.jpg)
មណ្ឌលគីរីៈ ថ្វីបើលោក ស្វាយ សំអ៊ាង អភិបាលខេត្តមណ្ឌលគិរីបានព្រមានចាត់វិធានការផ្លូវច្បាប់ប្រឆាំងមន្ត្រីដែលរំលោភដីធ្លីក៏ដោយ ប៉ុន្តែក្រុមជនជាតិដើមភាគតិចបានថ្លែងថា ពួកគេគ្មានជំនឿទៅលើអភិបាលខេត្តនោះទេ។
លោក គ្រើង តុលា តំណាងសហគមន៍ប៊ូស្រានៅស្រុកពេជ្រាដាបានប្រាប់ភ្នំពេញប៉ុស្ដិ៍ម្សិលមិញថា កន្លងមកលោក ស្វាយ សំអ៊ាង ធ្លាប់ព្រមានច្រើនដងមកហើយដើម្បីការពារធនធានធម្មជាតិព្រៃឈើក្នុងខេត្តមណ្ឌលគិរីឱ្យបានគង់វង្ស ប៉ុន្តែការព្រមានទាំងនោះបានត្រឹមតែជាការនិយាយ ហើយការអនុវត្តជាក់ស្ដែងគឺពុំមាននោះទេ ដោយសារក្រុមអ្នកបំផ្លាញព្រៃឈើ គឺសុទ្ធសឹងតែបងប្អូនកូនក្មួយរបស់អ្នកមានអំណាច។
លោក តុលា ថ្លែងថា៖ «នៅខាងកោះញែកអី គាត់ធ្លាប់និយាយដែរ ប្រសិនអ្នកណាដឹកឈើដោយគ្មានការអនុញ្ញាតឬខុសច្បាប់ គាត់នឹងចាត់វិធានការ ប៉ុន្តែវិធានការគាត់នោះបានត្រឹមតែនិយាយ ហើយគ្មានឃើញការអនុវត្តទេ។ ការអនុវត្តគាត់មានដែរកន្លងមកមិនមែនថាអត់ទេ ប៉ុន្តែការអនុវត្តរបស់គាត់នោះ វាប៉ះចំពួកម៉ាកបនភឿន ឬប៉ះចំកូនក្មួយ គាត់ធ្វើអត់បានទេ អ៊ីចឹង! ការទន្ទ្រាន និងការកាប់បំផ្លាញព្រៃឈើ នៅតែមាន»។
ទំព័រហ្វេសប៊ុករបស់រដ្ឋបាលខេត្តមណ្ឌលគិរីបានផ្សាយថា លោក ស្វាយ សំអ៊ាង នៅក្នុងពិធីប្រកាសឲ្យអភិបាលស្រុកអូររាំងចូលកាន់តំណែងកាលពីថ្ងៃព្រហស្បតិ៍ទី ៤ កក្កដា បានព្រមានមន្ត្រី និងសមត្ថកិច្ចក្នុងខេត្ត ត្រូវដកខ្លួនចេញជាបន្ទាន់ ប្រសិនពួកគេជាប់ពាក់ព័ន្ធនឹងការរំលោភយកដីសហគមន៍។
លោក ថ្លែងថា៖ «ដីសហគមន៍ មិនមែនជាកម្មសិទ្ធិរបស់បុគ្គលណាម្នាក់នោះទេ ហើយបើបុគ្គលណាម្នាក់យកដីសហគមន៍នេះ ធ្វើជាកម្មសិទ្ធិ ឬលក់ឲ្យឈ្មួញ គឺផ្ទុយនឹងលក្ខន្ដិកៈនៃច្បាប់សហគមន៍ហើយត្រូវចាត់វិធានការតាមផ្លូវច្បាប់»។
អភិបាលខេត្តមណ្ឌលគិរីបានបន្ថែមថា ការចុះបញ្ជីដីសហគមន៍ គឺមានការចូលរួមពីប្រជាពលរដ្ឋក្នុងសហគមន៍ និងអាជ្ញាធរមូលដ្ឋានពាក់ព័ន្ធទាំងអស់ ដើម្បីកំណត់អំពីទំតាំងទំហំឲ្យបានច្បាស់លាស់ និងមានការទទួលស្គាល់ពីក្រសួងមហាផ្ទៃ ហើយដីសហគមន៍ដែលបានចុះបញ្ជីរួចហើយ គឺត្រូវខិតខំគ្រប់គ្រងដើម្បីរក្សាទុកជាប្រយោជន៍សមូហភាព ក្នុងការធានាឱ្យបាននិរន្តរភាព នៃការអាស្រ័យផល អនុផលព្រៃឈើ និងរក្សាទុកឲ្យកូនចៅជំនាន់ក្រោយ។
ខេត្តមណ្ឌលគិរីមានដែនជម្រកសត្វព្រៃចំនួន ៥ កន្លែង គឺដែនជម្រកសត្វព្រៃកែវសីមា ដែនជម្រកសត្វព្រៃណាមលៀត ដែនជម្រកសត្វព្រៃស្រែពក ដែនជម្រកសត្វព្រៃភ្នំព្រិច និងដែនជម្រកសត្វព្រៃលំផាត់ និងមានដីសហគមន៍ដែលមានចុះបញ្ជីចំនួនជាង ២០ និងជាង ៣០ ទៀតកំពុងរៀបចំចុះបញ្ជី នេះបើតាមការអះអាងរបស់លោក គ្រើង តុលា។
លោកបន្តថា ធនធានព្រៃឈើទាំងនេះ កំពុងត្រូវបានគេទន្ទ្រានជាបន្តបន្ទាប់មកដល់ពេលបច្ចុប្បន្ន ហើយដែនជម្រកសត្វព្រៃខ្លះទៀត ស្ទើរតែរលាយអស់ពីព្រៃ និងនៅសល់ព្រៃតែលើក្រដាសប៉ុណ្ណោះ។
លោក ថ្លែងថា៖ «អ៊ីចឹងដែនជម្រកសត្វព្រៃទាំងហ្នឹង ដែនជម្រកសត្វព្រៃដែលរលាយមុនគេ គឺដែនជម្រកសត្វព្រៃភ្នំណាមលៀរ ហើយឥឡូវកំពុងឈានទៅរកហិនហោច គឺដែនជម្រកសត្វព្រៃភ្នំព្រិចតែម្ដង។ ភ្នំព្រិចហ្នឹង មានក្រុមហ៊ុនរាប់រយក្រុមហ៊ុន ប៉ុន្តែអត់មានអភិវឌ្ឍន៍ទេ បានត្រឹមបំផ្លាញយកឈើទៅលក់នៅប្រទេសវៀតណាមតែប៉ុណ្ណឹង»។
លោក ព្យាន ច្រេន រស់នៅភូមិពូត្រែង ក្នុងឃុំដាក់ដាំ ស្រុកអូររាំង បានឲ្យដឹងផងដែរថា លោកក៏មិនជឿចំពោះការព្រមានរបស់អភិបាលខេត្តមណ្ឌលគិរីនេះដែរ ព្រោះលោកថា ដោយសារប្រហែល ២ ខែមុន លោករួមទាំងពលរដ្ឋក្នុងភូមិប្រហែល ២០ គ្រួសារទៀតបានប្ដឹងមេភូមិ និងឃុំក្នុងឃុំដាក់ដាំ អំពីការយកដីចំនួន ៥០៣ ហិកតា ដែលភាគច្រើនជាដីសហគមន៍ទៅលក់ឲ្យឈ្មួញកាលពីថ្ងៃទី ១៦ មេសា ឆ្នាំ ២០១៩ នេះ ប៉ុន្តែមកដល់ពេលនេះ ទាំងខេត្ត និងតាមមន្ទីរពាក់ព័ន្ធនានាគឺគ្មានចំណាត់ការនោះទេ។
លោក ច្រេន ថ្លែងថា៖ «នៅពេលពួកខ្ញុំដាក់ពាក្យបណ្ដឹងទៅសាលាខេត្ត មន្ទីរដែនដី និងរដ្ឋបាលព្រៃឈើជាដើម ប៉ុន្តែអត់ដែលឃើញពួកគេដោះស្រាយទេ»។
លោក សុខ សេរ៉ា មន្ត្រីនាំពាក្យសាលាខេត្តមណ្ឌលគិរីបានលើកឡើងថា កន្លងមកពុំមានមន្ត្រីណាមួយក្នុងខេត្តត្រូវបានចាប់ឲ្យទៅប្រឈមមុខនឹងផ្លូវច្បាប់ដោយសារការរំលោភលើដីសហគមន៍ឡើយ ព្រោះសាលាខេត្តពុំធ្លាប់ធ្វើការស្រាវជ្រាវនៅឡើយទេ ហើយការព្រមានជាសាធារណៈរបស់អភិបាលខេត្តបែបនេះ ដោយសារតែឮថា កំពុងមានករណីមន្ត្រីរំលោភលើដីសហគមន៍។
លោក សេរ៉ា ថ្លែងថា៖ «ថ្ងៃចន្ទនិងអង្គារនេះ ប្រហែលជាគាត់អាចរៀបចំក្រុមការងារចុះពិនិត្យ ដីណាជាដីរដ្ឋ ហើយដីណាជាដីប្រជាពលរដ្ឋ»។
លោក អ៊ាង ម៉េងលី មន្ត្រីសម្របសម្រួលសមាគមអាដហុកខេត្តមណ្ឌលគិរីឲ្យដឹងថា ការព្រមានជាការបន្លាចមន្ត្រីឲ្យភ្ញាក់រឭកប៉ុណ្ណោះ ប៉ុន្តែប្រហែលមិនអាចមានចំណាត់ការចំពោះមន្ត្រីដែលធ្វើខុសច្បាប់ទាំងនោះឡើយ។ អភិបាលខេត្តឬអាជ្ញាធរពាក់ព័ន្ធត្រូវបញ្ជូនជនដែលពាក់ព័ន្ធនិងការឃុបឃិតទៅតុលាការ»៕
