.jpg)
លោក ឃួង ស្រេង អភិបាលរាជធានីភ្នំពេញក្នុងកម្មវិធីកន្លងមក។ ហុង មិនា
ភ្នំពេញៈ លោក ឃួង ស្រេង អភិបាលរាជធានីភ្នំពេញបានបញ្ជាឲ្យមន្ត្រីក្រោមឱវាទចុះពិនិត្យ និងបិទអាជីវកម្ម ពេទ្យធ្មេញជាងធ្មេញ គ្លីនិក និងឱសថស្ថានគ្មានច្បាប់ក្នុងមូលដ្ឋានរបស់ខ្លួនជាបន្ទាន់ ដើម្បីកុំឲ្យមានគ្រោះថ្នាក់ដល់អាយុជីវិតប្រជាពលរដ្ឋ ខណៈលោកបារម្ភពីការចម្លងជំងឺកូវីដ១៩ កាន់តែខ្ពស់ ប្រសិនបើពេទ្យទាំងនោះគ្មានវិជ្ជាជីវៈ។
ការបញ្ជាយ៉ាងដូច្នេះបានធ្វើឡើងក្នុងពិធីប្រកាស «ផ្សព្វផ្សាយ និងដាក់ឲ្យដំណើរការមន្ទីរសុខាភិបាលស្ថិតក្រោមរចនាសម្ព័ន្ធគ្រប់គ្រងរបស់រដ្ឋបាលរាជធានី-ភ្នំពេញ» កាលពីរសៀលថ្ងៃទី ១២ ខែមិថុនា ដោយមានមន្ត្រីគ្រប់ខណ្ឌចូលរួម។ នេះបើយោងតាមការចុះផ្សាយរបស់ FRESH NEWS។
លោក ឃួង ស្រេង បានថ្លែងថាបច្ចុប្បន្នលោកសង្កេតឃើញថា អាជីវកម្មមួយចំនួនកំពុងដំណើរការនៅក្នុងរាជធានីភ្នំពេញដែលក្នុងនោះអាចមានមួយចំនួនគ្មានច្បាប់អនុញ្ញាត ហើយត្រូវពិនិត្យចាត់វិធានការជាបន្ទាន់។
លោកបានបញ្ជាក់ថា មន្ទីរសុខាភិបាលត្រូវធ្វើកិច្ចការងារនេះឲ្យបានច្បាស់លាស់ដើម្បីធានាថា ក្នុងភូមិសាស្ដ្ររាជធានីភ្នំពេញកុំឲ្យមានបទល្មើសកើតឡើង។ ចំណែកអភិបាលខណ្ឌទាំង ១៤ ក៏ត្រូវដឹងច្បាស់ថា នៅក្នុងដែនសមត្ថកិច្ចមានគ្លីនិកប៉ុន្មាន ផ្នែកអ្វីខ្លះមានច្បាប់ ឬគ្មានច្បាប់ ហើយមិនអាចបណ្តោយស្រេចនឹងចិត្តឡើយ។
លោកបានបញ្ជាក់ថា៖ «ពេទ្យធ្មេញ ឬជាងធ្មេញខ្លះមិនបានមានវិជ្ជាជីវៈត្រឹមត្រូវ មន្ទីរសុខាភិបាលត្រូវបិទឲ្យអស់ចំណុចនេះ។ ឥឡូវនេះកូវីដ ១៩ បើយកពេទ្យធ្មេញគ្មានវិជ្ជាជីវៈទៅមើលធ្មេញទៀត រឹតតែមានបញ្ហា ដូច្នេះមន្ទីរសុខាភិបាលត្រូវលុបបំបាត់ឲ្យខាងតែបាន។ ក្នុងនោះខណ្ឌទាំង ១៤ ត្រូវមើលបញ្ហានេះ មិនមែនតែបញ្ហាពេទ្យធ្មេញមួយនោះទេ គ្លីនិកដែលគ្មានច្បាប់អនុញ្ញាតត្រឹមត្រូវ ត្រូវបិទ»។
លោក ងី មានហេង ប្រធានមន្ទីរសុខាភិបាលរាជធានីភ្នំពេញបានប្រាប់ភ្នំពេញប៉ុស្តិ៍ពីម្សិលមិញថា ទូទាំងរាជធានីភ្នំពេញមិនសូវមានករណីទាំងនោះទេ ព្រោះមន្ត្រីពាក់ព័ន្ធមានកិច្ចសហការដូចភ្លៀងរលឹមក្នុងការចុះអប់រំ ណែនាំ និងផាកពិន័យរាល់ទីតាំងល្មើសផងដែរ។
លោកបន្តថា ក្នុង ១ ខែៗមានទីតាំងល្មើសតិចតួច គឺមិនដល់ ១០ ករណីផង ខណៈភាគច្រើនពួកគេទាំងនោះមានទម្លាប់បើកអាជីវកម្មមុន ទើបសុំច្បាប់អនុញ្ញាតជាក្រោយ។
លោកបានបញ្ជាក់ថា៖ «ជាទូទៅគាត់សុំច្បាប់ ក៏ប៉ុន្តែអ្នកដែលបើកថ្មីគឺទម្លាប់ស្រុកយើងគឺបើកថ្មីគាត់មិនសូវដឹងអី ហើយគាត់បើកមុនហើយបានមកសុំច្បាប់តាមក្រោយ។ នេះហើយជាមូលហេតុដែលយើងតែងតែចុះអប់រំគាត់ ហើយយើងមិនមែនថា ឲ្យតែខុសភ្លាមយើងអនុវត្តការពិន័យភ្លាមទេគឺយើងអប់រំសិនបើនៅតែមិនស្តាប់ ទើបយើងមានពិន័យ»។
បើតាមលោក ងី មានហេង រាល់ការបើកអាជីវកម្មពេទ្យធ្មេញជាងធ្មេញគ្លីនិក និងឱសថស្ថាននានា ម្ចាស់អាជីវកម្មត្រូវតែសុំច្បាប់អនុញ្ញាតជាមុន។ បើមិនដូច្នេះទេម្ចាស់អាជីវកម្មនឹងប្រឈមនឹងការពិន័យជាប្រាក់រហូតមានការដាក់ទោសទណ្ឌផងដែរ។
លោក ហែម ដារិទ្ធិ អភិបាលខណ្ឌពោធិ៍សែនជ័យបានប្រាប់ភ្នំពេញប៉ុស្តិ៍កាលពីម្សិលមិញថា ដោយមានការយកចិត្តទុកដាក់ពីមន្ត្រីនៅក្នុងមូលដ្ឋាន ករណីបើកអាជីវកម្មពេទ្យធ្មេញ ជាងធ្មេញ គ្លីនិក និងឱសថស្ថានផ្សេងគឺមិនមាននោះឡើយ។
លោកបន្តថា ការដែលមិនមានបែបនេះ ព្រោះតែមន្ត្រីតាមមូលដ្ឋានមានការត្រួតពិនិត្យយ៉ាងតឹងរ៉ឹង ហើយក៏តែងតែចុះអប់រំដល់ពលរដ្ឋផងដែរ ខណៈលោកក៏អះអាងថា ក្នុងពេលបច្ចុប្បន្នពលរដ្ឋមានការយល់ដឹងខ្ពស់ ហើយក៏មិនគាំទ្រចំពោះអាជីវកម្ម ដែលមិនមានច្បាប់អនុញ្ញាតនោះដែរ។
លោកបានបញ្ជាក់ថា៖ «យើងមិនមានទៀតទេមកទល់ពេលនេះយើងមិនមានទៀតទេ។ ការងារទាំងនេះ ( បញ្ជារបស់លោក ឃួង ស្រេង) យើងបានអនុវត្តជាប្រចាំហើយតាមរយៈច្រកចេញចូលតែមួយដែលងាយដល់ការស្នើសុំច្បាប់ផ្សេងៗ ហើយយើងមានភ្នាក់ងារត្រួតពិនិត្យទាំងអស់នៅទូទាំងខណ្ឌ បើមានកន្លែងណាអត់ច្បាប់ យើងជំរុញភ្លាមឲ្យគាត់សុំច្បាប់ត្រឹមត្រូវ»៕
វីដេអូ៖
