មណ្ឌលគិរី៖ លោក ស្វាយ សំអ៊ាង អភិបាលខេត្តមណ្ឌលគិរី បានណែនាំដល់បណ្តាក្រុមហ៊ុនដែលទទួលបានដីសម្បទានសេដ្ឋកិច្ចទាំងអស់ពីរដ្ឋាភិបាល ត្រូវធ្វើផ្លូវ ឬព្រំព័ទ្ធជុំវិញដីរបស់ខ្លួនឲ្យបានច្បាស់លាស់ ដើម្បីចៀសវាងមានការកាប់ទន្រ្ទាន ឬវាទយកដីធ្វើជាកម្មសិទ្ធិពីអ្នកផ្សេងទៀត។
ការណែនាំនេះ បានធ្វើឡើងក្នុងអំឡុងពេល លោកដឹកនាំក្រុមការងារចុះពិនិត្យមើលវឌ្ឍនភាពរបស់ក្រុមហ៊ុន ផេស៊ីហ្វិកយ៉ញស្តុក ខមភេនី លីមីធីត ស្ថិតនៅក្នុងភូមិរវាក់ ឃុំរយ៉ ស្រុកកោះញែក ខេត្តមណ្ឌលគិរី កាលពីថ្ងៃទី ០៩ ខែ ឧសភា ឆ្នាំ ២០២១។
ក្នុងការចុះពិនិត្យលោក ស្វាយ សំអ៊ាង បានណែនាំយ៉ាងដូច្នេះថា៖ «ក្រុមហ៊ុនត្រូវធ្វើរបង ឬធ្វើផ្លូវព័ទ្ធជុំវិញដីសម្បទានសេដ្ឋកិច្ច ដែលបានវិនិយោគឲ្យបានច្បាស់លាស់ ដើម្បីចៀសវាងមានការចូលកាប់ទន្រ្ទានយកដីធ្វើជាកម្មសិទ្ធិពីបុគ្គលមួយចំនួន។ ជាពិសេសក៏សូមឲ្យក្រុមហ៊ុនមួយៗ ត្រូវគោរពតាមគោលការណ៍របស់រាជរដ្ឋាភិបាល»។
ក្រៅពីនេះ លោក ស្វាយ សំអ៊ាង ក៏បានណែនាំទៅដល់សមត្ថកិច្ច និងអាជ្ញាធរដែនដីទាំងអស់ ត្រូវសហការគ្នាដើម្បីទប់ស្កាត់ និងបង្ក្រាបបទល្មើសធនធានធម្មជាតិឲ្យមានប្រសិទ្ធភាពផងដែរ។
លោក ជាក់ ម៉េងហ៊ាង អភិបាលរង និងជាអ្នកនាំពាក្យសាលាខេត្តមណ្ឌលគិរីបានប្រាប់ ភ្នំពេញ ប៉ុស្តិ៍ បន្ថែមនៅថ្ងៃនេះថា ក្នុងភូមិសាស្ត្រខេត្តមណ្ឌលគិរីទាំងមូល គឺមានក្រុមហ៊ុនឯកជនដែលទទួលបានដីសម្បទានសេដ្ឋកិច្ចពីរដ្ឋាភិបាលជាង ២០ ក្រុមហ៊ុន ដោយមានផ្ទៃដីសរុបប្រមាណ ២០ ម៉ឺនហិកតា។
លោកបន្តថា ក្រុមហ៊ុនទាំងនោះក៏បានធ្វើអាជីវកម្មតាមរយៈការដាំដំណាំ និងកៅស៊ូ ស្របពេលដីមួយចំនួនក៏ត្រូវបានទុកចោល ដែលជាហេតុនាំឲ្យមានការកាប់ទន្រ្ទានវាទយកដោយខុសច្បាប់។
លោកបញ្ជាក់ថា៖ «ចំពោះការណែនាំទៅកាន់ក្រុមហ៊ុនទាំងអស់ យើងមិនទាន់មានរបាយការណ៍ថា មានក្រុមហ៊ុនណាបានធ្វើព្រំ ឬផ្លូវហើយនោះទេ ព្រោះនេះជាការណែនាំភ្លាមៗ។ ប៉ុន្តែគ្រាន់តែមានក្រុមហ៊ុនសម្បទានសេដ្ឋកិច្ចមួយចំនួន គឺគាត់បានធ្វើជាស្លាកសញ្ញា និងសញ្ញាសម្គាល់លើទីតាំងដីរបស់ពួកគាត់ជាបណ្តើរៗហើយ»។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិសហគមន៍នៃសមាគមការពារសិទ្ធិមនុស្សអាដហុក បានលើកឡើងថា ការកំណត់ព្រំប្រទល់ដីរបស់ក្រុមហ៊ុន គឺគួរតែធ្វើឡើងជាយូរណាស់មកហើយ។
ប៉ុន្តែលោកមើលឃើញថា បញ្ហាដែលនៅតែមិនអាចកំណត់ព្រំប្រទល់បានច្បាស់លាស់ ក៏ព្រោះតែក្រុមហ៊ុន និងមន្ត្រីពាក់ព័ន្ធមួយចំនួនបានយកភាពស្រពេចស្រពិល ឬភាពមិនច្បាស់លាស់នេះ ដើម្បីធ្វើជាផលប្រយោជន៍របស់ពួកគេ។
លោកបញ្ជាក់ថា៖ «បើគិតទៅរឿងនេះ យើងធ្វើក្នុងពេលនេះ គឺយឺតមហាយឺតហើយ ដែលកន្លែងសម្បទានខ្លះ គឺក្រុមហ៊ុនបានវាទដីកាប់យកឈើនៅខាងក្រៅដីសម្បទានរបស់ខ្លួន។ បើសិនជាការបញ្ជាឲ្យមានការកំណត់ព្រំប្រទល់បានត្រឹមត្រូវនឹងផ្តល់ផលប្រយោជន៍ច្រើន ព្រោះរឿងល្មើសដែលបានកើតពីមុនមកនឹងត្រូវបានបង្ហាញ»។
យ៉ាងណាក្តី លោក ប៊ុណ្ណារ៍ សង្ឃឹមថា នៅពេលដីសម្បទានសេដ្ឋកិច្ចទាំងនោះ ត្រូវបានកំណត់ព្រំបានច្បាស់លាស់ នោះបញ្ហាដែលបណ្តាលឲ្យមានជម្លោះដីធ្លី ក៏អាចនឹងត្រូវបានកាត់បន្ថយ ឬទប់ស្កាត់បានដែរ។ បន្ថែមពីនេះ លោកយល់ថា ការប្រព្រឹត្តបទល្មើសព្រៃឈើ និងបទល្មើសធនធានធម្មជាតិដទៃទៀត ក៏អាចនឹងត្រូវបានទប់ស្កាត់បានច្រើនជាងមុនផងដែរ៕