.jpg)
លោកអភិបាលរងខណ្ឌ ៧ ដែលត្រូវចោទប្រកាន់ពីបទផិត ក្រោយមានបណ្តឹងពីប្រពន្ធ។ រូបថត សហការី
អ្នកនាំពាក្យសាលាដំបូងខេត្តសៀមរាប បាននិយាយនៅថ្ងៃអង្គារថា អភិបាលរងខណ្ឌ ៧ មករា ម្នាក់ ត្រូវបានតុលាការខេត្តសៀមរាប សម្រេចចោទប្រកាន់ពីបទ «ផិត» ក្បត់ចិត្តស្ត្រីជាប្រពន្ធ ដោយលួចរួមសេវនកិច្ច (រួមភេទ) ជាមួយស្រីផ្សេង ដោយត្រូវបានផ្ដន្ទាទោសដាក់ពន្ធនាគាររយៈពេល ៦ ខែ ប៉ុន្តែទោសនោះត្រូវព្យួរ។
លោក យ៉ិន ស្រាង ប្រធានលេខាធិការដ្ឋាន និងជាអ្នកនាំពាក្យសាលាដំបូងខេត្តសៀមរាប បានប្រាប់ ភ្នំពេញ ប៉ុស្តិ៍ នៅថ្ងៃនេះថា លោក ហៀក ចាន់លាង អភិបាលរងខណ្ឌ ៧ មករា ត្រូវបានកម្លាំងការិយាល័យប្រឆាំងការជួញដូរមនុស្ស និងអនីតិជន នៃបញ្ជាការដ្ឋានកងរាជអាវុធហត្ថខេត្តសៀមរាប ចាប់ឃាត់ខ្លួននៅយប់ថ្ងៃទី ៣០ ខែ មករា ឆ្នាំ ២០២១ ខណៈកំពុងលួចរួមសេវនកិច្ចជាមួយស្ត្រីវ័យ ២៥ ឆ្នាំម្នាក់ នៅក្នុងបន្ទប់ខុនដូមួយកន្លែង ស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។ ការចាប់ខ្លួននេះ ធ្វើឡើងតាមបណ្ដឹងរបស់ស្ត្រីជាប្រពន្ធ។
លោកបានបន្តថា គាត់ត្រូវបានកម្លាំងកងរាជអាវុធហត្ថ កសាងសំណុំរឿងបញ្ជូនទៅតុលាការខេត្តសៀមរាប នៅរសៀលថ្ងៃទី ១ ខែ កុម្ភៈ ឆ្នាំ ២០២១ ដើម្បីចាត់វិធានការបន្តតាមនីតិវិធីច្បាប់។ ករណីនេះត្រូវបានតំណាងអយ្យការអមសាលាដំបូងខេត្តសៀមរាប ចោទប្រកាន់ពីបទ «ផិត» តាមបញ្ញតិមាត្រា ៧ និង មាត្រា ១០ នៃច្បាប់ស្ដីពីឯកពន្ធភាព។
យោងមាត្រាទាំង ២ នៃច្បាប់នេះ គាត់ត្រូវប្រឈមការផ្ដន្ទាទោសដាក់ពន្ធនាគារពី ១ខែ ដល់ ១ ឆ្នាំ និងផ្ដន្ទាទោសពិន័យជាប្រាក់ពី ២០០ ០០០ រៀល ដល់ ១ ០០០ ០០០ រៀល ឬ ផ្ដន្ទាទោសណាមួយនៃទោសទាំង ២។
ទោះជាបែបណាក្ដី នៅរសៀលថ្ងៃដដែលនោះ សំណុំរឿងរបស់អភិបាលរងខណ្ឌរូបនេះ ត្រូវបានតុលាការបើកការជំនុំជម្រះលើអង្គសេចក្ដីភ្លាមៗតែម្ដង។ នេះបើតាមលោក យ៉ិន ស្រាង។
លោកបានបញ្ជាក់ថា៖ «ក្រោយបញ្ចប់ការសួរដេញដោលក្នុងសវនាការរយៈពេលខ្លី នៅល្ងាចថ្ងៃដដែលនោះ លោក ហៀក ចាន់លាង ត្រូវបានលោក ឆែ វីរៈ ចៅក្រមជំនុំជម្រះ សាលាដំបូងខេត្តសៀមរាបប្រកាសសាលក្រមផ្ដន្ទាទោសដាក់ពន្ធនាគាររយៈពេល ៦ ខែ ប៉ុន្តែទោសនោះត្រូវព្យួរទាំងអស់»។
បើតាមមន្រ្តីនាំពាក្យរូបនេះ ក្រោយពីប្រកាសសាលក្រមលើសំណុំរឿងផិតក្បត់នេះរួច លោកចៅក្រមក៏បានបញ្ជាឲ្យកម្លាំងកងរាជអាវុធហត្ថ ដែលជាសមត្ថកិច្ចនគរបាលយុត្តិធម៌ ដោះលែងលោក ហៀក ចាន់លាង ឲ្យត្រឡប់ទៅផ្ទះវិញ។
យោងតាមប្រភពពីមន្ត្រីកងរាជអាវុធហត្ថខេត្តសៀមរាបម្នាក់ដែលស្នើសុំមិនឲ្យបញ្ចេញឈ្មោះ បានប្រាប់ ភ្នំពេញ ប៉ុស្តិ៍ ថាតាមចម្លើយរបស់លោក ហៀក ចាន់លាង ក្នុងអំឡុងពេលនៃការស៊ើបសួរដោយមន្ត្រីជំនាញកងរាជអាវុធហត្ថនោះ គាត់និងប្រពន្ធរបស់គាត់បានដាក់ពាក្យលែងលះគ្នាដល់តុលាការជាយូរមកហើយ និងបានផ្ដាច់ការរួមសង្វាស់មេត្រីជាមួយគ្នាជាយូរមកហើយដែរ។ គ្រាន់តែតុលាការនៅមិនទាន់សម្រេចសេចក្ដីឲ្យពួកគាត់លែងលះគ្នានៅឡើយទេ។
យ៉ាងណាក៏ដោយ លោក ហៀក ចាន់លាង មិនអាចទាក់ទងស្នើសុំការអធិប្បាយបានទេ កាលពីម្សិលមិញ៕
