ព្រះសីហនុៈ អភិបាលខេត្តព្រះសីហនុ លោក គួច ចំរើន សម្រេចលុបចោលការធ្វើចត្តាឡីស័កចំពោះអ្នកដំណើរតាមជើងយន្តហោះពីភ្នំពេញនិងខេត្តសៀមរាបទៅខេត្តព្រះសីហនុ ដែលជើងហោះហើរទាំង ២ តំបន់នេះ ត្រូវចុះចតនៅព្រលានយន្តហោះអន្តរជាតិកងកេងក្នុងស្រុកព្រៃនប់។
លោក គួច ចំរើន បានបញ្ជាក់ក្នុងសេចក្តីសម្រេចចុះថ្ងៃទី៥ ខែឧសភានេះ ថា៖ «ត្រូវបានលុបចោលសេចក្តីសម្រេចលេខ ១២៧/២១ សសរ ចុះថ្ងៃទី២៩ ខែមេសា ឆ្នាំ២០១១ របស់រដ្ឋបាលខេត្តព្រះសីហនុ ស្តីពីការដាក់ឱ្យធ្វើចត្តាឡីស័កចំពោះអ្នកធ្វើដំណើរចូលមកក្នុងភូមិសាស្ត្រខេត្តព្រះសីហនុ តាមរយៈជើងហោះហើរពីរាជធានីភ្នំពេញ និង ខេត្តសៀមរាប ដើម្បីទប់ស្កាត់ការឆ្លងរាលដាលនៃជំងឺកូវីដ១៩»។
សេចក្តីសម្រេច កាលពីថ្ងៃទី២៩ ខែមេសានោះ បានតម្រូវឱ្យធ្វើចត្តាឡីស័ករយៈពេល ១៤ថ្ងៃ ចំពោះអ្នកដំណើរទាំងអស់ដែលបានធ្វើដំណើរចូលមកក្នុងភូមិសាស្ត្រខេត្តព្រះសីហនុ តាមជើងហោះហើរពីរាជធានីភ្នំពេញនិងខេត្តសៀមរាប។ ការសម្រេចនាពេលនោះគឺដើម្បីធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ១៩ ក្នុងភូមិសាស្ត្រដែលត្រូវបានកំណត់ដោយក្រសួងសុខាភិបាលថា មានការឆ្លងរាលដាលនៃជំងឺកូវីដ១៩ ក្នុងព្រឹត្តិការណ៍សហគមន៍ ២០ កុម្ភៈ។
ប៉ុន្តែសេចក្តីសម្រេចមុននោះបានលើកលែងការធ្វើចត្តាឡីស័កចំពោះអ្នកដំណើរឆ្លងកាត់ដែលមានគោលដៅទៅប្រទេសផ្សេង, អ្នកដំណើរទៅមន្ទីរពេទ្យ មណ្ឌលសុខភាព សម្ភព ឬទីកន្លែងព្យាបាលដោយមូលហេតុសុខភាពបន្ទាន់, អ្នកដំណើរដែលជាបុគ្គលិកក្រុមគ្រូពេទ្យទាំងផ្នែករដ្ឋនិងឯកជន មន្ត្រីរាជការ ក្រុមពន្លត់អគ្គិភ័យ កងកម្លាំងប្រដាប់អាវុធគ្រប់ប្រភេទ ដើម្បីបំពេញបេសកកម្មជូនស្ថាប័នឬអង្គភាព,និងអ្នកដំណើរដែលមានមូលហេតុចាំបាច់និងបន្ទាន់ផ្សេងទៀត ដែលមានការអនុញ្ញាតជាមុនពីអាជ្ញាធរមានសមត្ថកិច្ច។
លោក ឃាង ភារម្យ អ្នកនាំពាក្យសាលាខេត្តព្រះសីហនុបានប្រាប់ភ្នំពេញប៉ុស្តិ៍ នៅថ្ងៃទី ៥ ខែឧសភា នេះថា ការលុបចោលការធ្វើចត្តាឡីស័កនេះដោយសារនៅរាជធានីភ្នំពេញមានការលុបចោលតំបន់ក្រហមមួយចំនួនដូចគ្នា ដោយផ្លាស់ប្តូរទៅជាការបង្កើតជាវិធានការសុខាភិបាល។
លោកថ្លែងថា៖ «អ៊ីចឹង ការធ្វើដំណើរពីរាជធានីភ្នំពេញតាមជើងហោះហើរមកកាន់ខេត្តព្រះសីហនុ ក៏ដូចជាពីសៀមរាបមកកាន់ព្រលានយន្តហោះអន្តរជាតិ ខេត្តព្រះសីហនុគឺយើងក៏បានលុបនូវសេចក្តីសម្រេចរបស់យើង [ដែល] កន្លងមកតម្រូវឱ្យធ្វើចត្តាឡីស័ក ១៤ថ្ងៃ។ ឥឡូវនេះ គឺយើងលុបចេញ មិនមានការធ្វើចត្តាឡីស័កទេ»។
ក៏ប៉ុន្តែលោក ភារម្យ បានបញ្ជាក់ថា ក្រុងព្រះសីហនុនៅតែកំណត់ជាតំបន់បិទខ្ទប់ដដែល ហើយមកទល់ពេលនេះមិនទាន់មានសេចក្តីសម្រេចលុបចោលឬលើកលែងក្រុងព្រះសីហនុពីតំបន់បិទខ្ទប់នៅឡើយទេ។
លោកថា៖ «ការដែលហោះពីភ្នំពេញ ឬក៏សៀមរាបចូលមកខេត្តព្រះសីហនុនៅព្រលានយន្តហោះអន្តរជាតិកងកេងហ្នឹង គឺស្ថិតក្នុងភូមិសាស្ត្រស្រុកព្រៃនប់ទេ»។
បើតាមលោក ភារម្យ រដ្ឋបាលខេត្តព្រះសីហនុបាននិងកំពុងពិចារណាទៅលើលក្ខខណ្ឌមួយចំនួន «ដែលអាចនឹងកំពុងពិភាក្សាឆ្លង» ដើម្បីធានាថាអ្នកដំណើរតាមជើងហោះហើរទាំងនេះមិនមានផ្ទុកនូវវីរុសកូវីដ១៩។
លោកថា៖ «ប៉ុន្តែ ដោយសារលិខិតផ្លូវការយើងកំពុងតែជជែកពិភាក្សាគ្នាអត់ទាន់សម្រេច អ៊ីចឹងហើយបានខ្ញុំអត់ទាន់អាចផ្តល់ព័ត៌មានយកទៅធ្វើការផ្សព្វផ្សាយបាន»៕