ភ្នំពេញ៖ អភិបាលរាជធានីភ្នំពេញ លោក ឃួង ស្រេង លើកឡើងថា មានតែខារ៉ាអូខេ ឬ KTV ចំនួន ២ កន្លែងប៉ុណ្ណោះ មិនបានអនុវត្តតាមបទបញ្ជារបស់រដ្ឋាភិបាលក្នុងការប្រែក្លាយទៅជាភោជនីយដ្ឋាន ក្រៅពីនេះ គឺមិនមាន KTV និងក្លិបកម្សាន្តណាផ្សេងទៀតហ៊ានរំលោភលើបទបញ្ជានេះឡើយ។
លោក ឃួង ស្រេង ប្រាប់ភ្នំពេញប៉ុស្ដិ៍ កាលពីថ្ងៃទី ១៥ កក្កដា ថា មានតែខារ៉ាអូខេចំនួន ២ កន្លែងនៅខណ្ឌចំការមន ដែលត្រូវបានអាជ្ញាធររកឃើញបើកធ្វើអាជីវកម្មខារ៉ាអូខេឡើងវិញ រំលោភបទបញ្ជារបស់រដ្ឋាភិបាល។ ប៉ុន្តែលោកថា តាមពិតម្ចាស់ខារ៉ាអូខេទាំង ២ នេះ គឺបើកជាភោជនីយដ្ឋានលក់បាយប៉ុណ្ណោះ និងមិនបានលួចបើកអាជីវកម្មខារ៉ាអូខេឡើយ ហើយការល្មើសបទបញ្ជា គឺដោយសារមានភ្ញៀវស្នើសុំចង់ច្រៀង។
លោកប្រាប់ថា៖ «ឃើញមានតែនៅចំការមនទេ ហើយបានធ្វើការណែនាំ និងដូចមិនមានច្រើនទេ។ និយាយរួមទៅ ប្រជាជននៅក្នុងស្រុកខ្មែរ មិនហ៊ានល្មើសបទបញ្ជារបស់អាជ្ញាធរ ឬការដឹកនាំរបស់រដ្ឋាភិបាលទេ»។
លោក ស្រេង បញ្ជាក់ថា៖ «មិនមែនគាត់ (ម្ចាស់ខារ៉ាអូខេ) លួចបើកទេ ប៉ុន្តែនៅពេលគាត់បើកលក់បាយ ភ្ញៀវដែលទៅហ្នឹង ចេះតែសុំទៅច្រៀងអ៊ីចឹងទៅ។ អ៊ីចឹង! បានយើងទៅណែនាំថា បើទោះបីជាភ្ញៀវទទូចសុំម៉េចក៏ដោយ គឺត្រូវសុំអង្វរគាត់ (ភ្ញៀវ) វិញថា អាហ្នឹងគឺជាបទបញ្ជារបស់រដ្ឋាភិបាល មិនអាចល្មើសបានទេ»។
កាលពីថ្ងៃទី ៧ កក្កដា សាលារាជធានីភ្នំពេញបានចេញសេចក្ដីជូនដំណឹងមួយថា រដ្ឋាភិបាលបានអនុញ្ញាតឱ្យម្ចាស់អាជីវកម្មក្លិបកម្សាន្តនិងខារ៉ាអូខេទាំងអស់នៅភ្នំពេញ អាចបើកដំណើរការឡើងវិញ។ ប៉ុន្តែត្រូវប្រែក្លាយទៅជាភោជនីយដ្ឋាន និងត្រូវអនុវត្តឱ្យបានម៉ឺងម៉ាត់តាមវិធានការក្រសួងសុខាភិបាល ដើម្បីការពារជំងឺឆ្លងកូវីដ ១៩។
កាលពីទី ១៣ កក្កដា លោក ថេង សុថុល អភិបាលខណ្ឌចំការមនបានដឹកនាំកម្លាំងពាក់ព័ន្ធខណ្ឌចុះទៅពិនិត្យខារ៉ាអូខេចំនួន ២ កន្លែង ស្ថិតនៅផ្លូវ ៤៨៨ សង្កាត់ផ្សារដើមថ្កូវ និងបានរកឃើញថា មិនបានគោរពតាមបទបញ្ជា។ នៅពេលចុះត្រួតពិនិត្យនោះ ទីតាំងខារ៉ាអូខេទាំង ២ កំពុងមានភ្ញៀវជាង ១២០ នាក់ និងអ្នកបម្រើការប្រហែល ៥០០ នាក់។
លោក ថេង សុថុល បានប្រាប់ភ្នំពេញប៉ុស្ដិ៍ថា ទីតាំងខារ៉ាអូខេទាំង ២ នេះ គឺមានឈ្មោះខារ៉ាអូខេ ជេ (Karaoke J) និងឈ្មោះខារ៉ាអូខេ ឡាស៍ (Karaoke Lush) និងបានបើកដំណើរការដោយមិនបានស្នើសុំការអនុញ្ញាតពីសាលារាជធានីភ្នំពេញជាមុនឡើយ។ លោកបញ្ជាក់ថា ទីតាំងខារ៉ាអូខេទាំង ២ នេះ គឺអាចបើកដំណើរការវិញ លុះត្រាតែបានដាក់លិខិតស្នើសុំការអនុញ្ញាតពីសាលាក្រុង ដើម្បីប្រែក្លាយជាភោជនីយដ្ឋានជាមុន។
លោកថា៖ «តាមពិតទៅ ពួកគាត់គឺបើកតែម្ដង ដោយអត់ទាន់បានសុំច្បាប់ ដើម្បីកែប្រែទៅភោជនីយដ្ឋានទេ ហើយក្នុងរយៈពេល ២ ថ្ងៃមកនេះ គាត់បានបើកជាសកម្មភាពលក្ខណៈខារ៉ាអូខេតែម្ដង។ អាហ្នឹង គឺយើងចុះទៅពិនិត្យនិងឃើញជាក់ស្ដែង ហើយផ្អាកដើម្បីឱ្យគាត់មកបំពេញនិតីវិធី ដើម្បីកែពី KTV មកភោជនីយដ្ឋានវិញ»។
លោក ម៉ម វាសនា ប្រធានមន្ទីរទេសចរណ៍រាជធានីភ្នំពេញបានឲ្យដឹងថា នៅក្នុងរាជធានីភ្នំពេញ គឺមានខារ៉ាអូខេជាង ៩០ ទីតាំង និងក្លិបកម្សាន្តជាង ២០។ ប៉ុន្តែមានតែខារ៉ាអូខេ និងក្លិបកម្សាន្តជាង ១០% ប៉ុណ្ណោះ បានស្នើសុំដើម្បីកែប្រែបើកទៅជាភោជនីយដ្ឋានក្នុងពេលកើតមានជំងឺកូវីដ ១៩ នេះ។
លោកថ្លែងថា៖ «មួយចំនួនទៀតដែលមិនទាន់បើក គឺអាចដោយសារពួកគាត់មិនចង់កែប្រែសេវាកម្ម KTV របស់ពួកគាត់»៕