កំពត៖ ខេត្តកំពតនឹងត្រូវមានអភិបាលខេត្តថ្មីបន្ទាប់ពីការគ្រប់គ្រងរបស់អភិបាលបច្ចុប្បន្ន លោក ចាន់ ចេស្តា បានរយៈពេលតែជាងមួយឆ្នាំកន្លះ។ នេះបើតាមព្រះរាជក្រឹត្យមួយដែលបានចុះហត្ថលេខាកាលពីថ្ងៃអង្គារ។
ព្រះរាជក្រឹត្យនេះតែងតាំងលោក ជីវ តាយ ជាអភិបាលខេត្តថ្មី ហើយបានបង្ហាញថា លោក ចេស្តា នឹងត្រូវទៅក្រសួងរុក្ខាប្រមាញ់និងនេសាទ។
លោក ចេស្តា ត្រូវបានតែងតាំងជាអភិបាលខេត្តកំពតកាលពីចុងខែមីនា ឆ្នាំ២០១៦បន្ទាប់ពីកាន់តំណែងជាអភិបាលខេត្តរងបានតែមួយសប្តាហ៍។ លោកកាលពីពេលមុនជាប្រធានមន្ទីរកសិកម្មខេត្ត។
នៅពេលទាក់ទងសុំអត្ថាធិប្បាយ លោក ចេស្តា មុនពេលដាក់ទូរស័ព្ទចុះបានថ្លែងថា៖ «សូមរង់ចាំរហូតទាល់តែមានពិធីផ្ទេរផ្លូវការ។ ខ្ញុំមិនទាន់ដឹងនៅឡើយទេថាតើខ្ញុំនឹងត្រូវបញ្ជូនទៅកន្លែងណា»។
ប្រធានរដ្ឋបាលខេត្ត លោក ស៊ីម វុទ្ធា បានថ្លែងថា រដ្ឋមន្រ្តីក្រសួងមហាផ្ទៃ លោក ស ខេង នឹងចូលរួមជាអធិបតីភាពក្នុងពិធីផ្ទេរតំណែងនៅថ្ងៃសុក្រ។ លោកបានថ្លែងថា លោក ចេស្តា «មានសមត្ថភាព»។
ទោះយ៉ាងណាក្តី អតីតមន្រ្តីជាន់ខ្ពស់ម្នាក់នៅក្នុងខេត្ត ដែលសុំមិនបញ្ចេញឈ្មោះ បានថ្លែងថា ការឡើងកាន់តំណែងយ៉ាងលឿនរបស់លោក ចេស្តា និងភាពទំនងជាមិនមានបទពិសោធបានធ្វើឲ្យនរណាម្នាក់ខឹង។
លោកបានកត់សម្គាល់ថា លោកមិនបានដឹងថាតើបញ្ហានៅថ្នាក់ខេត្តជាកត្តានាំឲ្យមានសេចក្តីសម្រេចថ្នាក់ជាតិក្នុងការបញ្ចប់តំណែងរបស់គាត់នោះទេ។
លោក តាយ ដែលបច្ចុប្បន្នមានតំណែងជាអភិបាលរងខេត្តកណ្តាល នៅពេលទាក់ទងកាលពីថ្ងៃពុធ បានកត់សម្គាល់ថា បទពិសោធរយៈពេល ១១ ឆ្នាំរបស់លោកធ្វើការក្នុងខេត្តកណ្តាល បានថ្លែងថា៖«ខ្ញុំនឹងបម្រើជាតិនិងប្រជាជន។ គ្មានអ្វីលើសពីនេះទៀតទេ»៕ PS