រតនគិរីៈ អភិបាលខេត្ដរតនគិរីអំពាវនាវឲ្យពលរដ្ឋកុំជឿជាក់លើអបិយជំនឿ ប៉ុន្តែត្រូវបែរទៅរកការទទួលសេវាសុខាភិបាលនៅមណ្ឌលសុខភាពជំនួសវិញ នៅពេលសង្ស័យថា មានជំងឺគ្រុនឈាម។ កាលពីឆ្នាំមុន ខេត្ដនេះមានពលរដ្ឋកើតជំងឺគ្រុនឈាម ៤៦០ ករណី និងបណ្ដាលឱ្យស្លាប់ម្នាក់ ព្រោះមកទទួលសេវាព្យាបាលមិនទាន់ពេល។
លោក ថង សាវុន អភិបាលខេត្ដរតនគិរីថ្លែងក្នុងសន្និសីទសារព័ត៌មានស្តីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តរតនគិរី» រៀបចំដោយអង្គភាព អ្នកនាំពាក្យរាជរដ្ឋាភិបាលនៅទីស្តីការគណៈរដ្ឋមន្ត្រីពីម្សិលមិញថា ខេត្ដរតនគិរីមានការកើនឡើងជំងឺគ្រុនឈាមជាគំហុក ប៉ុន្ដែបានទប់ស្កាត់ និងព្យាបាលឱ្យជាសះស្បើយបានទាន់ពេលវេលា។ នៅក្នុងនោះក៏មានពលរដ្ឋមួយចំនួនត្រូវរងគ្រោះព្រោះគាត់មកទទួលសេវាព្យាបាលមានភាពយឺតយ៉ាវ។
លោកថ្លែងថា៖ «ខេត្ដរតនគិរីសម្បូរទៅដោយបងប្អូនប្រជាពលរដ្ឋជាជនជាតិដើមភាគតិចដែលនៅមានការជឿទៅលើអបិយជំនឿរបស់ខ្លួន ធ្វើឱ្យយើងមានការលំបាកក្នុងការប្ដូរផ្នត់គំនិត និងការកែប្រែឥរិយាបថរបស់បងប្អូនប្រជាពលរដ្ឋ។ បញ្ហានេះនៅតែជាការលំបាកក្នុងការឱ្យពលរដ្ឋលះបង់អបិយជំនឿហើយបែរមកទទួលសេវាសុខាភិបាលរបស់រដ្ឋវិញ»។
លោកអភិបាលខេត្តថ្លែងថា ពាក់ព័ន្ធករណីផ្ទុះជំងឺគ្រុនឈាមរហូតបណ្ដាលឱ្យស្លាប់គឺព្រោះតែពលរដ្ឋមិនមកទទួលសេវា បែរជាជឿអបិយជំនឿសែនព្រេនទៅវិញ។ លោកថា បញ្ហាសម្អាតអនាម័យនៅតាមភូមិឃុំ ក៏នៅតែជាកត្ដាបណ្ដាលឱ្យមានការផ្ទុះឡើងជំងឺគ្រុនឈាមក្នុងខេត្ដរតនគិរីដែរ។
លោកបញ្ជាក់ថា៖ «បញ្ហាដែលកើតឡើងជំងឺគ្រុនឈាមនេះ គឺកើតឡើងនៅតែភូមិ ឃុំ ដែលជា ភូមិ ឃុំ គោលដៅ។ យើងខ្ញុំព្យាយាមណាស់ក្នុងការអប់រំផ្សព្វផ្សាយឱ្យពលរដ្ឋបានយល់ពីបញ្ហាជំងឺគ្រុនឈាម និងបញ្ហាសុខភាពសាធារណៈនេះ»។
ប្រធានមន្ទីរសុខាភិបាលខេត្ដរតនគិរីលោក អ៊ុង រតនា បញ្ជាក់ដែរថា រយៈពេល ៦ ខែកន្លងទៅនេះរដ្ឋបាលខេត្ដរតនគិរីបានចាត់វិធានការចុះដាក់ថ្នាំអាបែតនៅគ្រប់តំបន់ដែលអាចផ្ទុះឡើងនូវជំងឺគ្រុនឈាមដោយបានអប់រំផ្សព្វផ្សាយ និងបាញ់ថ្នាំសម្លាប់មូសនៅគ្រប់តំបន់ដែលប្រឈម។
លោកថ្លែងថា៖ «៦ ខែឆ្នាំ ២០២០ យើងរកឃើញមានពលរដ្ឋកើតជំងឺគ្រុនឈាមនេះ ៨ ករណី។ យើងបានណែនាំពួកគាត់ឱ្យទៅទទួលសេវាព្យាបាលរួចរាល់អស់ហើយមិនមានបញ្ហាគ្រោះថ្នាក់អ្វីទេ។ ករណីផ្ទុះឡើងជំងឺគ្រុនឈាមនេះ គឺចាប់ផ្ដើមកើតឡើងពីខែមេសារហូតដល់ខែវិច្ឆិកា ឬខែធ្នូទើបបញ្ចប់»។
លោក រតនា ថ្លែងថា រដ្ឋបាលខេត្តបានចាត់វិធានការទាន់ពេលវេលាមិនអាចបណ្ដោយបញ្ហានេះបានទេ ទោះបីជាកំពុងរវល់ទប់ទល់នឹងបញ្ហាជំងឺកូវីដ១៩យ៉ាងណាក៏ដោយ។ រដ្ឋបាលខេត្តមានក្រុមការងារដាច់ដោយឡែកក្នុងការទប់ស្កាត់បញ្ហានេះមិនឱ្យមានការរីករាលដាលឡើយ។
លោកថា៖ «ក្នុងចំណោម ពលរដ្ឋឆ្លងជំងឺគ្រុនឈាមចំនួន ៤៦០ ករណី កាលពីឆ្នាំ ២០១៩ មានពលរដ្ឋម្នាក់បានស្លាប់ ព្រោះគាត់ជឿលើអបិយជំនឿមិនប្រញាប់មកទទួលសេវានៅមណ្ឌលសុខភាពឱ្យបានទាន់ពេល»។
របាយការណ៍របស់រដ្ឋបាលខេត្ដបង្ហាញក្នុងសន្និសីទខាងលើឱ្យដឹងថា ជំងឺគ្រុនឈាមមានការកើនឡើងយ៉ាងគំហុកក្នុងឆ្នាំ ២០១៩ ព្រោះជាឆ្នាំដែលជំងឺគ្រុនឈាមមានការផ្ទុះឡើងនៅទូទាំងប្រទេសពី ១០ ករណី នៅឆ្នាំ ២០១៨ ទៅ ៤៦០ ករណី នៅឆ្នាំ ២០១៩៕