កំពង់ស្ពឺៈ អភិបាលខេត្តកំពង់ស្ពឺលោក វ៉ី សំណាងបានបង្ហាញពីក្តីសង្ឃឹមថា អាជ្ញាធរខេត្តនឹងដោះស្រាយបញ្ហាជម្លោះដីធ្លីដ៏រ៉ាំរ៉ៃរវាងប្រជាពលរដ្ឋនៅក្នុងស្រុកឱរ៉ាល់ និងក្រុមហ៊ុនស្ករសអំពៅភ្នំពេញឲ្យបានឆាប់ចប់ក្នុងពេលឆាប់ៗនេះ។
ការថ្លែងរបស់អភិបាលខេត្តកំពង់ស្ពឺនេះបានធ្វើឡើង បន្ទាប់ពីកាលពីសប្តាហ៍មុនក្រុមមន្ត្រីពីឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា (OHCHR) បានចុះទៅជួបអ្នកភូមិសួរនាំពីបញ្ហាវិវាទដីធ្លីនេះ។
ប្រជាពលរដ្ឋជាង ១៥០០ គ្រួសារនៅក្នុងស្រុកឱរ៉ាល់បានកើតមានជម្លោះដីធ្លីជាមួយក្រុមហ៊ុនស្ករសភ្នំពេញកាលពីអំឡុងឆ្នាំ ២០១០ ដែលបើតាមអ្នកភូមិ ជម្លោះដីធ្លីនេះបានកើតឡើងនៅពេលដែលក្រុមហ៊ុនបានប្រើគ្រឿងចក្រចូលទៅឈូសឆាយដីចម្ការរបស់ពួកគាត់ដើម្បីដាំអំពៅដោយពុំមានផ្តល់សំណង។
លោក វ៉ី សំណាង អភិបាលខេត្តកំពង់ស្ពឺបានឲ្យដឹងកាលពីម្សិលមិញថា អាជ្ញាធរខេត្តបានបញ្ចប់ការចុះស្រង់ស្ថិតិប្រជាពលរដ្ឋដែលគាត់បានអះអាងថាមានទំនាស់ដីធ្លីជាមួយក្រុមហ៊ុនកាលពីខែមុន។
លោកបញ្ជាក់ថា៖ «ឥឡូវហ្នឹងយើងកំពុងតែត្រួតពិនិត្យថា តើប្រជាពលរដ្ឋប៉ុន្មានគ្រួសារដែលជាប្រជាពលរដ្ឋពិតប្រាកដនៅក្នុងមូលដ្ឋាននោះ? ហើយប៉ុន្មានគ្រួសារដែលជាប្រជាពលរដ្ឋក្លែងក្លាយមកតាមរយៈអង្គការសង្គមស៊ីវិល? យើងសង្ឃឹមថា យើងនឹងធ្វើរឿងនេះឲ្យបានឆាប់ចប់។ យើងមិនទុកយូរទេ»។
លោក Simon Walker តំណាង (OHCHR) បានបញ្ជាក់នៅក្នុងអ៊ីមែលមួយកាលពីថ្ងៃអង្គារថា ការិយាល័យបានធ្វើការពិនិត្យតាមដានមើលដំណើរការដោះស្រាយសម្រាប់សហគមន៍ដែលរងផលប៉ះពាល់ដោយសារក្រុមហ៊ុនផលិតស្ករសនៅក្នុងខេត្តព្រះវិហារ កោះកុង កំពង់ស្ពឺ និងខេត្តឧត្តរមានជ័យ។
លោកបញ្ជាក់ថា៖ «ក្នុងអំឡុងពេលដែលការិយាល័យ OHCHR ធ្វើទស្សនកិច្ចទៅកាន់ខេត្តកំពង់ស្ពឺ OHCHR បានទទួលព័ត៌មានអំពីការផ្តួចផ្តើមដំណោះស្រាយស្របគ្នាដែលរៀបចំដោយក្រុមហ៊ុន»។
លោក Simon ថ្លែងថា៖ «ការិយាល័យរបស់ខ្ញុំនឹងបន្តតាមដានមើលបញ្ហាជម្លោះដីធ្លីនេះហើយក៏នឹងបន្តការសន្ទនាជាមួយភាគីពាក់ព័ន្ធទាំងអស់ និងលើកទឹកចិត្តដល់អាជ្ញាធរពាក់ព័ន្ធ ដើម្បីធានាថាដំណើរការស្វែងរកដំណោះស្រាយនេះគឺមានតម្លាភាព យុត្តិធម៌ និងមានប្រសិទ្ធភាព»។
អ្នកស្រី ខន កន អាយុ ៦២ ឆ្នាំរស់នៅឃុំត្រពាំងជោរ ស្រុកឱរ៉ាល់គឺជាអ្នកភូមិម្នាក់ក្នុងចំណោមអ្នកភូមិដែលបានជួបជាមួយមន្ត្រី OHCHR កាលពីសប្តាហ៍មុន។ អ្នកស្រីបានថ្លែងដោយសង្ឃឹមថាការចុះទៅរបស់មន្ត្រីទាំងនោះនឹងជួយសហគមន៍របស់អ្នកស្រីក្នុងការដោះស្រាយបញ្ហាជម្លោះដីធ្លីដែលអូសបន្លាយជាយូរមកហើយជាមួយក្រុមហ៊ុនស្ករសភ្នំពេញ។
អ្នកស្រី កន អាយុ ៦២ ឆ្នាំថ្លែងថាមន្ត្រី OHCHR បានជួបសួរនាំប្រជាពលរដ្ឋអស់រយៈពេលកន្លះព្រឹក។ ពួកគេសួរអ្នកភូមិអំពីដំណោះស្រាយ និងសំណង។ «ខ្ញុំសង្ឃឹមថាពួកគេចុះមកជួបយើងពេលនេះអាចផ្តល់ក្តីសង្ឃឹមដល់យើង។ អាជ្ញាធរឃុំបានប្រាប់យើងថា ក្រោយការបោះឆ្នោតពួកគេនឹងដោះស្រាយឲ្យយើង។ បន្ទាប់ពីពួកគេបណ្តេញយើងចេញខ្ញុំមិនដែលទទួលបានសំណងណាមួយពីពួកគេទេ សូម្បីតែ ១ កាក់ ១ សេន»។
អ្នកស្រីបន្តថា៖ «យើងបានប្រាប់ពួកគេថាមិនមានក្រសួងណាមកនិយាយជាមួយយើង ផ្តល់ដំណោះស្រាយដល់យើងនៅឡើយទេ។ វាស្ងាត់ខ្លាំងណាស់។ ខ្ញុំរីករាយណាស់នៅពេលខ្ញុំឃើញពួកគេចុះមក។ ខ្ញុំសង្ឃឹមថា ពួកគេអាចជួយធ្វើឲ្យមានដំណោះស្រាយឆាប់ៗ»។ អ្នកស្រីថ្លែងថា៖ «ខ្ញុំធ្លាប់ទៅភ្នំពេញជាច្រើនលើក។ ក្រសួងដែនដីសន្យាថាជួយយើង សន្យាថាពួកគេនឹងស្វែងរកដំណោះស្រាយបន្ទាប់ពីការបោះឆ្នោត ប៉ុន្តែឥឡូវនេះយើងមិនទាន់បានឃើញនរណាម្នាក់ចុះមកនោះទេ»។
អ្នកស្រី កន បានបាត់បង់ដី ៣ ហិកតាទៅក្រុមហ៊ុនស្ករសភ្នំពេញក្នុងឆ្នាំ ២០១០ ហើយកូនអ្នកស្រីបានបាត់បង់ដី ៤ ហិកតា។ អ្នកស្រីបន្តថា៖ «ដំបូងពួកគេឈូសឆាយដីចម្ការពោតរបស់យើង និងចម្ការសណ្តែកដី ហើយបន្ទាប់មកទៀតពួកគេបានដុតកម្ទេចផ្ទះរបស់យើង។ ខ្ញុំបានរស់នៅទីនោះតាំងពីខ្ញុំនៅពីក្មេង។ ក្រុមហ៊ុនស្ករសបានយកដីរបស់យើង»។
អ្នកស្រី កន បានទាមទារសំណងចំនួន ១៥០០០ ដុល្លារសម្រាប់ដី ៣ ហិកតារបស់អ្នកស្រី។ «ជីវិតរបស់ខ្ញុំត្រូវបានផ្លាស់ប្តូរទាំងស្រុងកាលពីមុនខ្ញុំមានអង្ករទុកហូប ខ្ញុំចិញ្ចឹមសត្វខ្ញុំមានសម្លៀកបំពាក់សមរម្យ។ ប៉ុន្តែឥឡូវនេះជីវិតរបស់ខ្ញុំផ្លាស់ប្តូរទាំងស្រុង ខ្ញុំត្រូវទិញអង្ករពីអ្នកដទៃហើយមិនមែនតែខ្ញុំទេអ្នកភូមិដទៃៗទៀតនៅក្នុងសហគមន៍របស់ខ្ញុំ ក៏អ៊ីចឹងដែរ ខ្ញុំពិតជាខឹងខ្លាំងណាស់ ចំពោះអ្នកដែលសន្យា ប៉ុន្តែមិនគោរពតាមការសន្យា»៕ PS/NS