.jpg)
លោក ជា សុផារ៉ា (ពាក់មួក) និងលោក កួច ចំរើន (ឆ្វេង) ពិនិត្យផ្លូវនៅខេត្តព្រះសីហនុ ខែកុម្ភៈ។ រូប រដ្ឋបាលខេត្ត
ព្រះសីហនុៈ រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់លោក ជា សុផារ៉ា បានសម្រេចតែងតាំងលោក គួច ចំរើន អភិបាលខេត្ដព្រះសីហនុជាប្រធានគណៈកម្មាធិការប្រើប្រាស់ និងបែងចែកដីខេត្ដនេះដោយមានតួនាទីនិងភារកិច្ចរៀបចំផែនការប្រើប្រាស់ដី និងលើកសំណើធ្វើចំណាត់ថ្នាក់ទីតាំងដីសម្បទានសង្គមកិច្ចប្រសិនបើចាំបាច់ជាដើម។
សេចក្ដីសម្រេចស្ដីពីការតែងតាំងសមាសភាពគណៈកម្មាធិការប្រើប្រាស់ និងបែងចែកដីខេត្ដព្រះសីហនុចុះហត្ថលេខាដោយលោក ជា សុផារ៉ា បានសម្រេចតែងតាំងសមាសភាពគណៈកម្មាធិការ ប្រើប្រាស់ និងបែងចែកដីខេត្ដព្រះសីហនុក្នុងនោះមានលោក គួច ចំរើន អភិបាលខេត្តជាប្រធានលោក លៀម សុជា អភិបាលរងជាអនុប្រធាន។ រីឯលោក ជួន ណារិន្ទ ស្នងការនៃស្នងការដ្ឋាននគរបាលខេត្ដព្រះសីហនុព្រមទាំងមន្ដ្រីនៅតាមមន្ទីរ និងអភិបាលស្រុកជាង ២០ រូបទៀតជាសមាជិក។
លោក ជា សុផារ៉ា បញ្ជាក់ថា៖ «គណៈកម្មាធិការប្រើប្រាស់ និងបែងចែកដីខេត្ដព្រះសីហនុមានតួនាទី និងភារកិច្ចរៀបចំផែនការប្រើប្រាស់ដី និងលើកសំណើធ្វើចំណាត់ថ្នាក់ទីតាំងដីសម្បទានសង្គមកិច្ច ប្រសិនបើចាំបាច់ និងធ្វើបច្ចុប្បន្នភាពប្រចាំឆ្នាំនូវទិន្នន័យដីទំនេររបស់រដ្ឋក្នុងខេត្ដ និងកំណត់មុខសញ្ញាអ្នកទទួលដី។ ធ្វើបច្ចុប្បន្នភាពប្រចាំឆ្នាំរាល់មុខសញ្ញាអ្នកទទួលដី និងសិក្សាកំណត់ទីតាំងដីដើម្បីអនុវត្ដផែនការសម្បទានដីសង្គមកិច្ចប្រចាំឆ្នាំ»។
សេចក្ដីសម្រេចនេះបញ្ជាក់ទៀតថាគណៈកម្មាធិការប្រើប្រាស់ និងបែងចែកដីខេត្ដព្រះសីហនុមានតួនាទី និងភារកិច្ចធ្វើសនិទានកម្មដីទំនេរឱ្យស្របទៅនឹងសេចក្ដីត្រូវការរបស់មុខសញ្ញាអ្នកទទួលដីនៅគ្រប់ក្រុង ស្រុក ខេត្ដ។ ពិនិត្យ និងវាយតម្លៃផែនការប្រើប្រាស់ដី និងផែនការសម្បទានដីសង្គមកិច្ចដែលស្នើឡើងដោយក្រុមប្រឹក្សាឃុំ-សង្កាត់។ សម្រេចយល់ព្រមលើផែនការប្រើប្រាស់ដី និងការបែងចែកដីរដ្ឋនៅថ្នាក់ខេត្ដ។ ជួយក្រុមប្រឹក្សាឃុំ-សង្កាត់ ដើម្បីរៀបចំផែនការប្រើប្រាស់ដី និងធ្វើចំណាត់ថ្នាក់ដី។ សម្រេចយល់ព្រម ឬបដិសេធ ឬកែសម្រួល ផែនការសម្បទានដីសង្គមកិច្ចដែលក្រុមប្រឹក្សាឃុំ-សង្កាត់បានស្នើឡើងជាដើម។
យោងតាមសេចក្ដីសម្រេចដដែលគណៈកម្មាធិការនេះមានតួនាទី និងភារកិច្ចបញ្ជូនផែនការសម្បទានដីសង្គមកិច្ច និងសេចក្ដីសម្រេចយល់ព្រមលើផែនការសម្បទានដីសង្គមកិច្ចទៅថ្នាក់ជាតិ ដើម្បីពិនិត្យ និងសម្រេច។ សម្របសម្រួលជាមួយក្រសួង ស្ថាប័នពាក់ព័ន្ធក្នុងការកសាងហេដ្ឋារចនាសម្ព័ន្ធរូបវន្តចាំបាច់មួយចំនួនដូចជាបណ្ដាញគមនាគមន៍ អណ្ដូងទឹក ស្រះសហគមន៍ មណ្ឌល ឬប៉ុស្ដិ៍សុខភាព និងសាលារៀនជាដើម។ ត្រួតពិនិត្យ និងវាយតម្លៃលើការអនុវត្ដសម្បទានដីសង្គមកិច្ចនៅតាមខេត្ដ។ សហការជាមួយអាជ្ញាធរមីនចំពោះទីតាំងដែលអាចមានសំណល់ជាតិផ្ទុះ។ បំពេញភារកិច្ចផ្សេងទៀតតាមការប្រគល់ឱ្យរបស់ប្រធានគណៈកម្មាធិការ។
លោក ជា សុផារ៉ា បញ្ជាក់តាមរយៈសេចក្ដីសម្រេចនេះថា៖ «សមាជិកគណៈកម្មាធិការប្រើប្រាស់ និងបែងចែកដីខេត្ដព្រះសីហនុត្រូវចូលរួមប្រជុំតាមការអញ្ជើញរបស់ប្រធាន។ ក្រុមការងារមានសិទ្ធិប្រើប្រាស់មន្ដ្រីក្រោមឱវាទឱ្យជួយការងារតាមការចាំបាច់»។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ថ្លែងពីម្សិលមិញថា ការសម្រេចតែងតាំងសមាសភាពគណៈកម្មាធិការនេះ គឺជាការផ្លាស់ប្ដូរតួនាទី។ ព្រោះកាលពីមុនលោក យន្ត មីន អតីតអភិបាលខេត្ដព្រះសីហនុជាប្រធាន។ ដូច្នេះនៅពេលលោក គួច ចំរើន ឡើងកាន់តំណែងថ្មីគឺត្រូវតែងតាំងជាប្រធានថ្មីវិញដែរ។
លោកថ្លែងថា៖ «នេះជាការផ្លាស់ប្ដូរតួនាទីថ្មីទៅតាមស្ថានភាពរដ្ឋបាលខេត្ដព្រះសីហនុ គេហៅថាធ្វើបច្ចុប្បន្នភាពគណៈកម្មាធិការនេះ។ គណៈកម្មាធិការនេះគឺរដ្ឋបាលខេត្ដ និងមន្ទីរពាក់ព័ន្ធធ្វើការងាររួមគ្នា។ គោលដៅធំចំពោះគណៈកម្មាធិការនេះ គឺលើការងារបែងចែកគ្រប់គ្រងដីសម្បទានសង្គមកិច្ចក្នុងខេត្ដព្រះសីហនុ។ ក្នុងកិច្ចការងារនេះគឺមាននីតិវិធីច្បាស់លាស់ណាស់ក្នុងការបែងចែកដីសម្បទានសង្គមកិច្ចទៅដល់ប្រជាពលរដ្ឋមិនមែនចេះតែយកដីទៅចែកទេ»។
លោក ឃាង ភារម្យ អ្នកនាំពាក្យសាលាខេត្តព្រះសីហនុថ្លែងពីម្សិលមិញដែរថាសេចក្ដីសម្រេចបង្កើតគណៈកម្មាធិការប្រើប្រាស់ និងបែងចែកដីនេះគឺជាការគ្រប់គ្រងបែងចែកដីសម្បទានសង្គមកិច្ចមិនមែនជាគណៈកម្មាធិការដោះស្រាយទំនាស់ដីធ្លីនោះទេ ហើយការតែងតាំងគណៈកម្មាធិការថ្មីនេះគឺជាការផ្លាស់ប្ដូរសមាសភាពថ្នាក់ដឹកនាំថ្មីប៉ុណ្ណោះ។
លោកថ្លែងថា៖ «គណៈកម្មាធិការនេះក្នុងថ្នាក់ខេត្ដគឺមានយូរហើយគ្រាន់តែថាជាការផ្លាស់ប្ដូរសមាសភាពថ្នាក់ដឹកនាំ ព្រោះកាលពីមុនកាលនៅឯកឧត្ដមយន្ត មីន ជាអភិបាលខេត្ដ គាត់ជាប្រធាន។ ដូច្នេះនៅពេលមានការផ្លាស់ប្ដូរថ្នាក់ដឹកនាំខេត្ដ សេចក្ដីសម្រេចត្រូវធ្វើឡើងវិញ។ ដោយឡែកសម្រាប់ផែនការ សកម្មភាពរបស់គណៈកម្មាធិការគឺរដ្ឋបាលខេត្តមាន អស់ហើយទីតាំងដីនោះក៏មានគឺធ្វើទៅតាមយន្តការរបស់រដ្ឋបាលខេត្ដដូចបានកំណត់នៅក្នុងសេចក្ដីសម្រេចនេះ»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) ប្រាប់ភ្នំពេញប៉ុស្ដិ៍ពីម្សិលមិញថា តាមរយៈគណៈកម្មាធិការនេះនឹងអាចកាត់បន្ថយភាពក្រីក្រដល់ប្រជាពលរដ្ឋក្នុងខេត្ដព្រះសីហនុ។ បើក្រុមការងារនេះមានឆន្ទៈធ្វើការងាររួមគ្នាមានប្រសិទ្ធភាពគឺប្រជាពលរដ្ឋក្រីក្រនឹងមានលំនៅឋានរស់នៅសមរម្យ។ ក្រុមការងារនេះក៏អាចធ្វើជំរឿនដីរបស់រដ្ឋនៅក្នុងខេត្ដព្រះសីហនុបានលឿន និងឆាប់រហ័ស។
លោកបានថ្លែងថា៖ «ប៉ុន្ដែដើម្បីការពារការរំលោភយកដីសម្បទានសង្គមកិច្ចនេះ គួរមានការចុះបញ្ជីដីសម្បទានសង្គមកិច្ចទាំងអស់ក្នុងខេត្ដព្រះសីហនុ។ ប៉ុន្ដែ ដើម្បីឱ្យការងាររបស់គណៈកម្មការនេះដំណើរការទៅកាន់តែរលូនគួរតែមាន [ការ] ដាក់បញ្ចូលក្រុមការងារមួយទៀត ឬហៅថាអនុគណៈកម្មការមកពីអង្គការសង្គមស៊ីវិលដើម្បីជួយលើការងារនេះនៅពេលចុះអនុវត្ដការងារជាក់ស្ដែងក្នុងទីតាំងណាមួយដើម្បីចូលរួមតាមដានការងារឱ្យមានប្រសិទ្ធភាពខ្ពស់»៕
