.jpg)
ដីព្រៃនៅខេត្តមណ្ឌលគិរីដែលត្រូវបានគេឈូសឆាយទន្ទ្រានកាន់កាប់កន្លងមក។ រូបថត សហគមន៍
មណ្ឌលគិរី: អភិបាលខេត្តមណ្ឌលគិរីបានបញ្ជាឲ្យអាជ្ញាធរទប់ស្កាត់ការឈូសឆាយទន្ទ្រានយកដីព្រៃការពារ និងដែនជម្រកសត្វព្រៃ បន្ទាប់ពីលេចឮព័ត៌មានពីការឈូសឆាយវាតយកដីព្រៃនៅចន្លោះតំបន់របៀងដែនជម្រកសត្វព្រៃភ្នំព្រេច និងព្រៃការពារស្ថិតក្នុងសហគមន៍ភូមិរយ៉ ឃុំរយ៉ ស្រុកកោះញែក និងជាប់ស្រុកលំផាត់ ខេត្តរតនគិរី។
លោក ស្វាយ សំអ៊ាង អភិបាលខេត្តមណ្ឌលគិរីបានឲ្យដឹងកាលពីម្សិលមិញថា ជនខិលខូចបានលួចឈូសឆាយដីព្រៃការពារប្រមាណជិត ១០០ ហិកតាតាំងពីមុនពេលបោះឆ្នោត ដោយសារអាជ្ញាធររវល់កិច្ចការនេះទើបក្រុមជនខិលខូចនាំគ្នាឆ្លៀតឱកាសឈូសឆាយដីព្រៃ។ ប៉ុន្ដែខណៈនេះលោកបានដាក់បញ្ជាឲ្យមន្ត្រីពាក់ព័ន្ធទប់ស្កាត់ករណីនេះជាបន្ទាន់។
លោកបានបន្តថាដីធ្លីនៅក្នុងតំបន់នោះមិនមានអាជ្ញាធរជាអ្នកឈូសឆាយទេ គឺមានតែប្រជាពលរដ្ឋដែលមានដីស្រែចម្ការនៅជិតតំបន់នោះនាំគ្នាឈូសឆាយ ដើម្បីពង្រីកដីស្រែចម្ការរបស់ខ្លួន។ ម្យ៉ាងទៀតពួកគាត់បានលក់ឲ្យអ្នកផ្សេងហើយពួកគាត់មិនបានដឹងថា ជាដីព្រៃការពារ និងដែនជម្រកសត្វព្រៃក៏ឈូសឆាយបន្ថែមទៀតផងដែរ។
លោកបញ្ជាក់ថា៖ «ប៉ុន្មានថ្ងៃនេះខ្ញុំឲ្យមន្ត្រីខ្ញុំ ចុះទៅហើយឃើញគេផ្សាយអ៊ីចេះ អ៊ីចុះ ឬខ្លះថារាប់ពាន់ហិកតាហើយចេះតែនិយាយថា យើងហ្នឹងមិនអើពើ គ្មានវិធានការ។ ការពិតយើងចុះទៅផ្ទាល់ហើយគឺមិនដល់ ១០០ ហិកតាទេហើយពួកគាត់មិនឈូសឆាយយកទាំងអស់ទេគ្រាន់តែឈូសកន្លែងនេះបន្តិច កន្លែងនោះបន្តិចគឺគាត់ចោះដុំៗដើម្បីពង្រីកដីស្រែចម្ការរបស់គាត់ទេ ហើយឥឡូវយើងទប់ស្កាត់បានហើយ»។
លោក កែវ សុភ័ក្ដ្រ ប្រធានមន្ទីរបរិស្ថានខេត្តមណ្ឌលគិរី និងលោក ស៊ិន វណ្ណវុឌ្ឍ អភិបាលស្រុកកោះញែកមិនអាចទាក់ទងសុំការបញ្ជាក់បានទេកាលពីម្សិលមិញ។
លោក ប៉ិល ឌិត ប្រជាសហគមន៍ឃុំរយ៉ ស្រុកកោះញែកបានឲ្យដឹងថាកាលពីប៉ុន្មានថ្ងៃមុនគេឃើញគ្រឿងចក្រធុនធំជាច្រើនគ្រឿងកំពុងធ្វើសកម្មភាពនៅត្រង់ចំណុចអូរតាំហចស្ថិតក្នុងភូមិរយ៉លើ និងតំបន់ត្រពាំងតាទូត ត្រពាំងទឹកល្អក់ ស្ថិតក្នុងភូមិរវាត់បានធ្វើសកម្មភាពឈូសឆាយដីព្រៃ និងកន្លែងខ្លះកំពុងអារផ្តួលរំលំដើមឈើ បើទោះបីជាគេដឹងថាដីនៅតំបន់នោះជាព្រៃឈើបម្រុងទុករបស់រដ្ឋក៏ដោយ។
លោកបន្តថាលោកមិនបានស្គាល់អត្តសញ្ញាណអ្នកដែលអនុញ្ញាតឲ្យមានការឈូសឆាយដីព្រៃការពារនេះទេ។ «ខ្ញុំអត់ដឹងដែរបង ប៉ុន្ដែឃើញគេយកត្រាក់ទ័រមក ៣-៤ គ្រឿងមកឈូសឆាយគគ្រឹកគគ្រេងគ្មានខ្វល់អ្វីទេ ហើយខ្ញុំអត់ដឹងថាអាជ្ញាធរបានដឹងរឿងនេះឬអត់ទេ? ប៉ុន្ដែប៉ុន្មានថ្ងៃនេះដូចជាស្ងាត់បន្ដិច»។
លោក អៀង ម៉េងលី មន្ត្រីសម្របសម្រួលផ្នែកសិទ្ធិមនុស្សនៃអង្គការ ADHOC ប្រចាំខេត្តមណ្ឌលគិរីបានឲ្យដឹងកាលពីម្សិលមិញថា លោកបានទទួលព័ត៌មាននេះដែរ ប៉ុន្ដែលោកមិនទាន់បានទៅដល់ទីតាំងខាងលើនេះទេ។ យ៉ាងណាក៏ដោយលោកបាននិយាយថា ទីតាំងខាងលើនេះពិតជាមានករណីឈូសឆាយដីព្រៃមែន ហើយអាជ្ញាធរត្រូវតែចាត់វិធានការឲ្យបានទាន់ពេលវេលា ព្រោះក្នុងតំបន់នោះជាទីតាំងព្រៃការពារ និងដែនជម្រកសត្វព្រៃភ្នំព្រេចផងដែរ។
លោកបញ្ជាក់ថា៖ «ករណីហ្នឹងវាកើតឡើងតាំងពីមុនបោះឆ្នោតមកម្ល៉េះហើយឈ្មួញខិលខូចខ្លះគាត់ទិញដីពីពលរដ្ឋបានតិចតួចពេក តែគាត់ចង់ពង្រីកដីហ្នឹងថែម អ៊ីចឹងមានតែឈូសឆាយថែមដែរ។ ហេតុនេះបើទប់ស្កាត់មិនទាន់ពេលទេអាចនឹងគ្មានដែនជម្រកសត្វព្រៃទៀតទេ»៕
