ភ្នំពេញៈ លោក អ៊ុំ រាត្រី អភិបាលខេត្ដបន្ទាយមានជ័យនៅថ្ងៃទី ៩ ខែឧសភានេះ បានម្រេចកំណត់ភូមិសាស្ត្រមួយចំនួនក្នុងសង្កាត់ប៉ោយប៉ែត ក្រុងប៉ោយប៉ែត ជា «តំបន់ក្រហម» បន្ទាប់ពីមានការឆ្លងរាលដាលធ្ងន់ធ្ងរនៃជំងឺកូវីដ ១៩។
យោងតាមសេចក្ដីសម្រេចរដ្ឋបាលខេត្ដបន្ទាយមានជ័យនាថ្ងៃនេះបានកំណត់ភូមិសាស្ត្រមួយចំនួនក្នុងសង្កាត់ប៉ោយប៉ែត ក្រុងប៉ោយប៉ែត ជា «តំបន់ក្រហម» ដែលលមានការឆ្លងរាលដាលនៃជំងឺកូវីដ ១៩ ធ្ងន់ធ្ងរ ខណៈក្នុងថ្ងៃទី ៨ ខែឧសភា តាមរយៈលទ្ធផលតេស្តរហ័ស (Rapid Test) បានរកឃើញវិជ្ជមានជំងឺកូវីដ ១៩ ដែលជាករណីឆ្លងនៅក្នុងសហគមន៍ ២០ កុម្ភៈ ២០២១ លើបុរសស្ត្រីជនជាតិខ្មែរ និងជនបរទេសចំនួន ៨៥ នាក់ នៅក្រុងប៉ោយប៉ែត។
រដ្ឋបាលខេត្ដបន្ទាយមានជ័យ បានកំណត់ទីតាំងជា «តំបន់ក្រហម» ដែលមានការឆ្លងរាលដាលនៃជំងឺកូវីដ ១៩ ធ្ងន់ធ្ងរក្នុងគោលបំណង ធានាដល់ប្រសិទ្ធភាពនៃការអនុវត្តសេចក្ដីសម្រេចលេខ ១០៩/២១ សសរ ចុះថ្ងៃទី ២៤ ខែ មេសា ឆ្នាំ ២០២១ របស់រដ្ឋបាល ខេត្តបន្ទាយមានជ័យ ស្តីពីការបិទខ្ទប់ការធ្វើដំណើរចេញ-ចូលជាបណ្តោះអាសន្នលើទីតាំងទាំងស្រុងក្នុងភូមិសាស្ត្រសង្កាត់ប៉ោយប៉ែត និងទីតាំងមួយផ្នែកនៃសង្កាត់ផ្សារកណ្តាលក្រុងប៉ោយប៉ែត។
យោងតាមរដ្ឋបាលខេត្ដទីតាំងគោលដៅតំបន់ក្រហមទាំងនោះរួមមាន អគារស្នាក់នៅរួមហ្គោលឌិនស្ទូចត្រី ស្ថិតក្នុងភូមិសាមគ្គីមានជ័យ។ អគារកាស៊ីណូ អ៊ីសតាណា ស្ថិតក្នុងភូមិក្បាលស្ពាន។ កំណាត់ផ្លូវចូលទីតាំងខារ៉ាអូខេ ខេន្តែ ចាប់ពីផ្លូវព្រហ្មនិមិត្ត ឆ្ពោះទៅទិសខាងលិចទល់នឹងផ្លូវអភិវឌ្ឍន៍ ស្ថិតក្នុងភូមិក្បាលស្ពាន។ កំណាត់ផ្លូវចូលទីតាំងកាស៊ីណូ និងសណ្ឋាគារប៉ោយប៉ែតជាលេសផ្ញើ ចាប់ពីផ្លូវសាមគ្គី ឆ្ពោះទៅទិស។
ខាងលិចទល់នឹងផ្លូវអភិវឌ្ឍន៍ ស្ថិតក្នុងភូមិក្បាលស្ពាន។ កំណាត់ផ្លូវខាងជើងផ្សារត្រី ចាប់ផ្លូវបត់ឆ្ពោះទៅទិសខាងលិចទល់ផ្លូវផ្សារអគ្គៈ (ផ្សារប៉ោយប៉ែតថ្មី) ស្ថិតក្នុង ភូមិបាលិលេយ្យ១ - តំបន់កាស៊ីណូដែលស្ថិតក្នុងភូមិប៉ោយប៉ែត, ភូមិក្បាលស្ពាន១ និងភូមិសាមគ្គីមានជ័យ សង្កាត់ប៉ោយប៉ែត ដែលមានព្រំប្រទល់ ខាងកើតទល់នឹងផ្លូវទំបន់ក៥ និងព្រំប្រទល់ផ្សារមង្គល ខាងលិចទល់នឹងអូរព្រំដែនកម្ពុជា-ថៃ ខាងជើងទល់នឹងស្រះទឹកក្រុមហ៊ុនស្កាវីលេក ស្ថិតក្នុងភូមិសាមគ្គីបានជ័យ ខាងត្បូងទល់នឹងអូរព្រំដែនកម្ពុជា-ថៃ។
រដ្ឋបាលខេត្ដបញ្ជាក់ថាបុគ្គល ឬនីតិបុគ្គលដែលស្ថិតក្នុងភូមិសាស្ត្រ «តំបន់ក្រហម» ត្រូវអនុវត្តវិធានការរឹតបន្តឹង ដូចជា បុគ្គលគ្រប់រូបត្រូវអនុវត្តតាមវិធានការ «៣ការពារ និង៣កុំ» និងវិធានការសុខាភិបាលដែលមានចែងក្នុង អនុក្រឹត្យលេខ ៣៧ អនក្រ.បក ចុះថ្ងៃទី ១២ ខែ មីនា ឆ្នាំ ២០២១។
រដ្ឋបាលខេត្ដបញ្ជាក់ថា បុគ្គលគ្រប់រូបត្រូវបានហាមឃាត់មិនឲ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួន ដោយរួមទាំងការមិនអនុញ្ញាតធ្វើសកម្មភាពកីឡានៅខាងក្រៅលំនៅឋាន ឬទីសំណាក់របស់ខ្លួន លើកលែងតែការធ្វើដំណើរទៅជួបមន្ត្រីសុខាភិបាល ដើម្បីយកសំណាកទៅវិភាគរកមេរោគកូវីដ១៩ ឬចាក់វ៉ាក់សាំង ការពារជំងឺកូវីដ១៩នៅទីតាំងជិតបំផុតក្នុងតំបន់ក្រហម អាជ្ញាធរមានសមត្ថកិច្ច តាមការកំណត់ និងដោយមានការអនុញ្ញាតពីអាជ្ញាធរមានសមត្ថកិច្ច។
រដ្ឋបាលខេត្ដកំណត់ថា ផ្សារ និងទីកន្លែងលក់ម្ហូបអាហារ គ្រឿងឧបភោគ បរិភោគ ព្រមទាំងសកម្មភាពការងារ មុខរបរ និង អាជីវកម្មទាំងអស់ក្នុង «តំបន់ក្រហម» ត្រូវផ្អាកជាបណ្តោះអាសន្ន លើកលែងតែសកម្មភាពដូចជា ១ សេវាពន្លត់ អគ្គិភ័យ សេវាផ្គត់ផ្គង់អគ្គិសនី ទឹកស្អាត ២ សេវាសង្គ្រោះបន្ទាន់ និងសេវាសុខាភិបាលទាំងរដ្ឋ និងឯកជន ដោយរួមទាំងឱសថស្ថាន និងសេវាផ្គត់ផ្គង់បរិក្ខារពេទ្យ ៣ ទីតាំងផលិត និងផ្គត់ផ្គង់អាល់កុល អុកស៊ីហ្សែន ៤ សេវាផ្គត់ផ្គង់ស្បៀងរបស់រដ្ឋ និងជំនួយសង្គ្រោះបន្ទាន់ ៥ សេវាប្រមូល និងដឹកជញ្ជូនសំរាម-សំណល់រឹង។
រដ្ឋបាលខេត្ដបញ្ជាក់ថា បុគ្គល ឬនីតិបុគ្គលទាំងឡាយណា ដែលមិនអនុវត្តតាមខ្លឹមសារនៃប្រការ ២ ខាងលើ នឹងត្រូវអនុវត្តវិធានការច្បាប់ យ៉ាងម៉ឺងម៉ាត់ដោយរួមទាំងការឃាត់ទុកជាបណ្តោះអាសន្ននូវមធ្យោបាយធ្វើដំណើរ និងទណ្ឌកម្មរដ្ឋបាល ដោយអនុលោម តាមបទប្បញ្ញតិ និងនីតិវិធីជាធរមាន៕