កោះកុង/កំពតៈ អភិបាលខេត្តនៅតាមមាត់សមុទ្របានប្រកាសជំហរប្តេជ្ញាបន្តធ្វើការទប់ស្កាត់បទល្មើសចាក់ដីបំពាននៅតាមតំបន់ឆ្នេរ ដោយបានណែនាំឲ្យមន្ត្រីមូលដ្ឋានត្រូវត្រួតពិនិត្យឲ្យបានតឹងរ៉ឹងបន្ថែមទៀត និងត្រូវរាយការណ៍បើមានបទល្មើសកើតឡើង ដើម្បីចៀសវាងការទទួលពិន័យ។
ការប្រកាសជំហររបស់អាជ្ញាធរខេត្តជាប់មាត់សមុទ្រនេះធ្វើឡើង បន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី ២២ ខែធ្នូ បានបញ្ជាទៅលោក ជា សុផារ៉ា រដ្ឋមន្ត្រីក្រសួងរៀបចំដែនដី និងអភិបាលខេត្តជាប់មាត់សមុទ្រទាំង ៤ មានខេត្តកោះកុង កំពត កែប និងខេត្តព្រះសីហនុដោយធ្វើយ៉ាងណា ការពារតំបន់ឆ្នេរឲ្យបានពីការរំលោភបំពាន។
លោកនាយករដ្ឋមន្ត្រីថ្លែងថា៖ «ពិតមែនហើយយើងមានគណៈកម្មការឆ្នេរដែលមានឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដីជាប្រធាន និងមានរដ្ឋមន្ត្រីមួយចំនួនធ្វើជាអនុប្រធាន ក៏ប៉ុន្តែភារកិច្ចទទួលខុសត្រូវត្រូវតែជាគណៈអភិបាលខេត្តនីមួយៗត្រូវទទួលខុសត្រូវមើលឲ្យបានដិតដល់ឲ្យបានល្អិតល្អន់។ ហាមចាក់ដីនៅទីកន្លែងណាដែលគ្មានការអនុញ្ញាត»។
លោកស្រី មិថុនា ភូថង អភិបាលខេត្តកោះកុងប្រាប់ភ្នំពេញប៉ុស្តិ៍ពីម្សិលមិញថានៅក្នុងឆ្នាំ ២០១៩ នេះអាជ្ញាធរខេត្តបានចុះបង្ក្រាប និងទប់ស្កាត់ការរំលោភបំពានតំបន់ឆ្នេរ និងការចាក់ដីចូលសមុទ្រ ដើម្បីទន្ទ្រានយកដី ចំនួន ២ ករណី។ លោកស្រីបានបន្តថា បើប្រៀបធៀបទៅឆ្នាំមុនចំនួនបទល្មើសនេះមានការថយចុះ ហើយនៅឆ្នាំ ២០២០ ខាងមុខខេត្តនឹងអនុវត្តឲ្យកាន់តែមានប្រសិទ្ធភាពបន្ថែមទៀត។
លោកស្រីថា៖ «យើងនឹងបន្តអនុវត្តច្បាប់បន្តពង្រឹងការត្រួតពិនិត្យបន្ថែមទៀត ជាពិសេសអាជ្ញាធរមូលដ្ឋានជាមួយនឹងអង្គភាពពាក់ព័ន្ធ និងគណៈកម្មាធិការឆ្នេរដើម្បីធ្វើការត្រួតពិនិត្យបន្ថែមទៀត»។ ជាមួយនឹងការប្រកាសនេះលោកស្រី ភូថង បានលើកឧទាហរណ៍ករណីចាក់លុបសមុទ្រពីសំណាក់មន្ត្រីយោធាផ្កាយ ២ ដែលករណីនេះមន្ត្រីមូលដ្ឋានបានចូលរួមយ៉ាងមានប្រសិទ្ធភាពដោយបានប្តឹងដោយផ្ទាល់ទៅតុលាការ ដើម្បីចាត់វិធានការ។
លោក ជាវ តាយ អភិបាលខេត្តកំពតបានប្រាប់ភ្នំពេញប៉ុស្តិ៍ថា ដើម្បីទប់ស្កាត់បទល្មើសទាំងនេះអាជ្ញាធរមូលដ្ឋានត្រូវតែចូលរួមឲ្យបានសកម្ម និងត្រូវរាយការណ៍មកថ្នាក់ខេត្តបើឃើញមានករណីរំលោភបំពានកើតឡើងនៅក្នុងតំបន់របស់ខ្លួន។ លោកបន្តថាចាប់ពីនេះទៅគឺមិនអាចបណ្តែតបណ្តាយបាននោះទេ ចំពោះការរំលោភបំពានតំបន់ឆ្នេរ។
លោកថា៖ «បទល្មើសដែលចាក់ដីលើតំបន់ឆ្នេរហ្នឹងមិនមានអ្នកណាប្រាប់យើងមុនទេ ដូច្នេះរដ្ឋបាលខេត្តមានវិធានការ អ្នកណាដែលល្មើសច្បាប់គឺអនុវត្តច្បាប់ បើទោះមានករណីចាក់ចូលបន្តិចបន្តួចក៏តម្រូវឲ្យកាយវិញដែរ»។ លោកថា៖ «ដូចរាល់កិច្ចប្រជុំគណៈបញ្ជាការឯកភាពយើងតែងដាក់គោលដៅនៅតំបន់រដ្ឋបាលណាដែលកើតឡើង គឺត្រូវទទួលខុសត្រូវចំពោះមុខច្បាប់មិនអាចឆ្លើយថា មិនដឹងទេ»។
បើតាមលោក ជាវ តាយ នៅក្នុងឆ្នាំ ២០១៩ បទល្មើសរំលោភបំពានតំបន់ឆ្នេរសមុទ្រមានការកើនឡើងជាងឆ្នាំ ២០១៨ ហើយការកើនឡើងនេះដោយសារតែកត្តាដីក្នុងតំបន់នេះមានការឡើងថ្លៃដែលធ្វើឲ្យឈ្នួញ និងប្រជាពលរដ្ឋ តែងវាតទីទន្ទ្រានព្រែក ឆ្នេរសមុទ្រ ដើម្បីយកដី។
លោក ពេជ្រ ស្រស់ ប្រធានគណបក្សយុវជនកម្ពុជាថ្លែងថាក្នុងនាមលោកជាអ្នកតំណាងពលរដ្ឋម្នាក់លោកនឹងបន្តឃ្លាំមើលបន្តទៀត។ លោកថា៖ «ចំពោះការឃ្លាំមើលតំបន់ឆ្នេរទាំង ៤ ខេត្ត ខ្ញុំមិនបោះបង់ទេ ទោះបីមានការបញ្ជាពីសម្តេចតេជោយ៉ាងនេះក្តី។ ខ្ញុំនៅតែដាក់ភ្នែកខ្ញុំទាំងគូ នៅឯខេត្តទាំង ៤ នោះដើម្បីពិនិត្យមើលការចាក់រំលោភបំពានយកតំបន់ឆ្នេរហើយចំពោះករណីដែលរដ្ឋាភិបាលកំពុងធ្វើនេះ ខ្ញុំគាំទ្រ ព្រោះថាបើមានបទល្មើសគឺយើងត្រូវធ្វើការទប់ស្កាត់ និងបង្ក្រាប»។
បន្ថែមពីនេះលោក ស្រស់ ស្នើសុំ «កុំពន្យារពេលក្នុងការបង្ក្រាបគឺមានន័យថា ធ្វើឲ្យក្តៅដូចនៅខេត្តកោះកុងអ៊ីចឹង ព្រោះកាលណាតែយើងពន្យារពេលគឺធ្វើឲ្យរឿងស្ងប់ស្ងាត់ដែលធ្វើឲ្យជនខិលខូចបន្តការចាក់លុបទៀត។...គឺចង់ឲ្យអាជ្ញាធរខេត្តអនុវត្តឲ្យមានប្រសិទ្ធភាព និងឃ្លាំមើលឲ្យបានដិតដល់»៕