សៀមរាបៈ អភិបាលខេត្តសៀមរាប លោក ទៀ សីហា បានប្រាប់ទៅដល់កងកម្លាំងប្រដាប់អាវុធទាំងអស់ រួមជាមួយនឹងក្រុមការងារមន្ទីរសុខាភិបាល ត្រូវដាក់បារ៉ាស់ត្រួតពិនិត្យនៅតាមច្រកផ្លូវទាំងអស់ ដែលចូលមកក្នុងខេត្តសៀមរាម ដោយត្រូវស្រង់ទិន្នន័យ សួរនាំអំពីគោលដៅរបស់អ្នកធ្វើដំណើរ។
លោកបានលើកឡើងថា ប៉ារ៉ាស់នោះ នឹងមានការដាក់នៅតាមច្រកមកពីខេត្តកំពង់ធំ ផ្លូវជាតិលេខ ៦ ដែលឆ្លងកាត់ស្រុកស្ទោង និងស្រុកជីក្រែង និងច្រកផ្សេងទៀត នៃស្រុកក្រឡាញ់ និងស្រុកព្រះនេត្រព្រះ ដែលមានអ្នកធ្វើដំណើរមកពីខេត្តបាត់ដំបង និងខេត្តបន្ទាយមានជ័យ។
លោក ទៀ សីហា ថា ៖ «សម្រាប់កន្លែងផ្សេងៗទៀត ក៏ត្រូវដាក់ប៉ារ៉ាស់ផងដែរ រួមទាំងត្រូវប្រយ័ត្នតាមផ្លូវទឹកផង ដែលមកពីភ្នំក្រោម។ សរុបមកគឺមានទីតាំងចំនួន ៦ ច្រក ដែលយើងត្រូវតែដាក់ប៉ារ៉ាស់ ក្នុងការត្រួតពិនិត្យ និងតាមដានក្នុងការស្រង់យកទិន្នន័យ ដែលអាចធ្វើទៅរួច ដោយមិនមានការបិទច្រក ឬបិទខេត្តដទៃចូលមកក្នុងខេត្តយើងទេ»។
លោក ទៀ សីហា បានបន្ថែមថា នេះជាវិធានការ ក្នុងការបង្ការនូវហានីភ័យចូលមកក្នុងខេត្តនេះ ហើយការដាក់ប៉ារ៉ាស់នេះ គឺក្នុងគោលបំណងធ្វើការស្រង់ទិន្នន័យ សួរនាំចំពោះអ្នកធ្វើដំណើរ មានគោលដៅទៅណា ហើយពួកគាត់មកពីណា ហើយប្រសិនបើពួកគាត់មកពីតំបន់ហានីភ័យ ដូចជាទីក្រុងភ្នំពេញ ខេត្តព្រះសីហនុ និងខេត្តព្រៃវែង នោះពួកគាត់នឹងត្រូវបាននាំខ្លួនទៅធ្វើចត្តាឡីស័ក និងយកសំណាក ដើម្បីធ្វើតេស្តកូវីដ ១៩។
សម្រាប់អ្នកដែលមកពីខេត្តផ្សេងៗ គឺអាចនឹងមានការវាស់កំដៅ និងស្កេន QR Code ដើម្បីធ្វើការតាមដាន។
លោកថា៖ «ខ្ញុំនឹងឱ្យរដ្ឋបាលរៀបចំនូវ QR Code និងឯកសារមួយចំនួន ដើម្បីអនុវត្តន៍ឱ្យបានរលូននៅតាមប៉ារ៉ាស់ដែលយើងនឹងត្រូវដាក់ឱ្យបានលឿនបំផុត»៕