The Phnom Penh Post Search

Search form




Logo of Phnom Penh Post newspaper Phnom Penh Post - អភិបាល​រាជធានី​ជំរុញ​ឲ្យ​ប្រមូល​ទី​សត្តឃាត​ទៅ​កន្លែង​តែ​មួយ

អភិបាល​រាជធានី​ជំរុញ​ឲ្យ​ប្រមូល​ទី​សត្តឃាត​ទៅ​កន្លែង​តែ​មួយ

សាច់ជ្រូក​ដែល​លក់​តាម​ផ្សារ​បច្ចុប្បន្ន​នាំ​មក​ពី​កន្លែង​ខុសៗ​គ្នា។
សាច់ជ្រូក​ដែល​លក់​តាម​ផ្សារ​បច្ចុប្បន្ន​នាំ​មក​ពី​កន្លែង​ខុសៗ​គ្នា។ ហុង មិនា

អភិបាល​រាជធានី​ជំរុញ​ឲ្យ​ប្រមូល​ទី​សត្តឃាត​ទៅ​កន្លែង​តែ​មួយ

ភ្នំពេញៈ អភិបាល​រាជធានី​ភ្នំពេញ​បាន​ជំរុញ​ឱ្យ​ចុះ​ពិនិត្យ និង​ស្រង់​ស្ថិតិ​ទី​សត្តឃាត​ដើម្បី​ប្រមូល​ផ្តុំ​ឲ្យ​ទៅ​កន្លែង​តែ​មួយ​នៅ​ជាយក្រុង​ដែល​ងាយ​ស្រួល​គ្រប់គ្រង​ពិសេស​កាត់​បន្ថយ​ហានិភ័យ​ក្នុង​ការ​បរិភោគ​ខណៈ​បច្ចុប្បន្ន​ការ​សម្លាប់​សត្វ​គ្មាន​អនាម័យ និង​ប្រភព​ច្បាស់លាស់។

ការ​ជំរុញ​នេះ​ធ្វើ​ឡើង​ក្នុង​ពិធី​តែងតាំង និង​ប្រគល់​ភារកិច្ច​ទៅ​ឲ្យ​លោក ទឹម សាវុធ អនុប្រធាន​មន្ទីរ​កសិកម្ម​រាជធានី​ភ្នំពេញ​ជា​អ្នក​គ្រប់គ្រង​ការងារ​រួម​ផ្នែក​កសិកម្ម បសុសត្វ និង​បសុបក្សី។

ក្នុង​គេហទំព័រ​អគ្គស្នងការ​នគរបាល​ជាតិ​បាន​ដក​ស្រង់​សម្ដី​អភិបាល​រាជធានី​ភ្នំពេញ​លោក ប៉ា សុជាតិវង្ស ថា​ កន្លែង​សម្លាប់​សត្វ​ក្នុង​រាជធានី​ភ្នំពេញ​នឹង​ត្រូវ​ត្រួត​ពិនិត្យ​ឲ្យ​បាន​ប្រសើរ​ឡើង​វិញ​បន្ទាប់​ពី​រកឃើញ​កន្លែង​សម្លាប់​សត្វពាហនៈ និង​បក្សី​បច្ចុប្បន្ន​មាន​ភាព​អនាធិបតេយ្យ​មិន​ដឹង​ប្រភព​ច្បាស់លាស់​ទាំង​ទីកន្លែង​ផលិតកម្ម សត្វ ជំងឺ​សត្វ​ និង​អនាម័យ​ជាដើម។

លោក​ថា៖ «...យើង​ឃើញ​ថា​ទី​សត្វ​ឃាត​សព្វ​ថ្ងៃ​មាន​ភាព​អនាធិបតេយ្យ និង​គ្មាន​សណ្តាប់​ធ្នាប់​ដោយ​ខ្លះ​សម្លាប់​សត្វ​ក្នុង​ផ្ទះ​ក៏​មាន​សាច់​សត្វពាហនៈ​ និង​បក្សី​ត្រូវ​បាន​គេ​ដឹក​ពី​គ្រប់​ច្រក​ដោយ​គ្មាន​ការ​វេច​ខ្ចប់​ត្រឹមត្រូវ​ និង​គិតគូរ​ដល់​ផ្នែក​អនាម័យ...នោះ​ទេ»។

លោក ឱម គឹមស៊ា រដ្ឋលេខាធិការ​ក្រសួង​កសិកម្ម រុក្ខាប្រមាញ់ និង​នេសាទ​ថ្លែង​ក្នុង​ពិធី​នោះ​ថា​ការ​គ្រប់គ្រង​ទីសត្តឃាត​សព្វ​ថ្ងៃ​មិន​ទាន់​បាន​ល្អ​ខណៈ​ការ​ដឹក​ជញ្ជូន​សាច់​សត្វ​ពី​កន្លែង​សម្លាប់​ទៅ​កាន់​ផ្សារ​នានា​មាន​ភាព​រញ៉េរញ៉ៃ​ដោយ​ភាគច្រើន​ដឹក​តាម​ទោចក្រ​យានយន្ត (ម៉ូតូ) ទាំង​គ្មាន​ការ​វេចខ្ចប់​ត្រឹមត្រូវ។

លោក​ថា ​ក្រសួង​ជំនាញ​នឹង​ទិញ​ម៉ាស៊ីន​ត្រួតពិនិត្យ​គុណភាព​សាច់​សត្វ​តម្លៃ​ជាង ៣០ ម៉ឺន​ដុល្លារ​សម្រាប់​បម្រើ​ដល់​ការងារ​បសុសត្វ និង​បសុបក្សី​ក្នុង​រាជធានី​ភ្នំពេញ។

អ្នក​នាំ​ពាក្យ​សាលា​រាជធានី​ភ្នំពេញ​លោក មាន ចាន់យ៉ាដា ប្រាប់​ភ្នំពេញ​ប៉ុស្តិ៍​បន្ថែម​ថា​ក្រុម​ការងារ​កំពុង​ចុះ​ស្រង់​ស្ថិតិ​ទីសត្តឃាត​ដើម្បី​ឈាន​ទៅ​ចាប់​ដៃគូ​ជាមួយ​ឯកជន។

តែ​លោក​មិន​ទាន់​កំណត់​ទីតាំង ឬ​ពេលវេលា​បាន​នៅ​ឡើយ​ទេ។ លោក​ថា៖ «...ការ​ធ្វើ​កន្លង​មក​ពុំ​មាន​សណ្តាប់ធ្នាប់​ធ្លាក់​ចូល​ក្នុង​លូ​ធ្វើ​ឱ្យ​កកស្ទះ និង​រំខាន​ដល់​អ្នក​ជុំវិញ​ដោយសារ​សំឡេង​ជ្រូក​រីឯ​ការ​ធ្វើ​អត់​មាន​ស្តង់ដារ»។

លោក ម៉ុង ឫទ្ធី ប្រធាន​ក្រុមហ៊ុន ម៉ុង ឫទ្ធី គ្រុប បាន​គាំទ្រ​ចំពោះ​គម្រោង​នេះ។

លោក​ថា៖ «ព្រោះ​ទីសត្តឃាត​រាល់​ថ្ងៃ​អត់​អនាម័យ​ទេ​ធ្វើ​ដោយ​ដៃ​អ៊ីចឹង​បើ​អាច​ដក​យក​ទៅ​ជាយក្រុង​កាន់​តែ​ឆ្ងាយ​កាន់​តែ​ល្អ​តែ​ប្រហែល​អាជ្ញាធរ​រាជធានី​គ្រប់គ្រង​កន្លែង​តែ​មួយ​មិន​បាន​ទេ​ទាល់​តែ​ឯកជន​ប៉ុន្តែ​អាជ្ញាធរ​ដែល​មាន​សមត្ថកិច្ច​អាច​គ្រប់គ្រង​ផ្នែក​បច្ចេកទេស​បាន​ដូច​ជា​ការពារ​អនាម័យ​បរិស្ថាន​ដែល​រដ្ឋ​ត្រូវ​គ្រប់គ្រង​ពីរ​នេះ»។

លោក​បន្ថែម​ថា ​ការ​ធ្វើ​បែប​នេះ​មិន​ប៉ះពាល់​ដល់​ជំនួញ​ចិញ្ចឹម​ជ្រូក​របស់​លោក​ទេ​តែ​ជា​ការ​បង្ក​លក្ខណៈ​ងាយស្រួល​ដល់​ពលរដ្ឋ​ទៅ​វិញ។

លោក​បាន​បន្ត​ថា៖ «សម្លាប់​ក្នុង​ក្រុង​ជិត​ផ្ទះ​ប្រជាជន​រឿង​នេះ​ត្រូវ​ដាក់​ឆ្ងាយ​ពី​ផ្ទះ​ប្រជាជន​ព្រោះ​អាច​ឆ្លង​រោគ​ផង​ធុំ​ក្លិន​ស្អុយ​ផង អ៊ីចឹង​ទៅ​ធ្វើ​នៅ​ជាយ​ក្រុង​រឹត​តែ​ស្រួល​ព្រោះ​អី​ដឹក​ជ្រូក​ចូល​ក្រុង​មាន​ទៅ​ល្អ​អី​បាន​រដ្ឋាភិបាល​ដោះស្រាយ​ល្អ​មែនទែន»។

អ្នកស្រី ចិន្តា ប្រកប​របរ​លក់​សាច់​ជាង ៦ ឆ្នាំ​នៅ​ផ្សារ​កាប់គោ​បាន​ថ្លែង​ថា​ជា​រឿយៗ​គាត់​ហៅ​ទូរស័ព្ទ​ទៅ​ថៅកែ​ឱ្យ​ដឹក​មក​ដល់​កន្លែង។

អ្នកស្រី​ថា៖ «ក្នុង​មួយ​ថ្ងៃ​ឱ្យ​គេ​ដឹក​មក ១០ គីឡូ​បើ​តាម​ខ្ញុំ​ដឹង​កន្លែង​កុង​ស៊ី​កាប់ជ្រូក​មាន​ច្រើន​កន្លែង​ហើយ​វា​មាន​ភាព​ងាយស្រួល​ក្នុង​ការ​កុម្ម៉ង់​ណា​មួយ​សាច់គោ​ដែល​ថៅកែ​ដាក់​ឱ្យ​គឺ​ល្អៗ​អត់​ដែល​ប៉ះ​សាច់ស្អុយ​ទេ»។

តែ​អ្នកស្រី​ថា​មិន​ទាន់​មាន​យោបល់​យ៉ាង​ម៉េច​ទេ​ចំពោះ​អាជ្ញាធរ​មាន​គម្រោង​កំណត់​ទីតាំង​សម្លាប់​សត្វ​កន្លែង​តែ​មួយ​នោះ។

ចំណែក​អ្នកស្រី ទុន សុខេង អាយុ ៦២ ឆ្នាំ​ប្រកបរបរ​លក់​សាច់គោ​នៅ​ផ្សារ​កាប់​គោ​ជាង ២០ ឆ្នាំ​ថ្លែង​ថា​គាត់​ទៅ​យក​សាច់​លក់​ដោយ​ខ្លួនឯង​នៅ​ផ្សារ​កណ្តាល​ដែល​ជា​កន្លែង​បោះដុំ​របស់​គាត់។

តែ​អ្នកស្រី​បាន​បារម្ភ​ថា​នៅ​ពេល​មាន​កន្លែង​តែ​មួយ​សម្រាប់​សម្លាប់​សត្វ​នៅ​ជាយក្រុង​អាច​បង្ក​ការ​លំបាក​ខ្លះ​ដោយសារ​ទីតាំង​ឆ្ងាយ។

អ្នកស្រី​ថា៖ «រឿង​ទៅ​យក​នៅ​ក្រៅ​ក្រុង​គឺ​ទម្រាំ​យក​មក​ដល់​គឺ​ហួស​ម៉ោង​លក់ដូរ​បាត់​ហើយ​ព្រោះ​ផ្លូវ​ស្ទះ​ហើយ​ពេល​ខ្លះ​ធ្វើ​ឱ្យ​សាច់​ខូច​ធុំ​ក្លិន​ស្អុយ​តែ​ពេល​យើង​ទៅ​យក​ក្នុង​ក្រុង​ងាយស្រួល​ខ្ញុំ​ធ្លាប់​មាន​បទពិសោធ​ម្តង​ទៅ​យក​សាច់​នៅ​អ្នក​លឿង​ទម្រាំ​យក​សាច់​មក​ដល់​ម៉ោង ១១ ព្រឹក​អ៊ីចឹង​អស់​មនុស្ស​ទិញ​បាត់​ទៅ​ហើយ»។

អ្នកស្រី​បន្ត​ថា៖ «ឥឡូវ​មាន​កុង​ស៊ីកាប់​សាច់​ច្រើន​ហើយ​គេ​មាន​ពេទ្យ​សត្វ​ពិនិត្យ​ទៀត​ផង»។

ច្បាប់​ស្តីពី​សុខភាព​សត្វ និង​ផលិតកម្ម​សត្វ​ត្រូវ​បាន​រដ្ឋសភា​អនុម័ត​កាលពី​ខែ​ធ្នូ​ឆ្នាំ ២០១៥ ដើម្បី​ឲ្យ​រាជរដ្ឋាភិបាល​បង្កើន​ប្រសិទ្ធភាព​ត្រួតពិនិត្យ​ជំងឺ​សត្វ​ការពារ​ជំងឺ​សត្វ និង​សុខភាព​សាធារណៈ។ ច្បាប់​នេះ​មាន​គោលបំណង​ការពារ​សុខភាព​មនុស្ស សុខភាព​សត្វ ការពារ​បរិស្ថាន​បង្ការ​ទប់ស្កាត់ និង​លុប​បំបាត់​ការ​ឆ្លង​រាលដាល​ជំងឺ​សត្វ និង​គ្រប់គ្រង​ផលិតកម្ម​សត្វ​ដែរ៕

អត្ថបទគួរចាប់អារម្មណ៍