.jpg)
លោក វ៉ី សំណាង អភិបាលខេត្តកំពង់ស្ពឺ ក្នុងកិច្ចប្រជុំនាពេលកន្លងទៅ។ រូបថត រដ្ឋបាលខេត្តកំពង់ស្ពឺ
កំពង់ស្ពឺៈ អភិបាលខេត្តកំពង់ស្ពឺ លោក វ៉ី សំណាង បានដាក់បទបញ្ជាឱ្យអាជ្ញាធរពាក់ព័ន្ធ ចាប់ផ្តើមជូនដំណឹងដល់ម្ចាស់អាជីវកម្មសូមឱ្យរុះរើចេញជាបន្ទាន់នូវស្លាកប៉ាណូ ដែលបានលើកតាំងផ្សព្វផ្សាយ ផលិតផលស្រាបៀរផ្សេងៗ ខណៈការលក់ដូរស្រាបៀរគ្រប់ប្រភេទ នៅទូទាំងខេត្ត គឺនៅបន្តធ្វើការហាមឃាត់។
កាលពីថ្ងៃទី ២០ ខែឧសភា លោក វ៉ី សំណាង បានដឹកនាំកិច្ចប្រជុំបន្ទាន់មួយ ជាមួយគណៈកម្មការប្រយុទ្ធប្រឆាំងជំងឺកូវីដ១៩ ក្នុងក្របខ័ណ្ឌខខេត្តកំពង់ស្ពឺ ដោយក្នុងនោះថ្នាក់ដឹកនាំខេត្ត ក៏បានដាក់ចេញវិធានការនេះ ដោយបានចាត់អភិបាលរងខេត្តម្នាក់ ដើម្បីដឹកនាំចាត់វិធានការលើការងារនេះឱ្យមានប្រសិទ្ធភាព និងតម្លាភាពហើយមន្ទីរពាក់ព័ន្ធត្រូវចូលរួមអនុវត្ត។
លោក វ៉ី សំណាង បានប្រាប់ភ្នំពេញប៉ុស្តិ៍នៅថ្ងៃសុក្រនេះថា សម្តេចព្រះសង្ឃរាជ ជួន ណាត ជាអ្នកដើមកំណើតនៅខេត្តកំពង់ស្ពឺ ហើយត្រូវបានចាត់ជាអ្នកប្រាជ្ញ ដែលបានចងក្រងស្នាដៃនិពន្ធជាច្រើន រួមទាំងវចនានុក្រមខ្មែរសម្រាប់កូនចៅគ្រប់ជំនាន់ក្រោយៗប្រើប្រាស់ ហើយព្រះអង្គ ជាឈាមជ័រកូនកសិកររស់នៅខេត្តកំពង់ស្ពឺរហូតរៀងមក។
ដូច្នេះ លោកបញ្ជាក់ថា អ្នកខេត្តកំពង់ស្ពឺ គឺមិនមែនជាអ្នកដែលខ្ជឹលច្រអូស ដូចពាក្យគេតែងនិយាយ បង្អាប់ថា (អ្នកកំប៊ុងប៊ឺ រលាក់កងជើង) នោះដូចមុនទៀតទេ ហើយមួយវិញទៀត ក៏មិនមែនជាអ្នកផឹកស៊ីអ៊ួរទីនួរនោះដែរ។
លោកសង្កត់ធ្ងន់ថា៖ «ការទទួលទានស្រាគ្រឿងស្រវឹង ឬទឹកប្តូរនិស្ស័យ គឺធ្វើឱ្យមនុស្សប្រែនូវអត្តចរិត ប្រែនិស្ស័យ នាំឱ្យមានហិង្សាក្នុងគ្រួសារ និងនាំឱ្យមានការជួបជុំដែលប៉ះពាល់ដល់វិធានការទប់ស្កាត់ជំងឺកូវីដ១៩»។
លោកបញ្ជាក់ទៀតថា៖ «ចាប់ពីពេលនេះតទៅ សុំឱ្យមានការរុះរើប៉ាណូផ្សព្វផ្សាយផលិតផលស្រាបៀរទាំងអស់ចេញពីក្របខ័ណ្ឌដែនដីខេត្តកំពង់ស្ពឺ ដោយដាក់ជំនួសមកវិញនូវប៉ាណូទាំងឡាយណា ដែលជួយដល់សុខភាពពលរដ្ឋទូទៅ ព្រោះប៉ាណូ (ស្រាបៀរ) ទាំងនេះ វាគ្មានចំណេញអ្វីដល់សង្គមជាតិនោះទេ»។
លោក វ៉ី សំណាង បានលើកឡើងថា ការដែលខេត្តដាក់ចេញវិធានការនេះ គឺសំដៅដល់ការហាមឃាត់ការផ្សព្វផ្សាយផលិតផលស្រាបៀរដែលធ្វើឱ្យប៉ះពាល់ដល់សុខភាពប្រជាពលរដ្ឋសាធារណៈ ពិសេសប៉ះពាល់ដល់យុទ្ធនាការផ្សព្វផ្សាយវិធានការទប់ស្កាត់ការរីករាលដាលជំងឺកូវីដ១៩។
លោកបន្ថែមថា៖ «មិនទាន់ដឹងច្បាស់ថា វិធានការនេះយ៉ាងណាទេ ប៉ុន្តែដឹងតែទម្លាក់ហើយ ស្លាកស្រាបៀរនេះ។ គណៈកម្មការយើង កំពុងប្រជុំ និងដើរត្រួតពិនិត្យជាមុនសិន ថាតើកន្លែងណា ដែលយើងត្រូវធ្វើដូចដំបូង គឺកន្លែងទីសាធារណៈ»។
កាលពីថ្ងៃទី ១៨ ឧសភា រដ្ឋបាលខេត្តកំពង់ស្ពឺបានបន្តដាក់ចេញវិធានការរដ្ឋបាលបណ្តោះអាសន្នរយៈពេល ១ សប្តាហ៍បន្តទៀតរហូតដល់ថ្ងៃទី ២៤ ឧសភា ដោយហាមឃាត់សកម្មភាពមួយចំនួន ដូចជាការជួបជុំ ប្រមូលផ្តុំ ហូបគ្រឿងស្រវឹងជាដើម។
បន្ថែមពីនេះ ចំពោះភោជនីយដ្ឋាន អាហារដ្ឋាន តូបអាហារចល័ត គ្រប់ផ្សាររដ្ឋ ផ្សារឯកជន ផ្សារម៉ាត ហាងលក់ភេសជ្ជៈត្រូវផ្អាកការលក់គ្រឿងស្រវឹងគ្រប់ប្រភេទផងដែរ៕
