.jpg)
មន្ត្រីពេលចុះពិនិត្យទីតាំងដែលគេលួចទន្ទ្រានយកដីព្រៃលិចទឹកពីថ្ងៃ ១៩ កុម្ភៈ។ រូបថត សហការី
កែបៈ អភិបាលខេត្តកែបបានដាក់បទបញ្ជាឱ្យគណៈបញ្ជាការឯកភាពរដ្ឋបាលស្រុកដំណាក់ចង្អើរ ស្រាវជ្រាវស្វែងរកជនខិលខូចដែលលួចកាប់ទន្ទ្រានដីព្រៃលិចទឹក (កោងកាង) ចំនួន ៣ ទីតាំង នៅភូមិទួលសាងាំ ឃុំអង្កោល ស្រុកដំណាក់ចង្អើរ លើផ្ទៃដីប្រមាណជិត ១០ ហិកតា និងធ្វើកំណត់ហេតុកសាងសំណុំរឿងបញ្ជូនទៅតុលាការដើម្បីផ្ដន្ទាទោសតាមផ្លូវច្បាប់។
លោក សោម ពិសិដ្ឋ អភិបាលខេត្តកែបប្រាប់ ភ្នំពេញ ប៉ុស្ដិ៍ ពីថ្ងៃទី ២១ កុម្ភៈថា បច្ចុប្បន្ននេះអាជ្ញាធរស្រុកបាននិងកំពុងឃ្លាំមើលនៅទីតាំងដែលមានការទន្ទ្រាននោះដោយមានការចូលរួមពីសំណាក់ពលរដ្ឋនៅមូលដ្ឋាន ព្រោះមន្ត្រីមិនអាចទៅឈរជើងនៅទីនោះ ២៤ ម៉ោង ដើម្បីឃ្លាំមើលបានទេ។ នៅពេលទទួលបានដំណឹងហើយ អាជ្ញាធរនឹងចុះទៅបង្ក្រាប និងស្វែងរកជនពាក់ព័ន្ធនានា ដែលពាក់ព័ន្ធករណីកាប់ទន្ទ្រានដីខុសច្បាប់នេះ។
លោក សោម ពិសិដ្ឋ បានឱ្យដឹងថា អាជ្ញាធរបានប្រទះឃើញមានការលួចដាំដើមដូងចំនួន ១៩៥ ដើមនៅទីនោះក្នុងគោលបំណងចង់កាន់កាប់ដីរដ្ឋលើផ្ទៃដីប្រមាណ ៣ ហិកតា ប៉ុន្តែអាជ្ញាធរបានដកបំផ្លាញ និងកម្ទេចចោលនៅទីកន្លែង ហើយបានដកបង្គោលរបងបេតុង ១១ ដើមផងដែរ។
លោក ពិសិដ្ឋ បានថ្លែងថា៖ «យើងប្រើពាក្យ ជនខិលខូច ឬជនឆ្លៀតឱកាសព្រោះវាមិនទាន់តុលាការចោទប្រកាន់ ពួកនេះមិនដែលធ្វើនៅពេលថ្ងៃទេ គេធ្វើនៅពេលយប់។ ករណីនេះកើតឡើងច្រើនណាស់ មន្ត្រីយើងមិនអាចទៅយាម ២៤ ម៉ោងបានទេ»។
បើតាមលោក សោម ពិសិដ្ឋ ជនខិលខូចដែលកាប់ឆ្ការព្រៃកោងកាងរួចដាំដើមដូង និងដើមចេកនៅលើដីនោះគឺមិនស្របច្បាប់ទេ ទោះបីអាជ្ញាធរដឹង ឬក៏មិនដឹងពីករណីនេះក៏ដោយ ក៏ដីនេះមិនអាចបំពេញនីតិសម្បទាឱ្យពួកគេកាន់កាប់ដោយស្របច្បាប់ដែរ ព្រោះវាជាដីរដ្ឋ។
លោកថ្លែងថា៖ «ខ្ញុំសូមអំពាវនាវ កុំយកគំរូអាក្រក់តាមជនឆ្លៀតឱកាសបែបនេះ។ សូមចូលរួមថែរក្សា ការពារធនធានធម្មជាតិរបស់ជាតិយើងឱ្យបានគង់វង្សយូរអង្វែងទាំងអស់គ្នា»។
លោក តូវ សុវណ្ណ អធិការនគរបាលស្រុកដំណាក់ចង្អើរបានឱ្យដឹងថា បន្ទាប់ពីទទួលបានបទបញ្ជាពីអភិបាលខេត្តកែបរួចមក លោកអភិបាលស្រុករួមនឹងកម្លាំងនគរបាលបានចុះទៅស្រាវជ្រាវ ប៉ុន្តែមកទល់ពេលនេះមិនទាន់បានកំណត់មុខសញ្ញា ឬដោះស្រាយយ៉ាងណាទេ។
លោកថ្លែងថា៖ «បច្ចុប្បន្ននេះ យើងកំពុងឃ្លាំមើល និងមិនទាន់កំណត់មុខសញ្ញាបានទេ។ ករណីនេះ អាជ្ញាធរស្រុកបាននិងកំពុងយកចិត្តទុកដាក់ដោះស្រាយហើយ»។
លោក អ៊ុប សុវណ្ណចាន់ថន អ្នកសម្របសម្រួលនៃអង្គការសិទ្ធិមនុស្សលីកាដូ ប្រចាំខេត្តកំពត និងកែបបានឱ្យដឹងថា លោកទទួលបានព័ត៌មានពីការកាប់ទន្ទ្រានដីព្រៃកោងកាង ឬដីលិចទឹកក្នុងឃុំអង្កោល ដើម្បីយកដីធ្វើជាកម្មសិទ្ធិនេះ ប៉ុន្តែលោកមិនទាន់បានដឹងមុខសញ្ញានៃជនដែលចូលទៅទន្ទ្រាននេះទេ។
លោក អ៊ុប សុវណ្ណចាន់ថន បានស្វាគមន៍ចំពោះចំណាត់ការរបស់លោកអភិបាលខេត្តកែបដែលបានចុះស្រាវជ្រាវរកមុខសញ្ញាជននៅពីក្រោយនៃការចូលទៅកាន់កាប់ដីដោយខុសច្បាប់នេះ ព្រោះកន្លងមកមានករណីចាក់ដីចូលក្នុងដីរដ្ឋដែរ ប៉ុន្តែដូចជាស្ងាត់ស្ងៀម។
លោក អ៊ុប សុវណ្ណចាន់ថន បានបញ្ជាក់ថា៖ «ខ្ញុំយល់ឃើញថា ករណីអ្នកដែលលួចកាប់ទន្ទ្រានដីព្រៃលិចទឹក (កោងកាង) នៅក្នុងឃុំអង្កោលនេះមិនមែនជាអ្នកតូចទេ គឺអ្នកធំ ហើយមានលុយ ទើបគេអាចមានគំនិតធ្វើអ៊ីចឹងបាន។ បើអ្នកតូចៗវិញគឺមិនអាចធ្វើទៅរួចទេ ដូច្នេះបើឯកឧត្តមអភិបាលខេត្តគាត់មានចំណាត់ការស្វែងរកជនខិលខូចយកមកផ្តន្ទាទោសតាមច្បាប់យើងខ្ញុំសូមសាទរ ព្រោះយើងមិនចង់ឱ្យមានការបាត់បង់ព្រៃឈើកោងកាងក្នុងតំបន់ឆ្នេរសមុទ្រនេះទេ»៕
