.jpg)
លោក សរ ចំរ៉ុង ដែលនឹងត្រូវផ្ទេរតំណែង ចេញពីអភិបាលខេត្តក្រចេះ។ រូបថត ហ្វេសប៊ុក
ភ្នំពេញៈអភិបាលខេត្តចំនួនពីររូប រួមមានអភិបាលខេត្តក្រចេះ ដែលបានចុះទៅមើលការប៉ះទង្គិចគ្នាដោយហិង្សារវាងអ្នកតវ៉ា និងនគរបាល កាលពីខែមីនា នឹងត្រូវផ្ទេរចេញពីតំណែងនាសប្តាហ៍នេះ។
ក្រុមមន្រ្តី កាលពីថ្ងៃទី ២៤ ខែមេសា បានថ្លែងថា ការផ្ទេរនេះ គឺជាការឆ្លាស់វេន ដោយសារអ្នកទាំងពីរជិតដល់ឬដល់អាយុចូលនិវត្តន៍។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានអះអាងថា អភិបាលខេត្តប៉ៃលិន លោក កើត សុធា បានដល់អាយុចូលនិវត្តន៍ ប៉ុន្តែបានទទួលស្គាល់ថា អភិបាលខេត្តក្រចេះលោក សរ ចំរុង នៅក្រោមអាយុចូលនិវត្តន៍។ លោក សុភ័គ បានថ្លែងពាក់ព័ន្ធនឹងអាយុចូលនិវត្តន៍របស់លោក ចំរុង ថា៖ «វាគ្រាន់តែមានការខុសគ្នាបន្តិចបន្តួច។ ក្រសួងមហាផ្ទៃ នឹងរកកន្លែងឲ្យពួកគេធ្វើការ»។
បើយោងតាមឯកសារមួយចុះថ្ងៃទី ២០ ខែមេសា និងទទួលបានកាលពីថ្ងៃទី ២៤ ខែមេសា លោក ចំរុង នឹងត្រូវជំនួសដោយអភិបាលរងបច្ចុប្បន្ន លោក វ៉ា ថន ដែលនឹងត្រូវចូលកាន់តំណែងនៅថ្ងៃទី ២៧ មេសា។
សារព័ត៌មាន Fresh News ដែលជាសារព័ត៌មានគាំទ្ររដ្ឋាភិបាល បានរាយការណ៍ថា លោក សុធា នឹងត្រូវជំនួសដោយអភិបាលរងរបស់លោក គឺលោក ផាន ចាន់ថុល ដែលនឹងត្រូវផ្ទេរតំណែងនៅថ្ងៃទី ២៦ ខែមេសានេះ។
អ្នកនាំពាក្យគណបក្សកាន់អំណាច លោក សុខ ឥសាន បានថ្លែងថា ការផ្ទេរនេះ មិនគួរមើលឃើញថា ជាការបណ្តេញចេញនោះទេ។ លោកបានថ្លែងបន្តថា៖ «នេះជាការវិនិច្ឆ័យអវិជ្ជមាន»។ លោកបានហៅការផ្ទេរពីសាលាខេត្ត ទៅក្រសួងមហាផ្ទៃថា ជាការដំឡើងឋានៈ។
លោកក៏បានបន្ថែមថា របាយការណ៍មិនច្បាស់លាស់ ដែលរាយការណ៍ថា ការដក លោក ចំរុង ពាក់ព័ន្ធនឹងការប៉ះទង្គិចនៅក្នុងខេត្តក្រចេះ គឺកើតចេញពី«ការវិភាគអគតិ»៕ PS
