លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ អភិបាលរងខេត្តព្រះសីហនុត្រូវបានដកមុខតំណែងតាមរយៈអនុក្រឹត្យមួយដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃសុក្រកន្លងមកនេះ។
លោក ហ៊ុន សែន បានថ្លែងសារនៅលើទំព័រហ្វេសប៊ុករបស់លោក ដោយភ្ជាប់ជាមួយនឹងអនុក្រឹត្យបញ្ចប់មុខតំណែងនោះថា៖ «ថ្ងៃនេះខ្ញុំបង្ខំចិត្តអនុវត្តអភិក្រមទី ៥ គឺការវះកាត់ដោយដកអភិបាលរងខេត្តព្រះសីហនុ ២ រូបចេញពីតំណែង។ ខ្ញុំត្រូវតែយកគ្រាប់ក្រួស និងខ្សាច់ចេញពីស្បែកជើងទើបអាចដើរទៅមុខទៀតបាន។ ខ្ញុំគ្មានពេលនិយាយច្រើនជាមួយមន្ត្រីខិលខូចទៀតទេ ព្រោះខ្ញុំបានអប់រំពួកគេច្រើនហើយ។ ដល់ពេលនេះខ្លាក៏ត្រូវវាយ ពស់ក៏ត្រូវវាយ កណ្តុរក៏ត្រូវវាយ ឬរុយក៏ត្រូវវាយឲ្យតែបំពានលើផលប្រយោជន៍ប្រជាជន»។
លោក ហ៊ុន សែន បានកំណត់អភិក្រម ចំនួន ៥ គឺ ១-ឆ្លុះកញ្ចក់,២-ងូតទឹក ៣-ដុសក្អែល, ៤-ព្យាបាល និង ៥-វះកាត់ ដែលជាវិធានសម្រាប់ឲ្យមន្ត្រីពិចារណាដោយខ្លួនឯងនៅក្នុងការបំពេញតួនាទីដោយស្មោះត្រង់ចំពោះប្រទេសជាតិ និងប្រជាពលរដ្ឋមុនពេលដល់ដំណាក់កាលដែលត្រូវដកចេញពីតំណែង។
លោក ផៃ ស៊ីផាន អ្នកនាំពាក្យរាជរដ្ឋាភិបាល បានអះអាងកាលពីម្សិលមិញថា បើទោះជាអភិបាលខេត្តរងទាំង ២ នោះ ត្រូវបានដកតំណែងហើយក៏ដោយ ក៏ពួកគេនៅប្រឈមនឹងការស៊ើបអង្កេតបន្ថែមទៀត ដោយអង្គភាពប្រឆាំងអំពើ ពុករលួយ ពាក់ព័ន្ធនឹងអំពើ ពុករលួយ និងក្រសួងមហាផ្ទៃផងដែរ។
លោក ស៊ីផាន បានប្រាប់ភ្នំពេញប៉ុស្តិ៍ថា៖ «ការបង្ហាញតម្រុយពីលោកនាយករដ្ឋមន្ត្រី ហ៊ុន សែន គឺជាហេតុផលមួយដែលអង្គភាពប្រឆាំងអំពើពុករលួយ និងក្រសួងមហាផ្ទៃ ត្រូវបើកការស៊ើបអង្កេតភ្លាមៗទាំងការស៊ើបអង្កេតលើទ្រព្យសម្បត្តិ និងការស៊ើបអង្កេតលើការប្រើប្រាស់អំណាច ហួសព្រំដែនរបស់ពួកគេ»។
លោកបញ្ជាក់ថា៖ «មានភាពមិនប្រក្រតីខាងទ្រព្យសម្បត្តិអាហ្នឹងខាង ACU ចំណែកបើមានភាពមិនប្រក្រតីខាងផ្នែករដ្ឋបាល ហ្នឹងខាងផ្នែកក្រសួងមហាផ្ទៃ នឹងមានសមត្ថកិច្ច។ អាចពុករលួយចំពោះលុយកាក់ ព្រោះតែពួកគេ ធ្លាប់បានប្រកាសទ្រព្យសម្បត្តិ ២ ឆ្នាំម្តង នៅ ACU ហើយផ្នែករដ្ឋបាល គឺពាក់ព័ន្ធនឹងជម្លោះដីធ្លីហ្នឹង ព្រោះដីហ្នឹងជាទ្រព្យសម្បត្តិរបស់រដ្ឋ តែអភិបាលខេត្តរងទាំង ២ ហ្នឹង គាត់ចុះទៅគួរតែដឹងថា ដីនេះជាដីរបស់រដ្ឋ ដូច្នេះទុកឲ្យក្រសួងមហាផ្ទៃគាត់វាយតម្លៃទៅ»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) និងជំនួយការផ្ទាល់របស់លោក គឺលោក យុិនទៀង ពុទ្ធារិទ្ធ មិនអាចទាក់ទងសុំការអត្ថាធិប្បាយបានទេកាលពីម្សិលមិញ។
ប៉ុន្តែលោកនួន បូផល អនុប្រធាន ACU បានប្រាប់ថា អង្គភាពបានទទួលព័ត៌មាននេះហើយ តែការស៊ើបអង្កេត ឬមិនស៊ើបអង្កេត គឺអាស្រ័យលើប្រធានអង្គភាព។
លោក បូផល ថ្លែងថា៖ «ខ្ញុំមិនអាចបកស្រាយបានទេព្រោះយោងតាមច្បាប់មានតែព្រះរាជអាជ្ញាដែលលោកជាប្រធានអង្គភាព»។
ជាមួយគ្នានេះ លោក ស ខេង រដ្ឋមន្ត្រីក្រសួងមហាផ្ទៃ បានថ្លែងក្នុងឱកាសបិទសន្និបាតបូកសរុបលទ្ធផលការងារប្រចាំឆ្នាំរបស់រដ្ឋបាលខេត្តព្រះសីហនុ កាលពីថ្ងៃសុក្រ ថាបញ្ហាជម្លោះដីធ្លីកើតឡើងរហូតមានហិង្សាបែបនេះ ព្រោះមានវប្បធម៌អន្តរាគមន៍ ពីអ្នកមានអំណាច ដែលធ្វើឲ្យមានភាពអយុត្តិធម៌ បណ្តាលឲ្យរឿងចេះតែរីកធំ ដែលមិនអាចដោះស្រាយបាន។ ដូចនេះ លោកស្នើឲ្យបញ្ឈប់វប្បធម៌បែបនេះ។
លោកបញ្ជាក់ថា៖ «បញ្ហាដីធ្លី នៅកំពង់សោម មិនមែនទើបតែមានពេលនេះទេ ពីមុនក៏វាមានដែរ តែពេលនោះមិនសូវស្រួចស្រាល់ប៉ុន្មាន ព្រោះដីមិនសូវឡើងថ្លៃ ដល់មានការវិនិយោគច្រើនទៅ ដណ្ដើមគ្នាកាន់កាប់ ហើយវាបូកថែមហ្នឹងអ្នកធ្វើអន្តរាគមន៍ពីក្រោយ ហើយអ្នកអន្តរាគមន៍មិនសូវតូចប៉ុន្មានទេ ព្រោះបើហ៊ានអន្តរាគមន៍ ទាល់តែខ្លាំងតិច មិនខ្លាំងគឺអន្តរាគមន៍មិនបានទេ។ ខ្ញុំយកឱកាសនេះ សុំអង្វរករអំពាវនាវសុំអស់លោកទាំងឡាយ ដែលចូលចិត្តប្រើវប្បធម៌អន្តរាគមន៍ ឈប់ឬដកខ្លួនចេញបើមិនអ៊ឹចឹងចៅហ្វាយខេត្ត ឬរដ្ឋបាលខេត្តធ្វើមិនបានទេ ងាកប៉ះនេះ ងាកប៉ះនោះ។ អ៊ឹចឹងសុំអង្វរករថា ដកខ្លួនចេញ ពីព្រោះបើប្រើវប្បធម៌អន្តរាគមន៍មកហើយ គឺពិបាករកយុត្តិធម៌ឃើញណាស់ ហើយបើរកយុត្តិធម៌មិនឃើញ គឺបញ្ហាកាន់តែធំទៀត»។
លោក ឱក សេរីសោភក្តិ៍ អ្នកវិភាគនយោបាយ បានសាទរចំពោះចំណាត់ការរបស់ថ្នាក់ដឹកនាំរដ្ឋាភិបាល ដែលបានចាត់វិធានការទាំងនេះ ហើយអាចនឹងបន្តជាហូរហែតទៅទៀតដូចភ្លៀងរលឹម ព្រោះវានៅច្រើនណាស់ពាសវាលពាសកាល ហើយការលុបបំបាត់នេះ គឺត្រូវប្រឈមមុខនឹងផលពិបាក ដោយប្រើភាពអត់ធ្មត់ខ្ពស់បំផុត និងត្រូវប្រើពេលយូរបន្តិចដើម្បីទទួលបានជំនឿពីប្រជាពលរដ្ឋដែលបាត់បង់ទៅឲ្យត្រឡប់មកវិញ។ បញ្ហាដ៏ច្រើន ដែលបន្តកើតមាននៅក្នុងសង្គម គួរតែដល់ពេលដោះស្រាយ និងលុបបំបាត់ឲ្យបាន ចៀសវាងទទួលរងការរិះគន់ពីពលរដ្ឋ។
លោកបញ្ជាក់ថា៖ «សម័យនេះហើយ ពលរដ្ឋមានមធ្យោបាយសមល្មមអាចតាមមើល ហើយពិចារណាយល់ដឹងថា អ្វីពិត អ្វីលេងប៉ាហ៊ី។ ពលរដ្ឋគាំទ្រសម្តេច និងរដ្ឋាភិបាលយ៉ាងពេញទំហឹងក្នុងការវះកាត់ស៊ីជម្រៅនេះ តែសូមកុំឲ្យយើងខ្ញុំខកចិត្តម្តងហើយម្តងទៀត ព្រោះទឹកចិត្តដែលរេចរឹលពុំមែនស្រួលសំលៀងដូចកាំបិតឆែបនោះទេ។ ក្នុងអនាគតឆាប់ៗខាងមុខ អ្នកដឹកនាំវ័យក្មេងជំនាន់ថ្មីនឹងត្រូវបន្តវេនដោយការកសាងប្រព័ន្ធដឹកនាំរដ្ឋមួយដែលមុខតែខុសពីជំនាន់មុន»៕