.jpg)
ផ្សារគគីរស្ថិតក្នុងឃុំគគីរ ស្រុកកៀនស្វាយ ខេត្តកណ្តាលនាពេលកន្លងមក។ រូបថត ហ្វេសប៊ុក
កណ្តាល៖ លោក គង់ សោភ័ណ្ឌ អភិបាលខេត្តកណ្តាល បានសម្រេចបន្តផ្អាកដំណើរការ អាជីវកម្មផ្សារគគីរស្ថិតក្នុងឃុំគគីរ ស្រុកកៀនស្វាយ ជាបណ្តោះអាសន្នរយៈពេល ២ សប្តាហ៍ បន្តទៀត គិតចាប់ពីថ្ងៃទី២៧ ខែមេសា រហូតដល់ថ្ងៃទី១០ ខែឧសភា។
លោកបានឱ្យដឹងនៅថ្ងៃអង្គារ ទី២៧ មេសានេះថា ការផ្អាកនូវដំណើរការផ្សារគគីរជាបន្តទៀតនេះ គឺដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ និងសម្រាប់ការរៀបចំឡើងវិញឱ្យបានល្អប្រសើរ នៅទីតាំងលក់ដូរក្នុងផ្សារនេះ។
លោក គង់ សោភ័ណ្ឌ បានលើកឡើងថា ៖ «ក្នុងអំឡុងពេលនៃការបន្តផ្អាកជាបណ្តោះអាសន្ននេះ បងប្អូនអាជីវករ និងប្រជាពលរដ្ឋដែលបានពាក់ព័ន្ធផ្ទាល់ ឬដោយប្រយោល ក្នុងព្រឹត្តិការណ៍ឆ្លងរាលដាលនៃជំងឺកូវីដ ១៩ នៅក្នុងផ្សារនេះ ត្រូវបន្តចូលរួមសហការ និងយកសំណាកទៅធ្វើតេស្តជាបន្ទាន់»។
លោកថា ការយកសំណាកធ្វើតេស្តមាននៅមន្ទីរពេទ្យបង្អែកកៀនស្វាយ ឬមណ្ឌលសុខភាព សំរោងធំ ក្នុងស្រុកកៀនស្វាយ ព្រមទាំងត្រូវចូលរួមអនុវត្តន៍នូវវិធានការ៣ការពារ ៣កុំ និងវិធានការសុខាភិបាលជាចាំបាច់មួយចំនួនទៀត។
ដោយឡែក នៅថ្ងៃអង្គារ ទី២៧ ខែមេសា នេះដែរ អភិបាលខេត្តបន្ទាយមានជ័យ លោកអ៊ុ រាត្រី ក៏បានប្រកាសឲ្យផ្អាកអាជីវកម្មកាស៊ីណូទាំងអស់ជាបណ្តោះអាសន្នផងដែរ។
យោងតាមសេចក្តីសម្រេច លោកអ៊ុ រាត្រី បានបញ្ជាក់ថា អាជីវកម្មកាស៊ីណូទាំងអស់ដែលមានអនុស្សរណៈជាមួយនឹងក្រសួងសុខាភិបាលនៅក្នុងភូមិសាស្រ្តខេត្តបន្ទាយមានជ័យ ត្រូវបានបិទផ្អាកបណ្តោះអាសន្ន ចាប់ពីថ្ងៃនេះរហូតមានការជូនដំណឹងជាថ្មី៕
