កណ្តាលៈ លោក គង់ សោភ័ណ្ឌ អភិបាលខេត្តកណ្តាលបានបញ្ជាឲ្យអាជ្ញាធរដែនដីបន្តធ្វើការហាមឃាត់ ចំពោះការសាងសង់សំណង់នានានៅតាមតំបន់ព្រំដែន ដែលពុំទាន់មានការបោះបង្គោលខណ្ឌសីមារួចរាល់ ហើយត្រូវរាយការណ៍ជាបន្ទាន់ក្នុងករណីមានភាពមិនប្រក្រតីណាមួយកើតឡើង ខណៈមកដល់ពេលនេះវៀតណាមនៅមិនទាន់រុះរើតង់ចំនួន ១៧ ទៀត ដែលចូលមកសង់នៅតំបន់ព្រំដែន ដែលមិនទាន់មានការព្រមព្រៀងគ្នាក្នុងខេត្តកណ្តាល។
ការបញ្ជាយ៉ាងដូច្នេះបានធ្វើឡើងអំឡុងពេលលោកបានអញ្ជើញជាអធិបតីក្នុងពិធីសំណេះសំណាលសួរសុខទុក្ខ និងចងសម្ព័ន្ធមេត្រីភាពរវាងសាលាខេត្តកណ្ដាល និងក្រុមហ៊ុនហេងអភិវឌ្ឍន៍ជាមួយកងការពារព្រំដែនលេខ ៦០១ យោធភូមិភាគពិសេសនៅរសៀលថ្ងៃទី ២៤ ខែ មិថុនា ឆ្នាំ ២០២០ ស្ថិតក្នុងភូមិព្រែកហម ឃុំឈើខ្មៅ ស្រុកកោះធំ។ នេះបើតាមទំព័រហ្វេសប៊ុករបស់រដ្ឋបាលខេត្តកណ្តាល។
លោក គង់ សោភ័ណ្ឌ បានផ្ដាំផ្ញើដល់អាជ្ញាធរមូលដ្ឋាន និងសមត្ថកិច្ចឈរជើងនៅតាមបន្ទាត់ព្រំដែនត្រូវបន្តរក្សា និងពង្រឹងសន្តិសុខសណ្ដាប់ធ្នាប់តាមបណ្ដោយព្រំដែនសំដៅធានាការគ្រប់គ្រង ការទប់ស្កាត់ការជួញដូរ ការរត់គេចពន្ធគ្រប់ប្រភេទព្រមទាំងការឆ្លងចេញ-ចូលព្រំដែនខុសច្បាប់។
លោកបញ្ជាក់ថា៖ «ជាពិសេសត្រូវបន្តធ្វើការហាមឃាត់ចំពោះការសាងសង់សំណង់នានាទាំងខាងភាគីកម្ពុជា និងភាគីខាងវៀតណាមនៅតំបន់ព្រំដែន ដែលពុំទាន់មានការបោះបង្គោលខណ្ឌសីមារួចរាល់។ ត្រូវមានវិធានការទប់ស្កាត់ និងរាយការណ៍ជាបន្ទាន់ក្នុងករណីមានភាពមិនប្រក្រតីណាមួយកើតឡើង ដើម្បីមានវិធានការទាន់ពេលវេលា។ ត្រូវយកចិត្តទុកដាក់លើការប្រែក្លាយតំបន់ព្រំដែនឱ្យក្លាយទៅជាព្រំដែនសន្តិភាព មិត្តភាព សហប្រតិបត្តិការល្អ និងមានការអភិវឌ្ឍ»។
លោក សោភ័ណ្ឌ បានប្រាប់ភ្នំពេញប៉ុស្តិ៍បន្ថែមពីម្សិលមិញថា តាមរយៈការជំរុញនេះភាគីវៀតណាមក៏បានរុះរើតង់ដែលបានបោះដោយគ្មានការព្រមព្រៀងពីកម្ពុជាចាប់តាំងពីព្រំប្រទល់ក្អមសំណរហូតដល់ព្រំប្រទល់ខេត្តតាកែវចំនួន ៧ តង់បន្ថែមទៀត។
លោក សោភ័ណ្ឌ ក៏បន្តជំរុញឲ្យភាគីវៀតណាមបន្តរុះរើតង់ទាំងអស់ឲ្យអស់ពីតំបន់ព្រំដែន។ លោកបញ្ជាក់ថា៖ «មកដល់ម៉ោងនេះ តង់នៅចំណុចខេត្តកណ្តាលយើងនេះ គាត់ (វៀតណាម) បានរុះរើចំនួន ៧ តង់ទៀតហើយ នៅសល់តែ ១៧ តង់ទៀតទេក្នុងចំណោម ២៤ តង់។ ចំនួនទាំង ២៤ តង់នេះ គឺមានចំណុច ២ ដែល ១ គឺព្រំដែនមានការព្រមព្រៀងគ្នាបោះបង្គោលព្រំសីមា និង ១ ចំណុច ៦ គីឡូកន្លះទៀត គឺជាកន្លែងដែលយើងមិនទាន់មានការព្រមព្រៀងគ្នា»។
កាលពីអំឡុងខែឧសភា អាជ្ញាធរវៀតណាមបានពង្រាយកម្លាំងទាហាន និងបានចូលមកបោះតង់ចំនួន ១១៤ ទីតាំង នៅលើតំបន់ដែលមិនទាន់មានការព្រមព្រៀងគ្នា (តំបន់ស) ក្នុងការកំណត់ព្រំដែនដែលជាប់នឹងខេត្តចំនួន ២ របស់កម្ពុជាគឺខេត្តកណ្តាល និងខេត្តតាកែវ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានថ្លែងពីម្សិលមិញថា ជាការពិតក្នុងគោលការណ៍ដែលបានព្រមព្រៀងរវាងប្រទេសទាំង ២ កម្ពុជា-វៀតណាមគឺមិនអនុញ្ញាតឲ្យមានការសាងសង់ ឬធ្វើអ្វីមួយនាំឲ្យប៉ះពាល់ដល់ស្ថានភាពដើមនៃកំណត់ខ្សែព្រំដែនទាំងឡាយណាដែលមិនទាន់មានការឯកភាពគ្នានោះទេ។
លោកបន្តថា ការដែលមានការធ្វើអ្វីមួយដែលខុសនឹងគោលការណ៍គឺជាការរំលោភ កិច្ចព្រមព្រៀង ដែលទាមទារឲ្យប្រទេសវៀតណាមត្រូវតែរុះរើតង់ដែលបានសាងសង់នោះចេញដោយមិនត្រូវប្រើប្រាស់លេសអ្វីបន្តទៀតនោះទេ។
លោកបញ្ជាក់ថា៖ «បញ្ហាព្រំដែននេះកម្ពុជាតែងតែគោរព និងផ្តល់តម្លៃទៅដល់ប្រទេសជិតខាង និងច្បាប់នានា។ ប៉ុន្តែប្រទេសជិតខាងមួយចំនួនមិនសូវមានការគោរពនូវអ្វីនៅក្នុងកិច្ចព្រមព្រៀង សន្ធិសញ្ញា ដែលបានចុះ (ហត្ថលេខា) ជាមួយគ្នាទេ។ អ្វីដែលវៀតណាមរុះរើតង់បន្ថែមនោះ តាមពិតមិនមែនបន្ថែមទៀតគឺត្រូវតែរុះឲ្យអស់ពីតំបន់ហ្នឹង ព្រោះនេះគឺជាតំបន់ព្រំដែនដែលមិនទាន់មានកិច្ចព្រមព្រៀង ហើយមិនគួរគប្បីរង់ចាំដល់ពេលណាទៀតទេ»។
លោកសង្កត់ធ្ងន់បន្ថែមថា៖ «យើងមើលឃើញកន្លងមកនេះរដ្ឋាភិបាលកម្ពុជា លោកបានអនុញ្ញាតឲ្យមានការចេញចូលឡើងវិញនៃជនជាតិវៀតណាម ដោយគ្រាន់តែគោរពនូវគោលការណ៍របស់ក្រសួងសុខាភិបាល។ នេះល្មមនឹងអស់ហេតុផលអ្វីក្នុងការបង្ការការរីករាលដាលជំងឺកូវីដ១៩។ វាមិនមែនជាការឆ្លើយតបអ្វីជាមួយនឹងការបោះតង់នៅតំបន់ដែលមិនទាន់ដាច់ស្រេចនេះទេ បើសិនជាចង់បោះតង់ទៅបោះនៅលើទឹកដីរបស់ខ្លួនឯងទៅ»៕