.jpg)
លោក គួច ចំរើន និងក្រុមមន្ត្រីខេត្តក្នុងជំនួបជាមួយមន្ត្រី UN។ រូបថត សហការី
ព្រះសីហនុៈ លោក គួច ចំរើន អភិបាលខេត្តព្រះសីហនុចង់ឱ្យអង្គការសហប្រជាជាតិប្រចាំនៅកម្ពុជាជួយផ្ដល់ការគាំទ្រដើម្បីអភិវឌ្ឍសមត្ថភាពមន្ត្រីក្នុងការឈានទៅរកការរៀបចំគោលការណ៍អភិវឌ្ឍន៍ទីក្រុងព្រះសីហនុ តាមបែបទីក្រុងវៃឆ្លាត។
ការលើកឡើងនេះធ្វើឡើងបន្ទាប់ពីលោក គួច ចំរើន និងមន្ត្រីតំណាងអង្គការសហប្រជាជាតិបានជួបជជែកគ្នាកាលពីចុងសប្ដាហ៍មុនអំពីភាពរីកចម្រើននៅក្នុងខេត្តព្រះសីហនុ។
លោក គួច ចំរើន បានប្រាប់ភ្នំពេញប៉ុស្ដិ៍កាលពីថ្ងៃអាទិត្យថា ក្រុមការងារបច្ចេកទេសខេត្តព្រះសីហនុនឹងជួបគ្នាជាមួយក្រុមការងារបច្ចេកទេសរបស់អង្គការសហប្រជាជាតិជាថ្មីទៀតដើម្បីពិភាក្សាគ្នាបន្ថែមថាតើការអភិវឌ្ឍទីក្រុងវៃឆ្លាត (Smart City) ត្រូវរៀបចំអ្វីខ្លះ និងធ្វើអ្វីខ្លះ?
លោកបន្តថា ជាដំបូងនេះគឺលោកចង់ឱ្យខាង UN ជួយអភិវឌ្ឍសមត្ថភាពមន្ត្រីនៅខេត្តព្រះសីហនុជាមុនសិន ខណៈលោកមិនទាន់អាចបញ្ជាក់អំពីគម្រោងច្បាស់លាស់ប្រែក្លាយទីក្រុងព្រះសីហនុទៅជាទីក្រុងវៃឆ្លាតនៅឡើយទេ។
លោកថា៖ «ខ្ញុំមិនទាន់យល់ (អំពីទីក្រុងវៃឆ្លាត)។ បានសុំឱ្យគេ (UN) មកជួយ។ យើងទើបជួបជជែកគ្នា (កាលពីថ្ងៃទី ២៩ វិច្ឆិកា) ហើយក្រុមការងារមិនទាន់បានជួបគ្នាបន្តផង។ ថ្ងៃក្រោយ គាត់ (UN) ក៏មានក្រុមការងារបច្ចេកទេសគាត់និងក្រុមការងារបច្ចេកទេសខ្ញុំ ដើម្បីជួបពិភាក្សាគ្នាបន្តថាតើទីក្រុងវៃឆ្លាតមានស្អីខ្លះ ត្រូវធ្វើអីខ្លះ និងរៀបចំអីខ្លះ។ ឥឡូវយើងចេះតែហៅទីក្រុងវៃឆ្លាត ប៉ុន្តែស្អីទៅជាទីក្រុងវៃឆ្លាត»។
លោក គួច ចំរើន បន្ថែមថា ការជួបពិភាក្សាគ្នាអំពីគម្រោងប្រែក្លាយទីក្រុងព្រះសីហនុជាទីក្រុងវៃឆ្លាតរវាងលោក និងលោកស្រី Pauline Tamesis ប្រធានអង្គការសហប្រជាជាតិប្រចាំកម្ពុជាកាលពីថ្ងៃទី ២៩ វិច្ឆិកា គឺជាជំនួបដំបូងរវាងភាគីទាំង ២។
លោកស្រី Pauline Tamesis បានទៅជួបពិភាក្សាជាមួយលោក គួច ចំរើន ដើម្បីស្វែងយល់អំពីការអភិវឌ្ឍនៅក្នុងខេត្តព្រះសីហនុ។
ទំព័រហ្វេសប៊ុករបស់រដ្ឋបាលខេត្តព្រះសីហនុបានចុះផ្សាយថា អង្គការសហប្រជាជាតិចង់ចូលរួមចំណែកសហការជួយរដ្ឋបាលខេត្តព្រះសីហនុដែលខេត្តនេះចង់ធ្វើឱ្យក្រុងព្រះសីហនុក្លាយទៅជាទីក្រុងឆ្លាតវៃ ប្រកបដោយនិរន្តរភាព និងបរិយាប័ន្ន។
ទំព័រហ្វេសប៊ុកនេះសរសេរថា៖ «សម្រាប់អង្គការសហប្រជាជាតិយល់ឃើញវិធីមួយទៀតគឺការអភិវឌ្ឍឈានទៅទីក្រុងឆ្លាតវៃគឺការចូលរួមស្ដាប់មតិយោបល់របស់ប្រជាពលរដ្ឋចង់បានទីក្រុងប្រភេទណា។ ទី១ ផ្ដោតលើអ្នកវិនិយោគទុនដែលមានទស្សនៈយល់ឃើញចង់ឱ្យទីក្រុងល្អ ទី២ លក្ខណៈបរិយាប័ន្ន (ដែល) ការអភិវឌ្ឍទីក្រុងមិនសម្រាប់បុគ្គលមួយចំនួនគឺសម្រាប់ទាំងអស់គ្នា និងទី៣ ការគាំទ្រដល់រដ្ឋអំណាចមូលដ្ឋាន ដើម្បីដោះស្រាយបញ្ហាឆ្លើយតបទៅនឹងសេចក្ដីត្រូវការរបស់ប្រជាពលរដ្ឋ»។
នៅក្នុងជំនួបនោះលោក គួច ចំរើន បានគាំទ្រអង្គការសហប្រជាជាតិដែលចង់សហការអភិវឌ្ឍក្រុងព្រះសីហនុ ជាទីក្រុងវៃឆ្លាត ប៉ុន្តែលោកចង់ឱ្យខាង UN រៀបចំឯកសារធ្វើបទបង្ហាញទីក្រុងឆ្លាតវៃ និងបន្តធ្វើការងារជាមួយមន្ត្រីរបស់ខេត្ត ជាពិសេសជួយបណ្ដុះបណ្ដាលបច្ចេកវិទ្យា ក៏ដូចជាការផ្ដល់ឧបករណ៍ សម្ភារក្នុងការចូលរួមអភិវឌ្ឍក្រុងព្រះសីហនុជាទីក្រុងវៃឆ្លាត។
កាលពីដើមខែវិច្ឆិកាលោក គួច ចំរើន នៅពេលជួបពិភាក្សាជាមួយលោក Michael Newbill មន្ត្រីស្ថានទូតអាមេរិកក៏បានលើកឡើងអំពីផែនការ ដើម្បីធ្វើការអភិវឌ្ឍក្រុងព្រះសីហនុឱ្យក្លាយទៅជាទីក្រុងវៃឆ្លាតផងដែរ ហើយនៅពេលនោះលោក ឃាង ភារម្យ អ្នកនាំពាក្យសាលាខេត្តព្រះសីហនុបានលើកឡើងថា ទីក្រុងវៃឆ្លាតគឺផ្តោតលើរាល់ការគ្រប់គ្រងទីក្រុងទាំងអស់គឺត្រូវប្រើដោយប្រព័ន្ធបច្ចេកវិទ្យា ដូចជាការគ្រប់គ្រងសន្ដិសុខ សុវត្ថិភាព និងទេសចរណ៍ជាដើម៕
