កំពង់ស្ពឺៈ លោក វ៉ី សំណាង អភិបាលខេត្ដកំពង់ស្ពឺ បានចេញដីកាប្រកាសបដិសេធ និងដកហូតដីព្រៃឈើ ២ទីតាំងស្ថិតនៅភូមិរមាំងស និងភូមិខ្ទេះ ឃុំតាសាល ស្រុកឱរ៉ាល់ មានទំហំសរុបជាង ២៨១ ហិកតាបន្ទាប់ពីទីតាំងដីនេះត្រូវបានជនខិលខូចជួលពលរដ្ឋទៅទន្ទ្រានកាន់កាប់ និងដាំដំណាំក្នុងគោលបំណងយកធ្វើជាកម្មសិទ្ធិដោយខុសច្បាប់។
យោងតាមដីកាស្ដីពីការប្រកាសបដិសេធ និងដកហូតដីព្រៃឈើទាំង ២ទីតាំងនេះ ចុះហត្ថលេខាដោយលោក វ៉ី សំណាង អភិបាលខេត្ដកំពង់ស្ពឺ នៅថ្ងៃទី១០ ខែឧសភានេះ បានចេញដីកាសម្រេចប្រកាសបដិសេធ និងដកហូតដីព្រៃ ដែលទទួលរងនូវការកាប់គាស់ រុករាន ទន្ទ្រានយកដីព្រៃរបស់រដ្ឋ ដើម្បីវាតយកដីធ្វើកម្មសិទ្ធិដោយខុសច្បាប់លើទីតាំងដីមួយកន្លែង ដែលមានផ្ទៃដីសរុប ១១០ ហិកតា ២អារ ត្រង់ចំណុចទីតាំងដីព្រៃស្ថិតនៅភូមិសាស្ត្រភូមិរមាំងស ឃុំតាសាល ស្រុកឱរ៉ាល់ ខេត្តកំពង់ស្ពឺ។
ប្រកាសបដិសេធ និងដកហូតដីព្រៃ ដែលទទួលរងនូវការកាប់គាស់ រុករានទន្ទ្រានយកដីព្រៃរបស់រដ្ឋ ដើម្បីវាតយកដីធ្វើកម្មសិទ្ធិដោយខុសច្បាប់លើទីតាំងដីមួយកន្លែង ដែលមានផ្ទៃដីសរុប ១៧១ហិកតា២៨អារ ត្រង់ចំណុច ទីតាំងដីព្រៃស្ថិតនៅភូមិសាស្ត្រភូមិខ្ទេះ ឃុំតាសាល ស្រុកឱរ៉ាល់ ។
លោកអភិបាលខេត្ដបញ្ជាក់ថា៖ «ទីតាំងដីនេះ បានទទួលរងនូវការកាប់គាស់ រុករានទន្ទ្រានដីព្រៃរបស់រដ្ឋយកធ្វើជាកម្មសិទ្ធិ។ ទីតាំងដីព្រៃឈើនេះ គឺស្ថិតនៅក្នុងតំបន់ការពារធម្មជាតិនៃឧទ្យានជាតិជួរភ្នំក្រវាញ ភូមិសាស្តខេត្តកំពង់ស្ពឺ»។
រដ្ឋបាលខេត្ដកំពង់ស្ពឺបានកំណត់រយៈពេល ៣០ថ្ងៃ នៃថ្ងៃធ្វើការសម្រាប់ទុកសិទ្ធិដើម្បីធ្វើការតវ៉ា។ ចំណែកបទប្បញ្ញត្តិទាំងឡាយណាដែលមានខ្លឹមសារផ្ទុយនឹងដីកានេះរដ្ឋបាលខេត្ដចាត់ទុកជានិរាករណ៍។
លោក វ៉ី សំណាង ថ្លែង ថា រដ្ឋបាលខេត្តកំពង់ស្ពឺ រដ្ឋបាលស្រុកឱរ៉ាល់ មន្ទីរបរិស្ថានខេត្តកំពង់ស្ពឺ ការិយាល័យឧទ្យានជាតិជួរភ្នំក្រវាញ អនុគណៈកម្មាធិការខេត្ត ក្រុមការងារដើម្បីទប់ស្កាត់ លុបបំបាត់ និងបង្ក្រាបការកាប់គាស់ រុករាន ទន្ទ្រានយកដីព្រៃរបស់រដ្ឋ ដើម្បីវាតយកដីធ្វើកម្មសិទ្ធិដោយខុសច្បាប់លើតំបន់ការពារធម្មជាតិ និងអ្នកពាក់ព័ន្ធនានា ត្រូវអនុវត្តន៍ដីកានេះឱ្យមានប្រសិទ្ធភាពខ្ពស់ចាប់ពីថ្ងៃចុះហត្ថលេខានេះតទៅ។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) បានឱ្យដឹងកាលពីម្សិលមិញថា ក្រោយពីមានដីកាដកហូតដីព្រៃដែលទន្រ្ទានដោយខុសច្បាប់នៅតំបន់ដែនជម្រកសត្វព្រៃ និងឧទ្យានជាតិហើយ លោកនឹងបន្តដាក់សំណើទៅអភិបាលខេត្តកំពង់ស្ពឺបន្ថែមទៀត ដើម្បីបង្កើតគណៈបញ្ជាការឯកភាពខេត្តចុះអនុវត្តដីកាដកហូតដីនេះឱ្យបានច្បាស់លាស់តាមច្បាប់។
លោកថ្លែងថា កន្លងមករដ្ឋបាលខេត្ដកំពង់ស្ពឺ បានចេញដីកាដកហូតដីព្រៃរបស់រដ្ឋ ដែលជនល្មើសចូលទៅ កាប់ទន្រ្ទាន វាតយកជាកម្មសិទ្ធិជាច្រើនទីតាំង ប៉ុន្ដែក្រោយពីចេញដីកា គឺមិនមានសកម្មភាពមន្រ្ដីអនុវត្ដច្បាប់ចុះទៅដកហូតដីនោះឱ្យស្របទៅតាមច្បាប់កំណត់នៅឡើយ ដែលនាំឱ្យជនល្មើសឆ្លៀតឱកាសលួចកាន់កាប់ដីនោះបន្តដដែល។
លោកបានបញ្ជាក់ថា៖ «បើរដ្ឋបាលខេត្ដចេញដីកាដកហូតហើយ ប៉ុន្ដែមន្រ្ដីអនុវត្ដច្បាប់មិនបានចុះអនុវត្ដដីកាដកហូត ជនល្មើសនៅតែបន្តកាន់កាប់ដីព្រៃរបស់រដ្ឋដដែល។ ជនល្មើសប្រើរូបភាពជាការដាំដំណាំផ្សេងៗ ដូចជា ដាំដើមដូង ដើមចេក ដែលដុះលូតលាស់ដំៗស្រាប់យកមកដាំនៅលើដីរបស់រដ្ឋ។ ការដាំបែបនេះរយៈពេលតែ១ឆ្នាំទៅ ២ឆ្នាំ ពួកគេនឹងអះអាងថា ដីនោះជាដីរបស់ពួកគេរស់នៅយូរឆ្នាំហើយទាមទារកាន់កាប់ជាកម្មសិទ្ធិស្របច្បាប់»។
លោក ជា ហ៊ាន សង្កេតឃើញថា ស្របពេលរាជរដ្ឋាភិបាល និងមន្រ្ដីនៅតាមបណ្ដាខេត្ដកំពុងជាប់រវល់លើការទប់ស្កាត់ការរីករាលដាលជំងឺកូវីដ១៩ ជនល្មើសបានឆ្លៀតឱកាសនេះ ដើម្បីទៅកាប់ទន្រ្ទានកាន់កាប់ដីព្រៃ និងដីឧទ្យានជាតិរបស់រដ្ឋ។
លោកបានស្នើដល់អាជ្ញាធរតាមបណ្ដាខេត្ដនីមួយៗ បន្តរឹតបន្ដឹងវិធានការច្បាប់ចំពោះជនល្មើស កុំឱ្យជនល្មើសយកលេសដែលរាជរដ្ឋាភិបាលកំណត់ឱ្យរដ្ឋបាលខេត្ដនីមួយៗកំណត់អន្តសញ្ញាណប្រជាពលរដ្ឋរស់នៅជាក់ស្ដែងយូរឆ្នាំលើដីព្រៃ ឬដីឧទ្យានជាតិរបស់រដ្ឋដើម្បីកាត់ឆ្វៀល ហើយលួចចូលទៅទន្រ្ទាន កាន់កាប់ដីរដ្ឋដោយខុសច្បាប់នៅកន្លែងផ្សេងជាបន្តទៀត៕