.jpg)
លោក អ៊ុំ រាត្រី អភិបាលខេត្តបន្ទាយមានជ័យ នាពេលកន្លងមក។ រូបថត រដ្ឋបាលខេត្តបន្ទាយមានជ័យ
បន្ទាយមានជ័យ៖ លោក អ៊ុំ រាត្រី អភិបាលខេត្តបន្ទាយមានជ័យ បានសម្រេចបង្កើតក្រុមការងារថ្នាក់ខេត្តមួយនៅថ្ងៃចន្ទនេះ ដើម្បីត្រៀមរៀបចំគ្រប់គ្រង និងចាត់ចែងបូជាសាកសព ដែលមានផ្ទុកមេរោគកូវីដ ១៩។
លោកបានលើកឡើងក្នុងសេចក្តីសម្រេចនេះថា ក្រុមការងារថ្នាក់ខេត្ត ដើម្បីត្រៀមរៀបចំ គ្រប់គ្រង និងចាត់ចែង សាកសពអ្នកដែលមានផ្ទុកមេរោគកូវីដ ១៩ មានតួនាទី និងភារកិច្ចក្នុងការពិនិត្យ និងតាមដានព័ត៌មានស្តីពីករណីអ្នកជំងឺកូវីដ ១៩ បានស្លាប់ដោយសារជំងឺកូវីដ ១៩ ជាប្រចាំ។
លោក អ៊ុំ រាត្រី បានបន្តថា៖ «ក្រុមការងារត្រូវជ្រើសរើសទីតាំងសម្រាប់រៀបចំឈាបនដ្ឋានបូជាសពអ្នកស្លាប់ដោយសារជំងឺកូវីដ ១៩ ដោយគិតគូរពីសុវត្ថិភាព និងមិនឱ្យប៉ះពាល់ដល់ប្រជាពលរដ្ឋដទៃឡើយ»។
ក្រុមការងារក៏ត្រូវរៀបចំក្រុមការងារបូជាសព និងបញ្ចុះសពសម្រាប់សាសនាអ៊ិស្លាមផងដែរ ហើយការបូជាសពត្រូវគោរពតាមវិធានការរបស់ក្រសួងសុខាភិបាល។
ក្រុមការងារនេះ ត្រូវរៀបចំប្រគល់អដ្ឋិធាតុជូនគ្រួសារសព ដើម្បីរៀបចំធ្វើបុណ្យតាមទំនៀមទម្លាប់ ប្រពៃណី និងសាសនា។
ជាមួយគ្នានេះ លោក អ៊ុំ រាត្រី បានណែនាំឱ្យក្រុមការងារថ្នាក់ខេត្ត ដើម្បីត្រៀមរៀបចំគ្រប់គ្រង និងចាត់ចែងសាកសព ដែលមានផ្ទុកមេរោគកូវីដ ១៩ រៀបចំកន្លែងបូជាសពជនជាតិខ្មែរនៅឈាបនដ្ឋានវត្តខ្លែងតំណ ស្ថិតក្នុងឃុំស្លក្រាម ស្រុកស្វាយចេក ឯការរៀបចំកន្លែងបញ្ចុះសពជនជាតិអ៊ិស្លាមត្រូវធ្វើនៅវត្តខ្លែងពណ៌ ក្នុងឃុំស្លក្រាម ស្រុកស្វាយចេក និងត្រូវអនុវត្តន៍ភារកិច្ចផ្សេងៗទៀត តាមវិធានការរបស់ក្រសួងសុខាភិបាល និងថ្នាក់ដឹកនាំខេត្ត។
លោកបានបញ្ជាក់ថា ចំពោះវិធានការបូជាសពចំពោះអ្នកស្លាប់ដោយសារជំងឺឆ្លងនេះ ត្រូវបានលើកលែងចំពោះជនជាតិខ្មែរអ៊ិស្លាម និងជនជាតិដើមភាគតិច ដោយធ្វើការបញ្ចុះសពឱ្យស្របទៅតាមជំនឿ ប្រពៃណី និងទំនៀមទម្លាប់របស់សាសនារបស់ពួកគេ៕
