ភ្នំពេញៈ លោក ឃួង ស្រេង អភិបាលរាជធានីភ្នំពេញ បញ្ជាជាថ្មីទៅដល់អាជ្ញាធរខណ្ឌ និងក្រុមហ៊ុនសិនជូរីគ្រុប ហាមដេញក្រុមអាជីវករដែលបន្តលក់ដូរតាមដងផ្លូវជុំវិញផ្សារសិនជូរីផ្លាហ្សា រហូតទាល់តែអាចស្វែងរក ទីតាំងថ្មីឲ្យពួកគាត់ បន្ទាប់ពីមានការតវ៉ាពីក្រុមអាជីវករកាលពីថ្ងៃអង្គារ ក្រោយពីមន្ត្រីផ្សារហាមមិនឲ្យលក់ដូរ។
ការប្រកាសដាក់បញ្ជាជាថ្មីនេះបានធ្វើឡើងកាលពីថ្ងៃទី ២៧ វិច្ឆិកា នៅក្នុងពិធីបញ្ចុះបឋមសិលាសាងសង់ផ្សារទំនើបស៊ិនជូរីផ្លាហ្សាដែលស្ថិតក្នុងសង្កាត់កាកាបទី ១ ខណ្ឌពោធិ៍សែនជ័យ រាជធានីភ្នំពេញ។
កាលពីថ្ងៃអង្គារក្រុមអាជីវករលក់ដូរតាមចិញ្ចើមថ្នល់ និងដងផ្លូវនៅម្ដុំផ្សារសិនជូរីផ្លាហ្សា (Century Plaza) បាននាំគ្នាតវ៉ាដោយសារតែទីតាំងដាក់គ្រែ និងចតរទេះលក់ដូររបស់ពួកគាត់ត្រូវបានម្ចាស់ផ្សារឈូសឆាយ និងហាមពួកគាត់មិនឲ្យលក់ដូរ។ ប៉ុន្តែការតវ៉ានេះក៏បានស្ងប់ស្ងាត់ទៅវិញ បន្ទាប់ពីមានការសម្របសម្រួលពីអាជ្ញាធរ។
លោក ឃួង ស្រេង បានថ្លែងក្នុងឱកាសនោះថា ការអភិវឌ្ឍផ្សារនេះឲ្យក្លាយជាផ្សារទំនើប ដោយសារមើលឃើញពីបញ្ហាប្រឈមមួយចំនួនរបស់បងប្អូនអាជីវករកំពុងជួបប្រទះ។ ក្នុងនោះមានដូចជាបញ្ហាសណ្តាប់ធ្នាប់សាធារណៈ សុវត្ថិភាព អគ្គិភ័យ កង្វះអនាម័យ អគារចាស់ទ្រុឌទ្រោម និងទីតាំងអាជីវកម្មមានទំហំមិនសមាមាត្រទៅនឹងតម្រូវការទីផ្សារនាពេលបច្ចុប្បន្ន។
ជាមួយនឹងការបង្ហាញអំពីមោទនភាព និងភាពជឿជាក់ក្នុងក្តីរំពឹងទុកថា ផ្សារនេះមានការវិនិយោគពិតប្រាកដដែលចូលរួមលើកមុខមាត់ប្រទេសជាតិ និងទទួលបានការស្វាគមន៍ពីប្រជាពលរដ្ឋនោះ លោក ឃួង ស្រេង បានបញ្ជាជាថ្មី ទៅកាន់ក្រុមហ៊ុន និងអាជ្ញាធរថ្នាក់ក្រោមហាមដេញអាជីវករ។
លោកបញ្ជាក់ថា៖ «សូមបងប្អូន អាជីវករទាំងអស់កុំមានការព្រួយបារម្ភនៅលើបញ្ហានេះ។ បញ្ហានេះខ្ញុំសុំរំឭកជូនទៅដល់តំណាងក្រុមហ៊ុន និងអាជីវករផ្សាររបស់យើងដែលមានការប្រជុំជាមួយខ្ញុំ និងមានកំណត់ហេតុច្បាស់លាស់។ នៅក្នុងផ្សារនេះមានប្រភេទអាជីវករ ៣ ប្រភេទ។ ប្រភេទទី ១ គឺ អាជីវករដែលលក់ក្នុងផ្សាររដ្ឋ មាន ៣៥០ តូប។ ប្រភេទទី ២ ផ្សារឯកជនដែលមានអាជីវករ ៣២៩ តូប និងទី ៣ ជាអ្នកនៅលក់ជុំវិញផ្សារ»។
លោកបន្ថែមថា៖ «កាលពី (ថ្ងៃអង្គារ) មានបញ្ហាបន្តិចបន្តួច ដែលជាបញ្ហាបច្ចេកទេស ហើយក៏សុំឲ្យក្រុមហ៊ុនសិនជូរីគ្រុបពិនិត្យរឿងនេះឡើងវិញ កុំឲ្យមានការប៉ះពាល់ដល់គាត់។ ព្រោះយើងបានប្រជុំគ្នាហើយក្នុងរដ្ឋបាលរាជធានីភ្នំពេញថា អ្នកលក់នៅលើផ្លូវនេះ គឺរដ្ឋបាលរាជធានីភ្នំពេញ មិនដេញគាត់ទេ ល្គឹកណារដ្ឋបាលរាជធានីភ្នំពេញរកទីតាំងជូនគាត់លក់បានហើយធ្វើការផ្លាស់ប្តូរគាត់។ នេះគឺជាកិច្ចសន្យាមួយដែលធ្វើឲ្យគាត់បានប្រកបមុខរបរអាជីវកម្មរបស់គាត់ដើម្បីទ្រទ្រង់ជីវភាពប្រចាំថ្ងៃរបស់គាត់បន្តទៅទៀត»។
ចំណែកការផ្លាស់ប្តូរអាជីវករផ្សារទៅលក់ដូរនៅសួនច្បារដែលជាទីតាំងបណ្តោះអាសន្ន លោកបញ្ជាក់ដែរថា កិច្ចការរើទាំងអស់ទាំងការសាងសង់តូប និងការតបណ្តាញនានា គឺជាបន្ទុករបស់ក្រុមហ៊ុនដែលត្រូវទទួលខុសត្រូវលើកិច្ចការងារទាំងនេះ និងហាមដាច់ខាតការយកលុយពីក្រុមអាជីវករ។
លោក ជិន ឌឿន អាជីវករផ្សារបង្ហាញការសាទរចំពោះការបញ្ជាក់ជាថ្មីទៀតរបស់លោក ឃួង ស្រេង ដែលបានបង្ហាញពីការតាំងចិត្តខ្ពស់ដូចអ្វីដែលបានសន្យាកាលពីមុនក្នុងការអភិវឌ្ឍផ្សារនេះ ដោយមិនធ្វើឲ្យប៉ះពាល់ដល់មុខរបរ និងបណ្តេញអាជីវករនៅផ្សារសិនជូរីផ្លាហ្សាដោយបង្ខំ។
លោកបន្ថែមថា៖ «យើងសង្ឃឹម ទុកចិត្តទាំងស្រុង ព្រោះតែយើងជាអាជីវករខ្លះសង្ឃឹមបំផុតថ្នាក់ដឹកនាំរបស់យើង និងគោរពបទបញ្ជា និងអ្វីដែលគាត់បានមានប្រសាសន៍ចំពោះអាជីវករនៅក្នុងផ្សារហ្នឹងថា នឹងជួយដល់អាជីវករយើងឲ្យរក្សាការលក់ដដែល។ បើដូចអ្វីដែលគាត់និយាយនេះគឺពួកយើងខ្ញុំនឹងមានទំនុកចិត្ត និងសប្បាយចិត្ត»។
ជាមួយនឹងការសាទរនេះ លោកក៏នៅតែមានការព្រួយបារម្ភផងដែរ ដោយនិយាយថា៖ «ដោយសារក្រុមហ៊ុនដែលបានសាងសង់ហ្នឹងទាល់តែមានការការពារពីសំណាក់រាជរដ្ឋាភិបាល (មន្ត្រីគ្រប់ជាន់ថ្នាក់) គាត់ការពារ គាត់មកមើលការខុសត្រូវ និងគ្រប់គ្រងរបៀបម៉េចៗដើម្បីកុំឲ្យប៉ះពារដល់អាជីវករខាងក្រៅដែលកំពុងលក់ហ្នឹង។ ពួកខ្ញុំក៏ខ្លាចថា នៅពេលធ្វើទៅអាចនឹងប៉ះពារ មិនបានលក់ដូរ»។
មិនខុសគ្នានេះដែរអាជីវករម្នាក់ទៀតដែលគេហៅ ម៉ាក់អាមី ប្រាប់ភ្នំពេញប៉ុស្តិ៍ដែរថាពួកគាត់នៅតែបារម្ភ ដរាបណាការផ្តល់ទីតាំងជូនដល់អាជីវករនៅមិនទាន់បានចាប់ផ្តើមស្របពេលផ្សារនេះទើបតែត្រូវបានសាងសង់ ឯក្រុមអាជីវករមួយចំនួនមិនទាន់មានកន្លែងលក់ថ្មីនៅឡើយ។
អ្នកស្រីបន្តថា៖ «ពួកខ្ញុំហ្នឹងក៏នៅតែតវ៉ាទៀតដែរ ព្រោះអីអ្នកធ្វើហ្នឹង (ក្រុមហ៊ុន) អត់មានកិច្ចសន្យាអ្វីត្រឹមត្រូវឲ្យទេ។ និយាយតែមាត់ទទេ មិនមានកិច្ចសន្យាផ្តិតមេដៃអ្វីច្បាស់លាស់។ គ្រាន់តែនិយាយថា ឲ្យអាជីវករទាំងអស់នៅលក់ដដែល។ ប៉ុន្តែដល់តែធ្វើនាំគ្នាឈូសឆាយធ្វើ អត់ឲ្យគ្នាលក់ ដេញគ្នាត្រដាបត្រដួស អត់ដឹងជាទៅលក់នៅកន្លែងណា?»។
តាមសេចក្តីប្រកាសរបស់ក្រុមហ៊ុនបានឲ្យដឹងថា ផ្សារសិនជូរីផ្លាហ្សា នឹងត្រូវអភិវឌ្ឍឲ្យក្លាយទៅជាផ្សារទំនើបក្នុងរយៈពេល ២ ឆ្នាំខាងមុខដោយមានកម្ពស់ ៧ ជាន់ គឺមានកម្ពស់ខាងលើ ៥ ជាន់ និងក្រោមដី ២ ជាន់។ បើតាមលោកអភិបាល ក្រុងឃួង ស្រេង ផ្សារនេះបានផ្តល់ឲ្យក្រុមហ៊ុន សិនជូរីគ្រុប គ្រប់គ្រងតាំងពីឆ្នាំ ១៩៩២ មកម្ល៉េះ បន្ទាប់ពីត្រូវបានចុះបញ្ជីជាផ្សាររបស់រដ្ឋ នៅសាលារាជធានីភ្នំពេញ៕