រតនគិរីៈ អភិបាលខេត្តរតនគិរីលោក ថង សាវុន សម្រេចបិទទីតាំង ១០ កន្លែងជាបណ្តោះអាសន្នស្ថិតក្នុងស្រុកអូរយ៉ាដាវ ចាប់ពីថ្ងៃទី ១៣ ខែឧសភាតទៅ បន្ទាប់ពីរកឃើញបុរសម្នាក់មានវិជ្ជមានកូវីដ១៩ បានពាក់ព័ន្ធនឹងទីតាំងទាំងនេះ។
សេចក្តីជូនដំណឹងដែលភ្នំពេញប៉ុស្តិ៍ទទួលបាននៅថ្ងៃនេះបានឱ្យដឹងថា ការបិទទីតាំងជាបណ្តោះអាសន្ននេះធ្វើឡើងក្នុងគោលបំណងដើម្បីទប់ស្កាត់ការឆ្លងរាលដាលនៃជំងឺកូវីដ១៩ ក្រោយពីបានរកឃើញបុរសអាយុ ៣៧ ឆ្នាំ ម្នាក់បានពាក់ព័ន្ធផ្ទាល់នឹងទីតាំងទាំងនេះ ហើយបុគ្គលរូបនេះមានវិជ្ជមានជំងឺកូវីដ១៩ តាមរយៈការធ្វើតេស្ដរហ័សនៅថ្ងៃទី ១១ ខែឧសភា ឆ្នាំ ២០២១។
សេចក្តីជូនដំណឹងបន្តថា៖ «ក្នុងអំឡុងពេលបិទទីតាំងជាបណ្តោះអាសន្ននេះ រដ្ឋបាលស្រុកអូរយ៉ាដាវ ត្រូវហ៊ុមព័ទ្ធទីតាំង ផ្អាកការចេញចូលទីតាំងទាំងនេះ និងស្រាវជ្រាវរកអ្នកពាក់ព័ន្ធផ្ទាល់ ឬប្រយោល ដើម្បីធ្វើចត្តាឡីស័ក និងយកសំណាក»។
សេចក្តីជូនដំណឹងដដែលបានឱ្យដឹងថា ទីតាំង ១០ កន្លែងដែលត្រូវបានបិទជាបណ្តោះអាសន្នស្ថិតនៅភូមិប្លង់ ឃុំប៉ាតេ ស្រុកអូយ៉ាដាវមាន ៥ កន្លែង រួមមាន គេហដ្ឋានលោក ពក សារ៉ែន គេហដ្ឋានលោក ពេញ សុពី គេហដ្ឋានលោក គឹម សារុន គេហដ្ឋានលោក បឿន ឃា និង គេហដ្ឋានលោក ផៃ ចន្ទី។
ចំណែក ៥ កន្លែងផ្សេងទៀតស្ថិតនៅភូមិអ៊ុន ឃុំលំជ័រ ស្រុកអូយ៉ាដាវក្នុងនោះរួមមាន ផ្ទះសំណាក់ អាន ខ័ន គេហដ្ឋានលោក ឃឹម ស្រីអូន គេហដ្ឋានលោក ធី ប៉ូយុទ្ធ គេហដ្ឋានលោក មាស សឿន និង គេហដ្ឋានលោក ហន ជ្រៃ។
អភិបាលខេត្តរតនគិរីបានណែនាំចំពោះប្រជាពលរដ្ឋ ដែលមានការពាក់ព័ន្ធផ្ទាល់ ឬប្រយោលជាមួយទីតាំងខាងលើត្រូវមកជួប ឬជូនដំណឹងដល់ក្រុមការងារមន្ត្រីសុខាភិបាលរបស់មន្ទីរសុខាភិបាលនៃរដ្ឋបាលខេត្ត ដើម្បីយកសំណាកទៅធ្វើតេស្តជាបន្ទាន់។
អភិបាលខេត្តក៏បានដាក់ចេញវិធានការតឹងរ៉ឹង ដោយត្រូវអនុវត្តការផាកពិន័យអន្តរការណ៍ចំពោះបុគ្គលណា ដែលមិនគោរពដោយចេតនានូវវិធានការ សុខាភិបាល និងវិធានការរដ្ឋបាលរបស់រដ្ឋាភិបាល និងវិធានការរដ្ឋបាលខេត្ត ដែលបានដាក់ចេញក្នុងការទប់ស្កាត់ការឆ្លងរាលដាលនៃជំងឺកូវីដ១៩។
សូមរំឭកថា រដ្ឋបាលខេត្តរតនគិរីកាលពីថ្ងៃទី ៩ ឧសភា បានប្រកាសរកឃើញអ្នកឆ្លងជំងឺកូវីដ១៩ ជាលើកដំបូងទៅលើបុរសពីរនាក់ បន្ទាប់ពីលទ្ធផលតេស្តវិជ្ជមាន ដោយប្រើប្រាស់ឧបករណ៍តេស្តរហ័ស ដែលបានធ្វើឡើងដោយក្រុមឆ្លើយតបបន្ទាន់របស់មន្ត្រីសុខាភិបាលនៃរដ្ឋបាលខេត្តរតនគិរី៕