កំពតៈ អភិបាលខេត្ដកំពត លោក ជាវ តាយ កំពុងពិចារណាដកហូត ឬមិនដកហូតដីមានប្លង់កម្មសិទ្ធិស្របច្បាប់ជាង ៤៥ ហិកតា នៅភូមិបឹងតាព្រាម សង្កាត់ត្រើយកោះ ក្រុងខេត្តកំពត ដែលបច្ចុប្បន្នដីនេះ ស្ថិតក្នុងសមុទ្រ ដោយត្រូវបានហាមឃាត់ការកាន់កាប់ដោយច្បាប់កម្ពុជា។
បន្ទាប់ពីធ្វើការស្រាវជ្រាវឃើញថា ដីដែលបានបោះបង្គោលចូលក្នុងសមុទ្រ គឺមានប្លង់ត្រឹមត្រូវតាមច្បាប់ ហើយដីនេះ ត្រូវបានរដ្ឋាភិបាលផ្តល់ឲ្យម្ចាស់ដីតាំងពីឆ្នាំ ២០០៨។ លោក ជាវ តាយ បានអះអាងថា លោកកំពុងពិចារណា និងសិក្សាតាមផ្លូវច្បាប់ ដើម្បីដកហូតដីនេះត្រឡប់ជាកម្មសិទ្ធិរបស់រដ្ឋវិញ។
លោកប្រាប់ភ្នំពេញប៉ុស្តិ៍ ពីម្សិលមិញថា៖ «ខ្ញុំកំពុងមានវិធានការលើបញ្ហានេះ សូមទុកពេលឲ្យខ្ញុំបន្តិចសិន។ ដូចខ្ញុំបានជម្រាបជូនហើយ»។
លោក ម៉ម ស៊ាប មេភូមិបឹងតាព្រាមប្រាប់ភ្នំពេញប៉ុស្តិ៍ពីម្សិលមិញថា ដីនេះពិតជាត្រូវបានរដ្ឋាភិបាលប្រគល់ជូនទៅប្រជាពលរដ្ឋទាំង ១២ គ្រួសារកាន់កាប់ស្របច្បាប់មែន បន្ទាប់ពីពួកគេ បានស្នើកែប្រែប្រភេទដីនេះ ទៅជាតំបន់ទេសចរណ៍ធម្មជាតិ ឬទេសចរណ៍កែច្នៃ ដើម្បីទ្រទ្រង់ជីវភាព។ លោកបានថ្លែងបន្តថា បន្ទាប់មក នៅឆ្នាំ ២០០៨ ពួកគេក៏បានស្នើសុំកាន់កាប់ដីនេះតែម្តង។
លោកអះអាងថា បច្ចុប្បន្ន ដីពលរដ្ឋទាំង ១២ គ្រួសារនេះ ត្រូវបានលក់ទៅឲ្យឈ្មួញអ្នកមានមួយចំនួន។
លោកមេធាវី សុក សំអឿន បានបញ្ជាក់ថា ជាទូទៅច្បាប់កម្ពុជា ឆ្នេរសមុទ្រ ឆ្នេរទន្លេ ជាទ្រព្យសម្បត្តិសាធារណៈរបស់រដ្ឋ ដែលមិនទាន់អាចអនុញ្ញាតឲ្យមានការកាន់កាប់ជាកម្មសិទ្ធិឯកជនរបស់បុគ្គលណាម្នាក់នោះទេ។
លោក សេង ឡូត អ្នកនាំពាក្យក្រសួងរៀបចំដែនដីនគរូបនីយកម្ម និងសំណង់ បានបដិសេធធ្វើអត្ថាធិប្បាយជុំវិញករណីនេះ ដោយអះអាងថា វាស្ថិតក្រោមការគ្រប់គ្រងរបស់អាជ្ញាធរដែនដី ហើយលោកក៏មិនបានដឹងរឿងនេះដែរ។
លោក ប៊ី វណ្ណី មន្ត្រីអង្កេតផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក ប្រចាំខេត្តកំពត ស្នើឲ្យអាជ្ញាធរ ដកហូតដីនេះត្រឡប់ជាកម្មសិទ្ធិរបស់រដ្ឋវិញ។ មន្ត្រីអង្កេតផ្នែកសិទ្ធិមនុស្សរូបនេះអះអាងថា បើទោះជា មានកម្មសិទ្ធិស្របច្បាប់យ៉ាងណាដោយ ។
ការលើកឡើងយ៉ាងដូច្នេះ ព្រោះតែលោកបានដាក់ការសង្ស័យថា ការកាន់កាប់ដីនេះអាចមានបញ្ហាលាក់បាំងណាមួយនៅពីក្រោយចំពោះការផ្តល់សិទ្ធិកាន់កាប់ពីស្ថាប័នពាក់ព័ន្ធ ជុំវិញការផ្តល់សិទ្ធិឲ្យមានការកាន់កាប់ដីក្នុងសមុទ្រ៕