.jpg)
លោក ឃួង ស្រេង អភិបាលសាលារាជធានីភ្នំពេញ។ រូបថត រដ្ឋបាលរាជធានីភ្នំពេញ
ភ្នំពេញ៖ អភិបាលសាលារាជធានីភ្នំពេញ លោក ឃួង ស្រេង បានសម្ដែងនូវក្ដ៏សង្ឃឹមប្រកបដោយសុទិដ្ឋិនិយមថា ការបិទខ្ទប់ និងកាត់ផ្តាច់ទំនាក់ទំនងរវាងមនុស្សច្រើនក្នុងរយៈពេល ១៤ ថ្ងៃ នឹងអាចទទួលបានជោគជ័យដោយធ្វើការកាត់ផ្តាច់នូវការរីករាលដាលវីរុសកូវីដ ១៩។
ថ្លែងក្នុងសន្និសីទកាសែតនៅយប់ថ្ងៃព្រហស្បតិ៍ ទី ១៥ ខែ មេសា ឆ្នាំ ២០២ ១នៅសាលារាជធានីភ្នំពេញ លោកបានលើកឡើងថា៖ «រាជធានីភ្នំពេញ និងក្រុងតាខ្មៅ ខេត្តកណ្តាល បានចូលដល់បន្ទាត់ក្រហម ទើបរាជរដ្ឋាភិបាលសម្រេចបិទខ្ទប់រយៈពេល ១៤ ថ្ងៃ។ ការងារនេះជាការងារអាក្រក់បំផុត ប៉ុន្តែយើងសុខចិត្តឈឺចាប់តិច ប្រសើរជាងឈឺចាប់យូរអង្វែង»។
លោកបានបន្តថា ក្នុងពេលបិទខ្ទប់នេះ ប្រជាពលរដ្ឋអាចទៅទិញអាហារ ឬអីវ៉ាន់ ក្នុង ១ សប្តាហ៍ ៣ ដង ហើយជាមនុស្សដដែលតែម្នាក់ ដើម្បីការពារការឆ្លងវីរុសកូវីដ ១៩។ ចំពោះប្រជាពលរដ្ឋដែលមានជីវភាពក្រីក្រ ខ្វះខាត អាជ្ញាធរក៏មានរៀបចំនូវសេវាសម្រាប់ឱ្យពួកគាត់ទាក់ទងមកអាជ្ញាធរតាមផេក ឬលេខទំនាក់ទំនង (hotline) របស់សាលារាជធានីភ្នំពេញ ដើម្បីពួកគាត់អាចរាយការណ៍ ដើម្បីមានការដឹកស្បៀងជូនពួកគាត់បាន ដោយរាជរដ្ឋាភិបាលមិនអាចឱ្យពលរដ្ឋណាម្នាក់ស្លាប់ដោយអត់បាយនោះទេ។
ទាក់ទងនឹងទំនិញឡើងថ្លៃ លោក ឃួង ស្រេង នឹងចាត់វិធានការរដ្ឋបាលប្រសិនបើអាជ្ញាធរមានសមត្ថកិច្ចស្រាវជ្រាវរកឃើញនូវការឡើងតម្លៃទំនិញណាមួយ ដែលគ្មានហេតុផលដោយលោកនឹងធ្វើការណែនាំឱ្យបញ្ចុះតម្លៃទំនិញតាមប្រក្រតីភាព។
លោកមានប្រសាសន៍ថា៖ «ខ្ញុំនឹងធ្វើការស្រាវជ្រាវថា តើការឡើងថ្លៃទំនិញនេះ ដោយសារមូលហេតុអី បើរាជរដ្ឋាភិបាលបានចេញសេចក្តីសម្រេចមិនធ្វើការបិទការលក់ទំនិញ ពិសេសគ្រឿងឧបភោគបរិភោគនេះ»។
លោក ឃួង ស្រេង បានបន្តទៀតថា សាលាក្រុងបានរៀបចំការងារនេះរួចហើយ ហើយខាងក្រសួងពាណិជ្ជកម្មនឹងចុះពិនិត្យមើលលើការងារនេះនៅថ្ងៃស្អែកផងដែរ ដើម្បីប្រជាពលរដ្ឋ ដោយមិនឱ្យឈ្មួញទុច្ចរិតណាមួយ ធ្វើទុក្ខបុកម្នេញលើពលរដ្ឋបានទេ៕
