមអាជ្ញាធរគឺយើងបានតម្រូវឲ្យក្រុមហ៊ុនកាយអាចម៍ដីដែលចាក់ចូលស្ទឹងបានប្រមាណ ១០ ម៉ែត្រនោះចេញវិញ ដោយរក្សាស្ថានភាពដើមនៃស្ទឹងសិរីសោភ័ណដូចដើម ព្រោះយើងមិនអនុញ្ញាតឲ្យមានការចាក់ដីលុប ឬអភិវឌ្ឍនៅតាមមាត់ស្ទឹងហ្នឹងទេ។ កន្លែងដែលចាក់ដីចូលហ្នឹងគឺដីពយចូលស្ទឹង ហើយក្រុមហ៊ុនយកគ្រឿងចក្រទៅឈូសដីពយហ្នឹង ហើយចាក់ដីចូលស្ទឹងថែមតិចតួចទៀត អ៊ីចឹងយើងតម្រូវឲ្យកាយដីចាក់ហ្នឹងមកវិញ»។
លោក ហ៊ឹល រ៉ាយ៉ា បន្ថែមថា រាល់សកម្មភាពកាយដីក្រោមរូបភាពស្តារ ឬអភិវឌ្ឍអ្វីមួយដែលយកឈ្មោះថ្នាក់ដឹកនាំណាម្នាក់មកប្រើដោយគ្មានលិខិត ឬច្បាប់អនុញ្ញាតត្រឹមត្រូវ លោកនឹងមានវិធានការ ដោយមិនបណ្តែតបណ្តោយឲ្យមានសកម្មភាពកាយដី ឬចាក់ដីលុបប្រភពទឹកធម្មជាតិបែបអនាធិបតេយ្យនោះទេ។ រាល់ការកាយដីស្តារស្ទឹង អាងទឹក បឹង ឬត្រពាំងត្រូវមានការសុំអនុញ្ញាតឲ្យបានត្រឹមត្រូវ ទើបអនុញ្ញាតឲ្យដំណើរការសកម្មភាព។
លោក មុំ ប៊ុណ្ណា ចៅសង្កាត់ព្រះពន្លា បានថ្លែងពីថ្ងៃទី ១ កញ្ញាថា ក្រុមហ៊ុន «តាន់ គីមអេង» ខូ អិល ធី ឌី ពិតជាបានចាក់ដីលុបស្ទឹងសិរីសោភ័ណមែន ដោយក្រុមហ៊ុនបានលុបប្រមាណជិត ១០ ម៉ែត្រ ប៉ុន្ដែអាជ្ញាធរបានចុះត្រួតពិនិត្យ និងតម្រូវឲ្យក្រុមហ៊ុនត្រូវតែកាយអាចម៍ដីចេញមកវិញ និងរក្សាភាពដើមនៃស្ទឹងនេះ។
លោកបញ្ជាក់ថា៖ «ខ្ញុំបានជូនដំណឹងទៅគាត់ហើយ គឺទីតាំងស្ទឹងនេះជារបស់រដ្ឋ អ៊ីចឹងពលរដ្ឋនៅតំបន់នោះអាស្រ័យផល ប្រើប្រាស់ទឹក និងកន្លែងរំដោះទឹក ក៏ដូចជា សម្រាប់ស្ដុកទឹកជាដើម។ ប្រសិនបើលុបស្ទឹង គឺនឹងមានទឹកជំនន់នៅតំបន់ហ្នឹង ហើយប្រជាពលរដ្ឋក៏គ្មានទឹកប្រើប្រាស់ដែរ»។
លោក ហេង វុទ្ធី មេការក្រុមហ៊ុន «តាន់ គីមអេង» ដែលជាអ្នកមើលការខុសត្រូវការចាក់ដីចូលស្ទឹងសិរីសោភ័ណបានឲ្យដឹងពីម្សិលមិញថា ក្រុមហ៊ុនលោកបានយល់ព្រមតាមការលើកឡើងរបស់អាជ្ញាធរហើយ ដោយលោកនឹងយកគ្រឿងចក្រទៅកាយដីចេញពីមាត់ស្ទឹងវិញ និងធ្វើឲ្យដូចស្ថានភាពដើមវិញទៅតាមការកំណត់របស់អាជ្ញាធរក្រុង។ លោកបន្តថា ក្រុមហ៊ុនលោកបានឈូសឆាយដីចម្ការរបស់ខ្លួន ដែលនៅក្បែរនោះ ប៉ុន្ដែអ្នកបើកបររថយន្តដឹកដីមិនបានដឹងពីព្រំដីច្បាស់លាស់ទើបពួកគេចាក់ដីចូលស្ទឹងនោះ។
លោក វុទ្ធី បញ្ជាក់ថា៖ «បច្ចុប្បន្ន នេះយើងកំពុងកាយចេញវិញបណ្ដើរៗហើយ តែប៉ុន្មានថ្ងៃនេះមានភ្លៀងធ្វើឲ្យពិបាកក្នុងការកាយអាចម៍ដីចេញមកវិញ ព្រោះក្រុមហ៊ុនបានឯកភាពជាមួយអាជ្ញាធរហើយ។ អ៊ីចឹងទោះយ៉ាងណា ពួកខ្ញុំនឹងកាយចេញវិញ ប៉ុន្ដែខ្ញុំមិនទាន់ដឹងថា យើងកាយដីហ្នឹងអស់វិញនៅពេលណាទេ ចាំមើលស្ថានភាពជាក់ស្ដែងសិន»៕
