.jpg)
លោក ខឹម មុនីកុសល ដែលត្រូវបានបណ្ដេញពីក្របខ័ណ្ឌរដ្ឋ នាពេលកន្លងទៅ។ រូបថត សហការី
ប៉ៃលិន៖ អភិបាលនៃគណៈអភិបាលខេត្តប៉ែលិនបានចេញលិខិតអញ្ជើញលោកគ្រូពេទ្យម្នាក់ ដែលត្រូវបានបណ្ដេញចេញពីក្របខ័ណ្ឌរដ្ឋ ដោយសារតែការបង្ហោះសារពីភាពអសកម្មដែលខ្លួនបានជួបប្រទះក្នុងពេលបំពេញការងារឲ្យចូលរួមបំភ្លឺនៅថ្ងៃអង្គារសប្តាហ៍នេះ ដើម្បីសម្រុះសម្រួលពាក់ព័ន្ធនឹងភារកិច្ចមុខងារសាធារណៈនៅថ្នាក់ក្រោម។
ការកោះអញ្ជើញនេះ ធ្វើឡើងបន្ទាប់ពីរដ្ឋបាលខេត្តប៉ៃលិន បានបង្កើតគណៈកម្មាធិការមួយដើម្បីដោះស្រាយសំណុំរឿងនេះ តាមបញ្ជាពីក្រសួងមុខងារសាធារណៈ ដែលទទួលពាក្យបណ្តឹងពីលោក ខឹម មុនីកុសល កាលពីខែមីនា។
លិខិតដែលផ្ញើជូន លោក ខឹម មុនីកុសល ចុះហត្ថលេខាដោយលោកស្រី បាន ស្រីមុំ អភិបាលខេត្តប៉ៃលិន ចុះថ្ងៃទី ១៣ ឧសភា បានឲ្យដឹងថា អភិបាលនៃគណៈអភិបាលខេត្តប៉ៃលិន សូមគោរពអញ្ជើញ លោក ខឹម មុនីកុសល ដើម្បីចូលរួមការសាកសួរព័ត៌មានបន្ថែម ស្តីពីការសម្រុះសម្រួលទំនាស់ពាក់ព័ន្ធនឹងកិច្ចការមុខងារសាធារណៈនៅថ្នាក់ក្រោមជាតិ។
លិខិតនេះបានបញ្ជាក់ថា «ការសាកសួរនេះ នឹងធ្វើឡើងក្រោមអធិបតីភាព ប្រធានគណៈកម្មាធិការសម្រុះសម្រួលទំនាស់ពាក់ព័ន្ធនឹងកិច្ចការមុខងារសាធារណៈនៅថ្នាក់ក្រោមជាតិវេលាម៉ោង ៨ នាទីព្រឹក នៅសាលប្រជុំក្រុមប្រឹក្សាសាលាខេត្តប៉ៃលិន»។
កាលពីថ្ងៃទី ១៩ មីនា លោកស្រី បាន ស្រីមុំ អភិបាលខេត្តប៉ៃលិនបានចេញលិខិតបណ្ដេញលោក ខឹម មុនីកុសល ចេញពីក្របខ័ណ្ឌរដ្ឋ ដោយសំអាងថា លោកបានប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ។ ការបណ្តេញនេះ ក៏ព្រោះតែលោកបានបង្ហោះសារលើហ្វេសប៊ុក រិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅមន្ទីរបក្សខេត្តប៉ៃលិន មិនជួយធ្វើការងារគ្រូពេទ្យខ្លះនោះទេ ហើយនាំគ្នាអង្គុយលេងតែ Facebook ក្នុងតង់ និងថតរូបបង្អួតគេឯងទៅវិញ។
លោក ខឹម មុនីកុសល បានប្រាប់ ភ្នំពេញ ប៉ុស្តិ៍ នៅថ្ងៃនេះថា ការដែលលោកបង្ហោះសារលើហ្វេសប៊ុក គឺគ្រាន់តែជាការបញ្ចេញមតិ និងបង្ហាញអារម្មណ៍ដែលបានជួបប្រទះ ដើម្បីស្វែងរកដំណោះស្រាយតែប៉ុណ្ណោះ។
លោកបន្តថា នេះគឺជាលើក ១ ហើយ ដែលគណៈអភិបាលខេត្ត ក្នុងនាមគណៈកម្មាធិការថ្មី បានកោះហៅលោកឲ្យចូលទៅបំភ្លឺចាប់តាំងពីមានការដកតំណែងរូបលោកមក។ ដូច្នេះ លោក ខឹម មុនីកុសល រំពឹងថា ការកោះហៅនេះ នឹងផ្តល់យុត្តិធម៌ដល់រូបលោក។
លោកបានបញ្ជាក់ថា៖ «ខ្ញុំបានត្រៀមខ្លួនចូលសម្រុះសម្រួលហើយ។ គ្រាន់តែខ្ញុំ មិនដឹងថា ពេលនោះ នឹងមានអ្វីកើតឡើងនោះទេ។ ក្តីរំពឹងខ្ញុំ គឺចង់បានការសម្រុះសម្រួលមួយ ដែលអាចទទួលបានទាំងអស់គ្នា មានសុខសន្តិភាពទាំងអស់គ្នាទៅថ្ងៃមុខ»។
លោក យិន ម៉េងលី មន្ត្រីសម្របសម្រួលសមាគមការពារសិទ្ធិមនុស្សអាដហុកខេត្តបាត់ដំបង និងប៉ៃលិនបានថ្លែងថា ការដែលរដ្ឋបាលខេត្តបានសម្រេចដកតំណែង លោក ខឹម មុនីកុសល ដោយមិនមានឆ្លងនីតិវិធីរដ្ឋបាលអ្វីនោះ គឺជារឿងដែលខុសទៅនឹងផ្លូវច្បាប់រួចទៅហើយ ព្រោះការសម្រេចនេះបានបង្ហាញថា ថ្នាក់ដឹកនាំ គឺធ្វើអ្វីតាមតែអារម្មណ៍។
លោកយល់ថា ការកោះអញ្ជើញលោក ខឹម មុនីកុសល នៅពេលនេះ ក៏ដោយសារតែមានការបង្កើតគណៈកម្មាធិការសម្រុះសម្រួលតាមរយៈការបញ្ជាពីក្រសួងមុខងារសាធារណៈ ដែលទាំងនេះ គឺជានីតិវិធីមួយត្រឹមត្រូវ។
លោកបញ្ជាក់ថា៖ «យើងស្វាគមន៍! យើងមិនដឹងថា ខាងភាគីណាខុស ភាគីណាត្រូវនោះទេ។ ប៉ុន្តែយើងចង់ឲ្យអាជ្ញាធរខេត្ត កុំប្រើប្រាស់សិទ្ធិអំណាចរបស់ខ្លួន ធ្វើអ្វីៗស្រេចតែចិត្ត និងតាមអារម្មណ៍របស់ខ្លួន។ យើងចង់ឲ្យអាជ្ញាធរខេត្តធ្វើអ្វីអនុលោមទៅតាមផ្លូវច្បាប់កុំយកការយល់ឃើញ ការមិនសប្បាយចិត្ត ក្នុងការសម្រេចបញ្ឈប់មន្ត្រីសាធារណៈណាមួយតាមតែអំពើចិត្ត»។
បន្ថែមពីនេះ លោក យិន ម៉េងលី សំណូមពរឲ្យគណៈកម្មាធិការសម្រុះសម្រួលទំនាស់ពាក់ព័ន្ធនឹងកិច្ចការមុខងារសាធារណៈនៅថ្នាក់ក្រោមជាតិនេះ ផ្តល់យុត្តិធម៌ដល់គូភាគី និងធ្វើការគោរពទៅតាមវិជ្ជាជីវៈ និងច្បាប់ដែលមាននៅកម្ពុជា ចំពោះករណីនេះផងដែរ៕
វីដេអូ៖
