.jpg)
ទិដ្ឋភាពនៅតំបន់ព្រែកកំពង់ស្មាច់ដែលមានផ្ទៃក្រឡាសរុប ៥ ៨៤៨ ហិកតា គ្របដណ្ដប់ឃុំចំនួន ៦ ក្នុងស្រុកព្រៃនប់ ខេត្តព្រះសីហនុ។ រូបថត មន្ទីរព័ត៌មានខេត្តព្រះសីហនុ
ព្រះសីហនុៈ លោក គួច ចំរើន អភិបាលខេត្ដព្រះសីហនុបានណែនាំដល់មន្ដ្រីជំនាញរបស់ខេត្ដឲ្យបង្កើតក្រុមការងារសិក្សាគ្រប់ជ្រុងជ្រោយលើទិន្នន័យសេដ្ឋកិច្ចនៅតំបន់ព្រែកកំពង់ស្មាច់ដើម្បីលើកកម្ពស់អេកូទេសចរណ៍ខណៈតំបន់នេះជាតំបន់គ្រប់គ្រងជលផលសមុទ្រអាទិភាពមានផ្ទៃក្រឡាសរុប ៥ ៨៤៨ ហិកតា គ្របដណ្តប់ឃុំចំនួន ៦ នៅក្នុងស្រុកព្រៃនប់។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុប្រាប់ភ្នំពេញប៉ុស្ដិ៍ កាលពីថ្ងៃម្សិលមិញថា នៅថ្ងៃទី ២០ ខែឧសភា លោក គួច ចំរើន អភិបាល ខេត្តព្រះសីហនុបានដឹកនាំកិច្ចប្រជុំជាមួយក្រុមការងារក្នុងការគ្រប់គ្រងតំបន់ជលផលសមុទ្រព្រែកកំពង់ស្មាច់។
លោកថ្លែងថា៖ «ឯកឧត្តម គួច ចំរើន បានធ្វើការណែនាំឲ្យបង្កើតក្រុមការងារដើម្បីបញ្ចេញមតិយោបល់គ្រប់ជ្រុងជ្រោយសិក្សាពីទិន្នន័យសេដ្ឋកិច្ចដើម្បីរកប្រភពចំណូល សម្រាប់ការការពារ ការអភិរក្ស និងការគ្រប់គ្រងតំបន់ព្រែកកំពង់ស្មាច់លើកកម្ពស់គម្រោង អេកូទេសចរណ៍តាមរយៈសហគមន៍លើកកម្ពស់ជីវភាពរស់នៅរបស់ប្រជាពលរដ្ឋមូលដ្ឋានបង្កើនសកម្មភាពសិក្សាស្រាវជ្រាវក្នុងតំបន់ឲ្យកាន់តែសម្បូរបែប»។
លោក ប្រាក់ វិសាល នាយកទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិនៃសាលាខេត្ដព្រះសីហនុបានធ្វើបទបង្ហាញពីព្រែកនេះនៅក្នុងកិច្ចប្រជុំជាមួយលោកអភិបាលខេត្ដថា ព្រែកកំពង់ស្មាច់ គឺជាព្រែកធម្មជាតិមួយដែលមិនចេះរីងស្ងួតទោះក្នុងរដូវប្រាំង។ ព្រែកនេះ គ្របដណ្តប់ចំនួន ៦ ឃុំនៃស្រុកព្រៃនប់ ខេត្តព្រះសីហនុ។ ព្រែកធម្មជាតិនេះទទួលទឹកពីដៃស្ទឹងតូចធំចំនួន ១៦ នៃតំបន់ជុំវិញ ពិសេសស្ទឹងមកពីភ្នំបូកគោ។
អ្នកនេសាទម្នាក់កំពុងចែវទូកនៅព្រែកកំពង់ស្មាច់ ខេត្តព្រះសីហនុ។ រូបថត មន្ទីរព័ត៌មានខេត្តព្រះសីហនុ
លោកឲ្យដឹងថា ព្រែកនេះមានប្រវែងជាង ១០ គីឡូម៉ែត្រ បានហូរចាក់ទៅឆកវាលរេញឆ្លងកាត់ផ្លូវជាតិលេខ ៣ (ខេត្តកំពត ស្រុកព្រៃនប់) ត្រង់ចំណុចស្ពានថ្មមួយហៅថាស្ពានកំពង់ស្មាច់។ នៅអមសងខាងផ្លូវមាត់ព្រែកមានដុះត្រៀបត្រាដោយព្រៃកោងកាងចំនួន ៣៩ ប្រភេទ។ ក្រៅពីនេះមានស្មៅសមុទ្រមានវាលល្បាប់ភក់អាចធ្វើស្រែបាន និងសម្បូរទៅដោយប្រភេទសត្វស្លាបផងដែរ។
លោកថ្លែងថា៖ «ព្រែកកំពង់ស្មាច់មានផ្ទៃក្រឡាសរុប ៥ ៨៤៨ ហិកតាក្នុងនោះផ្ទៃទឹក ២ ៨៧៩ ហិកតា ល្បាប់ភក់ ៧២ ហិកតាត្រូវបែងចែកជា ៣ កន្លែង កន្លែងអភិរក្សជលផល ៤៥៦ ហិកតាកន្លែងការពារជលផល ១ ០៨៥ ហិកតានិងកន្លែងប្រើប្រាស់ច្រើនយ៉ាង ១ ៣៥៦ ហិកតា»។
លោកបន្ថែមថា ព្រែកកំពង់ស្មាច់ ត្រូវបានចាត់ជាអាទិភាព ដើម្បីបង្កើតជាតំបន់គ្រប់គ្រងជលផលទី ២ បន្ទាប់ពីប្រជុំកោះរ៉ុង។ ព្រែកកំពង់ស្មាច់នេះ ត្រូវបានជ្រើសរើសជាតំបន់គ្រប់គ្រងជលផលសមុទ្រក្រោមជំនួយថវិកាពីអង្គការ PEMSEA តាំងពីឆ្នាំ ២០០៩ មកម្ល៉េះ។
ទោះជាយ៉ាងណា មន្ទីរព័ត៌មានខេត្ដព្រះសីហនុបានចុះផ្សាយកាលថ្ងៃពុធតាមរយៈហ្វេសប៊ុករបស់ខ្លួនថា សព្វថ្ងៃនេះព្រៃកោងកាង និងជលផលតំបន់ ព្រែកកំពង់ស្មាច់នេះបានរងនូវបញ្ហាប្រឈមមួយចំនួនដូចជាការកាប់ទន្ទ្រានព្រៃលិចទឹកដើម្បីអភិវឌ្ឍកសិកម្ម ការនេសាទខុសច្បាប់ការបោះសំណល់រឹងរាវចូលព្រែក និងការកាប់ព្រៃតាមមាត់ព្រែកវាតយកដីធ្វើកន្លែងលក់ដូរជាដើម។
លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្ដព្រះសីហនុថ្លែងកាលពីម្សិលមិញថា គោលនយោបាយអភិវឌ្ឍជាតិបានកំណត់ឲ្យមានការបង្កើតតំបន់អេកូទេសចរណ៍ឲ្យបានច្រើន។ ការបង្កើតតំបន់អេកូទេសចរណ៍នេះ បានចូលរួមលើកកម្ពស់សេដ្ឋកិច្ចប្រជាពលរដ្ឋនៅសហគមន៍ និងឲ្យពលរដ្ឋចូលរួមក្នុងការថែរក្សាធនធានធម្មជាតិផងដែរ។
លោកថ្លែងថា៖ «នៅតំបន់ព្រែកកំពង់ស្មាច់នៅពេលក្លាយជាតំបន់អេកូទេសចរណ៍បែបនេះអាចឲ្យពលរដ្ឋមានឱកាសលក់សេវាកម្មផ្នែកទេសចរណ៍នៅក្នុងសហគមន៍។ ពលរដ្ឋនាំគ្នាបញ្ឈប់ការបំផ្លាញធនធានធម្មជាតិដោយបែរមកនាំគ្នាថែរក្សា និងអភិរក្សវិញក្នុងនោះក៏មានពលរដ្ឋខ្លះបែរមកចិញ្ចឹមបង្គា និងធ្វើសេវាផ្គត់ផ្គង់ដល់ទេសចរផ្សេងទៀតនៅក្នុងតំបន់នេះ»៕
