ភ្នំពេញៈ អភិបាលរាជធានីភ្នំពេញលោក ឃួង ស្រេង បានចេញបម្រាមសម្រាប់ពិធីបុណ្យចូលឆ្នាំខ្មែរខាងមុខ ដោយឱ្យពលរដ្ឋចៀសវាងការធ្វើដំណើរចេញក្រៅលំនៅឋាន ឬទីសំណាក់ដែលមិនចាំបាច់ និងត្រូវចៀសវាងការធ្វើដំណើរកម្សាន្តទៅកាន់ខេត្តផ្សេង ខណៈដែលក្រសួងសុខាភិបាលអាចនឹងស្នើឱ្យមានការបន្តដាក់បម្រាមគោចរ ១ ឬ ២ សប្តាហ៍បន្ថែមទៀត ដើម្បីកាត់ផ្តាច់ចរន្តនៃការចម្លងមេរោគកូវីដ ១៩។
លោក ឃួង ស្រេង អភិបាលរាជធានីភ្នំពេញកាលពីម្សិលមិញបានចេញនូវសេចក្តីណែនាំស្តីពីការរឹតបន្តឹង ការអនុវត្តវិធានការសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយ និងវិធានការបង្ការទប់ស្កាត់ការរាតត្បាតនៃជំងឺកូវីដ១៩នៅក្នុងឱកាសឈប់សម្រាកនៃពិធីបុណ្យចូលឆ្នាំថ្មី ប្រពៃណីជាតិខែ្មរដែលនឹងប្រារព្ធឡើងចាប់ពីថ្ងៃទី ១៤ ដល់ ១៦ ខែ មេសា ឆ្នាំ ២០២១ ខាងមុខ។
លោក ឃួង ស្រេង បានហាមដាច់ខាតនូវការលេងល្បែងស៊ីសងគ្រប់ប្រភេទ និងការលេងបាញ់ទឹក ឬជះទឹក ចៀសវាងការធ្វើដំណើរចេញក្រៅលំនៅឋាន ឬទីសំណាក់ដែលមិនចាំបាច់ និងត្រូវចៀសវាងការធ្វើដំណើរកម្សាន្ត ឬធ្វើដំណើរទៅកាន់ខេត្តផ្សេងៗ។ នៅឆ្នាំនេះដែរក៏មិនមានការរៀបចំនូវសង្ក្រាន្តវត្តភ្នំ និងការរៀបចំសង្ក្រាន្តតាមបណ្តាខណ្ឌទាំង ១៤ នោះទេ។
នៅក្នុងពេលចុះពិនិត្យមើលការចាក់វ៉ាក់សាំងកូវីដ១៩នៅក្រសួងព័ត៌មានកាលពីម្សិលមិញ លោកស្រី ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ នៅទូទាំងប្រទេស និងជាអ្នកនាំពាក្យក្រសួងសុខាភិបាលថ្លែងថា ការដាក់បម្រាមគោចររបស់សាលារាជធានីភ្នំពេញ និងបណ្តាខេត្តមួយចំនួនទៀត គឺជាវិធានការមួយដែលចូលរួមចំណែកក្នុងការកាត់ផ្តាច់នូវខ្សែចម្លងវីរុសកូវីដ ១៩ ពីបុគ្គលម្នាក់ទៅបុគ្គលម្នាក់ ដែលនេះជាចំណុចសំខាន់ណាស់។
លោកស្រីមានប្រសាសន៍ថា៖ «យើងចាំបាច់ណាស់ ត្រូវតែរិះរកនូវគ្រប់វិធីទាំងអស់ធ្វើយ៉ាងណាដើម្បីកាត់ផ្តាច់ឱ្យបាននូវការចម្លងពីបុគ្គលមួយទៅបុគ្គលមួយ ហើយខ្ញុំគិតថា នេះជាវិធានការមួយដ៏សមស្រប ហើយយើងសង្កេតឃើញថាមានប្រសិទ្ធភាព ប៉ុន្តែយើងនឹងតាមដានមើលនៅក្នុងរយៈពេល ២ សប្តាហ៍ក្រោយ»។
អ្នកនាំពាក្យរូបនេះបន្ថែមថា៖ «ប្រសិនបើករណីនៃការឆ្លងវីរុសកូវីដ ១៩ នៅតែរកឃើញខ្ពស់ អ៊ីចឹង!ខ្ញុំនឹងគោរពស្នើសុំដ៏ទទូចនូវការបន្តអនុវត្តបម្រាមគោចរនេះប្រហែលនឹងត្រូវបន្តក្នុងរយៈពេល ១ ឬ ២ សប្តាហ៍ទៀត ដើម្បីកាត់ផ្តាច់ការចម្លងឱ្យបាន»។
ទោះយ៉ាងណាលោកស្រី វណ្ណឌីន នៅមិនទាន់អាចវាយតម្លៃបានទេនៅពេលនេះ ដោយសារការអនុវត្តបម្រាមគោចរ ទើបតែធ្វើបានរយៈពេលខ្លីប៉ុណ្ណោះដែលលោកស្រីត្រូវរង់ចាំមើលនៅ សប្តាហ៍ក្រោយថាតើការឆ្លងរីករាលដាលនេះអាចកាត់ផ្តាច់បាន ឬវាស្ថិតនៅក្នុងដំណាក់កាលណាមួយ។
ជាមួយគ្នានេះដែរ លោកស្រីបានលើកឡើងដែរថា ប្រទេសកម្ពុជាមិនទាន់ដល់ពេលបិទប្រទេសនៅឡើយទេ ដោយសារស្ថានភាពនៃការកើតឡើងជំងឺកូវីដ គឺមានទៅតាមតំបន់ និងកន្លែងផ្សេងៗគ្នា ដែលធ្វើឱ្យការអនុវត្តក៏ត្រូវធ្វើទៅតាមទីកន្លែង និងតំបន់នោះដែរ។ «យើងមិនអាចឈានដល់ការបិទនៅទូទាំងប្រទេសបានទេ»។
ចំណែកអភិបាលខេត្តកំពង់ធំលោក សុខ លូ ក៏បានចេញសេចក្តីណែនាំនាឱកាសបុណ្យចូលឆ្នាំខ្មែរផងដែរដែលជាវិធានការរដ្ឋបាលជាបណ្តោះអាសន្នរយៈពេល ៩ ថ្ងៃគឺចាប់ពីថ្ងៃទី ១០ ដល់ថ្ងៃទី ១៨ ខែ មេសា ឆ្នាំ ២០២១ ដើម្បីទប់ស្កាត់ការរីករាលដាលជំងឺកូវីដ ១៩។
លោកលើកឡើងថា៖ «ក្នុងគោលបំណងធានាការពារអាយុជីវិតរបស់ប្រជាពលរដ្ឋ សុខភាពសាធារណៈ និងសណ្តាប់ធ្នាប់សាធារណៈព្រមទាំងកាត់បន្ថយឱ្យបានជាអតិបរមានូវការឆ្លងនៃវីរុសកូវីដ ១៩ រដ្ឋបាលខេត្តកំពង់ធំស្នើឱ្យមានការផ្អាកជាបណ្តោះអាសន្ននូវសកម្មភាព អាជីវកម្មចំពោះអាហារដ្ឋានភោជនីយដ្ឋានហាងកាហ្វេ ហាងភេសជ្ជៈ និងភោជនីយដ្ឋាននៅតាមសណ្ឋាគារ ប៉ុន្តែអាចវេចខ្ចប់បាន»។
លោកថា មិនឱ្យមានការកម្សាន្ត ឬការប្រមូលផ្តុំណាមួយឡើយនៅរមណីយដ្ឋានធម្មជាតិប្រវត្តិសាស្ត្រ និងកែច្នៃឡើយ ហើយគណៈបញ្ជាការឯកភាពរដ្ឋបាលក្រុងស្រុកត្រូវរឹតបន្តឹងការធ្វើដំណើរ ឬការដឹកជញ្ជូនមនុស្សដែលមានចំនួនច្រើន។
លោក សុខ លូ បន្តថា៖ «ចំពោះប្រជាពលរដ្ឋត្រឡប់មកលេងស្រុកកំណើត ដែលមកពីតំបន់មានការរីករាលដាលខ្លាំងនៃជំងឺកូវីដ ១៩ ដែលកំណត់ដោយក្រសួងសុខាភិបាលត្រូវធ្វើចត្តាឡីស័ករយៈពេល ១៤ ថ្ងៃនៅតាមលំនៅឋានរៀងៗខ្លួន ឬតាមមណ្ឌលចត្តាឡីស័កក្រុងស្រុក ឬខេត្តតាមការជាក់ស្តែង»។
យោងតាមរបាយការណ៍ក្រសួងសុខាភិបាលនៅថ្ងៃម្សិលមិញ ក្រសួងរកឃើញអ្នកឆ្លងកូវីដចំនួន ៦៣ នាក់បន្ថែមទៀត ដែលសុទ្ធតែជាអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ ខណៈមានអ្នកជាសះស្បើយរហូតដល់ ៩៤ នាក់។ ករណីឆ្លងថ្មីនេះមាននៅភ្នំពេញ ៣០ នាក់ ខេត្តស្វាយរៀង ២២ នាក់ ខេត្តព្រះសីហនុ ៦ នាក់ និង ៤ ខេត្តផ្សេងទៀតមានអ្នកឆ្លង ១ ករណីៗដូចគ្នា គឺខេត្តកណ្ដាល ខេត្តព្រៃវែង ខេត្តកោះកុង និងខេត្តកំពង់ឆ្នាំង។
គិតត្រឹមព្រឹកថ្ងៃទី ៥ ខែមេសា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបចំនួន ២ ៧៥២ នាក់ ក្នុងនោះអ្នកឆ្លងក្នុងព្រឹត្តិការណ៍ ២០ កុម្ភៈ មានចំនួន ២២២២ នាក់ អ្នកជាសះស្បើយទូទាំងប្រទេសចំនួន ១ ៧៤៧ នាក់អ្នកកំពុងព្យាបាលចំនួន ៩៧៩ នាក់ និងអ្នកស្លាប់ចំនួន ២១ នាក់៕
វីដេអូ៖