.jpg)
លោក វ៉ សំណាង អភិបាលខេត្តកំពង់ស្ពឺ។ ហេង ជីវ័ន
ភ្នំពេញៈ លោក វ៉ី សំណាង អភិបាលខេត្ដកំពង់ស្ពឺបានឲ្យដឹងកាលពីម្សិលមិញថាគិតត្រឹមឆ្នាំ ២០១៩ រដ្ឋបាលខេត្ដបានទទួលពាក្យបណ្ដឹងវិវាទដីធ្លីពីថ្នាក់ជាតិដែលបានទម្លាក់ទៅឲ្យថ្នាក់ខេត្តដោះស្រាយ និងបណ្ដឹងពីប្រជាពលរដ្ឋមូលដ្ឋានដោយផ្ទាល់សរុប ១៥២ ករណី ក្នុងនោះដោះស្រាយបានចំនួន ៥២ ករណី កំពុងបន្ដដោះស្រាយចំនួន ៥៧ ករណី ហើយ ៤៣ ករណីទៀតនៅមិនបានដោះស្រាយ ច្រានចោល និងត្រូវបញ្ជូនទៅរដ្ឋបាលក្រុង ស្រុក និងមន្ទីរពាក់ព័ន្ធ។
លោក វ៉ី សំណាង បានអះអាងបែបនេះក្នុងពេលធ្វើសន្និសីទសារព័ត៌មានស្តីពីវឌ្ឍនភាព និងទិសដៅបន្តរបស់រដ្ឋបាលខេត្តកំពង់ស្ពឺនៅទីស្តីការគណៈរដ្ឋមន្ត្រីកាលពីម្សិលមិញ។
លោកថ្លែងថា ចំពោះការដោះស្រាយវិវាទដីធ្លីតាមរយៈគណៈកម្មការសុរិយោដីខេត្តសរុបចាប់ពីថ្ងៃដំណើរការមានចំនួន ៣៣០ ករណី ស្មើនឹង ១ ៦៤៦ គ្រួសារ ផ្ទៃដីទំហំ ១២៩ ហិកតាដោយបានដោះស្រាយបញ្ចប់ ១៥១ ករណីកំពុងដោះស្រាយ ២៨ ករណីបានច្រានចោលបណ្ដឹង ១៥០ ករណី ដកពាក្យបណ្តឹង ១ ករណី។
លោក សំណាង ថ្លែងថា ការដោះស្រាយពន្លឿនករណីដែលនៅសេសសល់នេះ គឺជាសំណុំរឿងដែលមានការពាក់ព័ន្ធច្រើន ពិសេសមានឯកសារពាក់ព័ន្ធច្រើន។ រឿងខ្លះកើតឡើងតត្រកូលមានរយៈពេល ១០ ឆ្នាំក៏មាន។ ដូច្នេះករណីបែបនេះ គឺមានភាពស្មុគស្មាញក្នុងការដោះស្រាយ។
លោកបញ្ជាក់ថា ករណីវិវាទកើតឡើងច្រើនឆ្នាំបែបនេះគឺទាមទារឱ្យមានការស្រាវជ្រាវច្បាស់លាស់ក្នុងការដោះស្រាយ ដើម្បីកុំឱ្យភាគីណាមួយរងភាពអយុត្ដិធម៌។ លោកអភិបាលបញ្ជាក់ថា បច្ចុប្បន្នរដ្ឋបាលខេត្ដក៏កំពុងជំរុញការដោះស្រាយវិវាទដែលនៅសេសសល់នេះ តាមរយៈការដោះស្រាយក្រៅប្រព័ន្ធតុលាការដែរ។
លោកអភិបាលបានឱ្យដឹងដែរថា ការងារចុះបញ្ជីដីជាលក្ខណៈប្រព័ន្ធ អនុវត្តបានចំនួន ៥១៥ ភូមិ ក្នុង ៣២ ឃុំ-សង្កាត់នៃក្រុង ស្រុកទាំង ៨ នៃខេត្ដកំពង់ស្ពឺ។ សរុបចាប់ពីថ្ងៃចាប់ផ្តើមអនុវត្តមកដល់ខែធ្នូ ឆ្នាំ ២០១៩ បញ្ចូលទិន្នន័យបានចំនួន ៤០៨ ៩៣៨ ក្បាលដី និង បានចែកបណ្ណជូនប្រជាពលរដ្ឋចំនួន ៣៣៣ ៥៩២ បណ្ណ។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋបានឲ្យដឹងថា ការដោះស្រាយវិវាទដីធ្លីរបស់រដ្ឋបាលខេត្ដកំពង់ស្ពឺគឺនៅតែសេសសល់ច្រើន មិនទាន់បានដោះស្រាយបញ្ចប់ជូនដល់ប្រជាពលរដ្ឋនៅឡើយទេ។
លោក ហ៊ាន ថ្លែងថា៖ «ខ្ញុំស្នើឱ្យរដ្ឋបាលខេត្ដជំរុញពន្លឿនការដោះស្រាយបញ្ហាវិវាទដីធ្លីជូនដល់ប្រជាពលរដ្ឋឱ្យបានចប់រួចរាល់ក្នុងពេលឆាប់ៗ ដើម្បីផ្ដល់ភាពងាយស្រួលដល់ពលរដ្ឋទៅអាស្រ័យផល។ បើពលរដ្ឋដែលមានជីវភាពធូរធារ អាជ្ញាធរហាក់បីដូចជាដោះស្រាយបានលឿនបន្ដិច ព្រោះពួកគេបានទាមទារ។ ចំណែកពលរដ្ឋក្រីក្រយើងមិនសូវឃើញទទួលបានដំណោះស្រាយលឿននោះទេ»។
លោក ជា ហ៊ាន ថ្លែងថា សំណុំរឿងដែលលោកបានដឹង និងកំពុងអង្កេតមើលដែលរដ្ឋបាលខេត្ដកំពង់ស្ពឺមិនទាន់ដោះស្រាយមានទាំងនៅថ្នាក់ជាតិ និងថ្នាក់ក្រោមជាតិសរុបជាង ៣០ ករណី ដែលករណីទាំងនេះនៅសល់ជាច្រើនឆ្នាំមកហើយដោយករណីខ្លះព្រោះតែគ្មានដំណោះស្រាយ ទើបបញ្ជូនសំណុំរឿងឡើងទៅដល់ថ្នាក់ជាតិដើម្បីដោះស្រាយ។
លោកក៏បានអំពាវនាវដល់រដ្ឋបាលខេត្ដកំពង់ស្ពឺបន្តពន្លឿនការដកហូតដីពីក្រុមហ៊ុនដីសម្បទានដែលត្រូវបានតុលាការចេញដីកាដកហូត ប៉ុន្ដែដីទាំងនោះរដ្ឋបាលខេត្ដមិនទាន់បានអនុវត្ដដីកាចុះដកហូតនៅឡើយ។ លោកថា ករណីបែបនេះធ្វើឱ្យជនខិលខូចបន្តកាន់កាប់ដីរបស់រដ្ឋ ហើយជាច្រើនឆ្នាំទៅមុខនឹងបង្កជាបញ្ហាពិបាកដោះស្រាយ៕
