ភ្នំពេញៈ អយ្យការអមសាលាដំបូងរាជធានីបានសម្រេចចោទប្រកាន់លោក ស៊ូ អារ៉ាហ្វាត់ អភិបាលរងខេត្តបាត់ដំបង និងលោកឧកញ៉ា សង ថន ពីបទបំផ្លាញដោយចេតនា និងកេងបំបាត់ដោយទុច្ចរិត និងបទចោទសូកប៉ាន់ និងស៊ីសំណូកបន្ទាប់ពីអង្គភាពប្រឆាំងអំពើពុករលួយ (ACU) បាននាំខ្លួនទៅកាន់តុលាការកាលពីថ្ងៃចន្ទពាក់ព័ន្ធនឹងករណីពុករលួយដីធ្លីប្រមាណ ៥ ០០០ ហិកតានៅស្រុកគាស់ក្រឡ ខេត្តបាត់ដំបង។
លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា បន្ទាប់ពីសាកសួរពេញ ១ ថ្ងៃ ព្រះរាជអាជ្ញារងលោក សឿន មុនីរ័ត្ន បានសម្រេចចោទប្រកាន់លោក សង ថន ងារជាឧកញ៉ាចំនួន ២ បទចោទគឺបទផ្តើមគំនិតក្នុងការបំផ្លាញដោយចេតនា និងកេងបំបាត់ដោយទុច្ចរិត និងបទចោទ សូកប៉ាន់។
លោកបន្តថា ចំណែកលោក ស៊ូ អារ៉ាហ្វាត់ អភិបាលរងខេត្តបាត់ដំបងត្រូវបានចោទប្រកាន់ចំនួន ២ បទល្មើសដូចគ្នាគឺបទបំផ្លាញដោយចេតនា និងកេងបំបាត់ដោយទុច្ចរិត និងបទចោទស៊ីសំណូក។ លោកថា៖ «ចោទហើយបានបញ្ជូនសំណុំរឿងនេះទៅចៅក្រមស៊ើបសួរដើម្បីចាត់ការបន្តតាមនីតិវិធីច្បាប់»។
បើតាមលោក គុជ គឹមឡុង ក្រោយពីបានសាកសួរតាមនីតិវិធីរួចមកលោកចៅក្រមអ៊ឹម វណ្ណៈ បានសម្រេចឃុំខ្លួនជនជាប់ចោទទាំង ២ នាក់ជាបណ្តោះអាសន្នតាមនីតិវិធី។
លោកឧកញ៉ា សង ថន ដែលបានកាន់កាប់ដីប្រមាណ ៥ ពាន់ហិកតា ឬស្មើ ១ ភាគ ៤ នៃផ្ទៃដីក្នុងស្រុកគាស់ក្រឡទាំងមូលត្រូវបាន ACU នាំខ្លួនមកសាកសួរពាក់ព័ន្ធនឹងករណីពុករលួយរឿងដីធ្លីក្នុងស្រុកនេះកាលពីល្ងាចថ្ងៃទី ២៧ ខែមិថុនា។ ចំណែកលោក ស៊ូ អារ៉ាហ្វាត់ អភិបាលរងខេត្តបាត់ដំបងដែលធ្លាប់ជាប្រធានគណៈកម្មការថ្នាក់ខេត្តដោះស្រាយវិវាទដីធ្លីនៅស្រុកគាស់ក្រឡ ត្រូវបាននាំខ្លួនមកកាន់ស្នាក់ការ ACU នារាជធានីភ្នំពេញនៅព្រលប់ថ្ងៃទី ១ ខែកក្កដា ឆ្នាំ ២០២០។
ជុំវិញករណីអំពើពុករលួយនេះលោកនាយករដ្ឋមន្ត្រី ហ៊ុន សែន កាលពីថ្ងៃទី ២៧ ខែមិថុនា ក៏បានចេញអនុក្រឹត្យបញ្ចប់មុខតំណែងលោក ម៉ៅ សុចាន់ ពីអភិបាលនៃគណៈអភិបាលស្រុកគាស់ក្រឡ ខេត្តបាត់ដំបងផងដែរ។ ប៉ុន្តែលោកមិនត្រូវបានចោទប្រកាន់ ឬនាំខ្លួនមកសួរនាំនោះទេ។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាសាទរចំពោះចំណាត់ការរបស់អង្គភាពប្រឆាំងអំពើពុករលួយក៏ដូចជារដ្ឋាភិបាល ចំពោះការចាត់វិធានការលើករណីអំពើពុករលួយនៅស្រុកគាស់ក្រឡនេះ។ លោកបន្តថានេះគឺជាជំហាននៃការអនុវត្តច្បាប់មួយដែលល្អប្រសើរ ដែលលោកចង់ឃើញស្ថាប័ននេះ បន្តចាត់វិធានការរាល់មន្ត្រីទាំងឡាយណាដែលបានប្រព្រឹត្តអំពើពុករលុយ បើទោះជាការប្រព្រឹត្តអំពើពុករលួយជាលក្ខណៈតូចក្តី ឬធំក្តី។
លោកបញ្ជាក់ថា៖ «បើសិនជាការសង្ស័យថាបុគ្គលទាំងនោះពាក់ព័ន្ធនឹងបទល្មើសអំពើពុករលួយអីជាដើមគឺត្រូវតែចាត់វិធានការ ហើយយើងស្វាគមន៍ និងលើកទឹកចិត្តឲ្យមានការអនុវត្តច្បាប់ ដោយស្មើភាពគ្នា មិនថា អ្នកធំ អ្នកតូចក្តី អ្នកមាន អ្នកក្រអ្វីទេ ឲ្យតែពាក់ព័ន្ធនឹងអំពើពុករលួយ»។
បើតាមលោក ប៉ិច ពិសី បានឲ្យដឹងថា បច្ចុប្បន្នកម្ពុជានៅតែស្ថិតក្នុងស្ថានភាពអាក្រក់ពាក់ព័ន្ធនឹងបញ្ហាអំពើពុករលួយនេះនៅឡើយ ព្រោះអំពើពុករលួយក្នុងរូបភាពតូច និងធំនៅតែបន្តកើតមានជារៀងរាល់ថ្ងៃ។ លោករំពឹងថា រាល់សកម្មភាពរបស់រដ្ឋាភិបាល ជាពិសេសស្ថាប័នអង្គភាពប្រឆាំងអំពើពុករលួយត្រូវតែធ្វើការផ្សព្វផ្សាយ អប់រំ និងចាត់វិធានការដោយគ្មានការលើកលែងហើយបើអាចគួរតែមានការធ្វើវិសោធនកម្មមាត្រាច្បាប់ខ្លះ។
លោកបញ្ជាក់ថា៖ «យើងឃើញប្រជាពលរដ្ឋដែលគាត់ចង់រាយការណ៍ពីអំពើពុករលួយនោះ គាត់មិនសូវហ៊ានរាយការណ៍ ព្រោះតែច្បាប់បានចែងថា បើសិនគាត់រាយការណ៍ទៅខុស គាត់អាចនឹងទទួលរងបណ្តឹងមកវិញ ដែលធ្វើឲ្យពលរដ្ឋមិនសូវហ៊ានរាយការណ៍។ បើអាចយើងសុំធ្វើការពិនិត្យកែប្រែចំណុចកន្លែងនេះ»៕