ភ្នំពេញៈ អភិបាលរាជធានីភ្នំពេញ សន្យាដោះស្រាយជូនប្រជាពលរដ្ឋដែលសង់ផ្ទះនៅប្របនឹងមាត់ប្រឡាយបឹងត្របែក ស្ថិតនៅភូមិ ១ សង្កាត់ផ្សារដើមថ្កូវ ខណៈដែលស្ថានប័នមួយនេះ ចាប់ផ្តើមឈូសឆាយនៅតំបន់នោះ យកទីតាំងធ្វើជាផ្លូវ និងស្តាបឹង រំដោះទឹកជន់លិចក្រុងនាពេលមានរដូវភ្លៀងម្តង។
អភិបាលរាជធានីភ្នំពេញលោក ប៉ា សុជាតិវង្ស កាលពីម្សិលមិញ បានចុះទៅដល់ចំណុចកើតហេតុ និងបានសន្យាថា នឹងដោះស្រាយជូនប្រជាពលរដ្ឋដែលរងប៉ះពាល់ និងទទួលការស្នើសុំរបស់ប្រជាពលរដ្ឋ។
លោកបន្តថា នឹងចាត់ឱ្យអាជ្ញាធរធ្វើការស្រង់ស្ថិតិផ្ទះប្រជាជនបន្ថែមទៀត ដើម្បីងាយស្រួលក្នុងការដោះស្រាយ។
លោកបញ្ជាក់ថា « នេះជាបញ្ហាមួយដែលខ្ញុំទទួលយកបញ្ហានេះដើម្បីពិចារណា ទាក់ទងនឹងគម្រោងតទៅទៀត យើងនឹងធ្វើការសិក្សាហ្មត់ចត់ ដើម្បីរៀបចំធ្វើហើយមានផ្លូវព័ទ្ធជុំវិញ គ្រាន់តែថាយើងខិតខំធ្វើឱ្យមានផលប៉ះពាល់តិចបំផុត»។ តែការសន្យានេះ ពុំបានធ្វើជាលាយល័ក្ខអក្សរនោះទេ។
យ៉ាងណាក៏ដោយលោក អះអាងថា ការឈូសឆាយនេះមិនមែនយកដីទៅឱ្យនណារម្នាក់នោះទេ តែទុកសម្រាប់ធ្វើអាងស្តុកទឹកជាសាធារណៈ ដើម្បីបញ្ចៀសការលិចទឹកក្នុងរាជធានីភ្នំពេញ និងជាប្រយោជន៍រួម។
ប្រជាពលរដ្ឋដែលនឹងរងផលប៉ះពាល់ផ្ទះទាំងមូលដែលមានសមាជិកគ្រួសារក្នុងបន្ទុកចំនួន ៧ នាក់ អ្នកស្រី ម៉ា ឡា ថ្លែងថា ការសន្យារបស់អភិបាលសាលារាជធានីភ្នំពេញ មិនទាន់ទុកចិត្តបានទេ ដោយស្នើឱ្យមន្ត្រីរូបនេះ ធ្វើកិច្ចសន្យាជាលាយល័ក្ខអក្សរ ដើម្បីផ្តល់ទំនុកចិត្ត។ យ៉ាងនេះក្តីអ្នកស្រីនៅតែសម្តែងការព្រួយបារម្ភចំពោះការសន្យានេះ និងមិនសម្រេចរើផ្ទះតាមការស្នើសុំរបស់អាជ្ញាធរនោះទេ។
អ្នកស្រីថា« ថ្ងៃនេះបងអត់ទាន់សម្រេចរើផ្ទះទេ បងសុំលក្ខ័ណតែបន្តិច ក៏អស់ចិត្តដែរ ថាគាត់ត្រូវដោះស្រាយយ៉ាងម៉េច »។
អ្នកស្រីថាឱ្យដឹងថា គាត់បានទិញផ្ទះនោះតពីគេតាំងពីយូរណាស់មកហើយ ដែលមានបណ្តោយទំហំដី ៣២ និង ទទឹង ១០ ម៉ែត្រ។
ពលរដ្ឋម្នាក់ទៀតដែលនឹងរងផលប៉ះពាល់លោក សយ សុភាព ប្រាប់ភ្នំពេញប៉ុស្តិ៍កាលពីម្សិលមិញថា លោកមិនជំទាស់នឹងការអភិវឌ្ឍរបស់សាលារាជធានីនោះទេ តែលោកស្នើឱ្យមានការផ្តស់សំណងសមរម្យ និងមានការគោលការណ៍ដោះស្រាយជាក់លាក់ណាមួយ។
លោកបន្ថែមគាត់បានទិញដីនោះពីតាំងពីយូរណាស់មកហើយ មានការបញ្ជាក់ពីអាជ្ញាធរមូលរដ្ឋទៀតផង។
លោកថា « ដីយើងមានកម្មសិទ្ធិត្រឹមត្រូវ យើងទិញយើងឱ្យលុយគេមានបញ្ជាក់ពីសង្កាត់ យើងមិនមែនទៅចាប់យក ឬពង្រីកយកដីបឹងណា ខ្ញុំរស់នៅ ១០ ឆ្នាំ ជាងហើយ»។
មន្ត្រីសម្របសម្រួលកំណែទម្រង់ដីធ្លី នៃមជ្ឈមណ្ឌលសិទ្ធិមនុស្សកម្ពុជា ដែលតាមដានករណីនេះ លោក វណ្ណ សូផា ប្រាប់ភ្នំពេញប៉ុស្តិ៍ថា ការសន្យានេះ ហាក់បីដូចជាមិនទាន់ច្បាស់លាស់ និងមិនទាន់ទុកចិត្តបាន។
លោកថា «សាលារាជធានីភ្នំពេញគួរតែធ្វើម៉េចឱ្យមានការដោះស្រាយតាមសន្តិវិធីឱ្យមានការព្រមព្រៀងទាំងអស់គ្នា ទោះបីជាប្រើពេលវេលាយូរពិតមែន ប៉ុន្តែការដោះស្រាយអាចធ្វើទៅដោយការទទួលយកបាន»។
លោកយល់ឃើញថា អ្វីដែលសំខាន់ អាជ្ញាធរគួរមានការប្រជុំដោយមានការចូលរួមពីប្រជាពលរដ្ឋដែលរងផលប៉ះពាល់ និងអង្គការសង្គមស៊ីវិល ដើម្បីធ្វើការដោះស្រាយ។ លោកសង្កត់ធ្ងន់ថា ប្រសិនបើអាជ្ញាធរមិនមានគោលនយោបាយដោះស្រាយជាក់លាក់ទេ អាចនឹងការប្រឈមនៅថ្ងៃមុខដោយសារពលរដ្ឋនឹងតវ៉ាករណីនេះ។
កាលពីថ្ងៃ ១៩ ខែមករា អាជ្ញាធរបានចាប់ផ្តើមឈូសឆាយដីធ្លីរបស់ប្រជាពលរដ្ឋដែលរស់នៅប្របនឹងមាត់ប្រឡាយបឹងត្របែក ស្ថិតនៅភូមិ ១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ដោយមិនបានជូនដំណឹងជាមុនឡើយ ដោយអះអាងថា វិធានការរបស់សាលារាជធានីនាពេល ស្តារបឹងរំដោះទឹកជន់លិចក្រុង។
ការឈូសឆាយនោះប៉ះពាល់ដីប្រជាពលរដ្ឋចំនួន ៦ គ្រួសារ ក្នុងនោះ ៥ គ្រួសារខូចខាតដីនៅក្រោយផ្ទះ តែមួយគ្រួសារទៀតអាចនឹងប៉ះពាល់ចំផ្ទះទាំងមូល។
ទោះជាងយ៉ាងណាផ្ទះនោះ អាជ្ញាធរមិនទាន់ឈូសឆាយទេ ដោយស្នើឱ្យម្ចាស់ផ្ទះរើអីវ៉ាន់នៅថ្ងៃនេះ ដោយសន្យាថានឹងផ្តល់កន្លែងស្នាក់នៅបណ្តោះអាសន្ន ពោលជួលផ្ទះឱ្យនៅសិន៕
