រាជធានីភ្នំពេញ៖ អភិបាលសាលារាជធានីភ្នំពេញលោក ឃួង ស្រេង បានប្រកាសនៅយប់ថ្ងៃសុក្រទី ០៩ ខែមេសា ដោយសម្រេចធ្វើការបិទខ្ទប់ (Lockdown) ផ្នែកខ្លះនៃខណ្ឌចំនួន ៣ គឺខណ្ឌមានជ័យ សែនសុខ និងខណ្ឌពោធិ៍សែនជ័យ ចាប់ពីម៉ោងសូន្យថ្ងៃទី ១០ ដល់ថ្ងៃទី ២៣ ខែមេសា ឆ្នាំ ២០២១។
លោក ឃួង ស្រេង បានថ្លែងក្នុងសន្និសីទកាសែតនៅសាលារាជធានីភ្នំពេញនៅយប់នេះថា ដោយមានការចាំបាច់ចំពោះមុខ រដ្ឋបាលរាជធានីភ្នំពេញបានសម្រេចចិត្តចេញនូវសេចក្តីសម្រេចមួយ ដើម្បីធ្វើការបិទខ្ទប់នូវតំបន់មួយដែលមានការរីករាលដាលឆ្លងនូវជំងឺកូវីដ១៩។
លោកបានមានប្រសាសន៍ថា៖ «នេះជាកិច្ចការមួយដែលរដ្ឋបាលសាលារាជធានីភ្នំពេញសម្រេចយកជម្រើសដ៏អាក្រក់បំផុតមួយនេះ ព្រោះយើងដឹងថាការបិទខ្ទប់នេះពិតជាធ្វើឱ្យប៉ះពាល់ដល់សតិអារម្មណ៍ ការរស់នៅរបស់ប្រជាពលរដ្ឋ»។
លោក ឃួង ស្រេង បានបន្ថែមថា រដ្ឋបាលរាជធានីភ្នំពេញបានធ្វើការសម្រេចមួយដែលនឹងអនុវត្តន៍នៅម៉ោងសូន្យយប់មិញ ដើម្បីបិទខ្ទប់នូវប្រជាពលរដ្ឋមួយចំនួនគឺក្នុងខណ្ឌមានជ័យមាន ២ សង្កាត់គឺសង្កាត់ស្ទឹងមានជ័យ១ និងមានជ័យ២។
ចំណែកខណ្ឌសែនសុខ មានភូមិទ្រង់មាន់១នៃសង្កាត់អូរបែកក្អមដែលមានប្រមាណជាង ១ ម៉ឺននាក់ ឯខណ្ឌពោធិ៍សែនជ័យ ត្រូវបិទ ០៦ ភូមិផងដែរគឺ ភូមិត្រពាំងថ្លឹង២ និងភូមិទួលពង្រ នៃសង្កាត់ចោមចៅ១, ភូមិចំការឪឡឹក១ ភូមិប៉ប្រកខាងត្បូង ភូមិប៉ប្រកខាងជើង និងភូមិត្រពាំងល្វា១ នៃសង្កាត់កាកាបទី១ និងភូមិចំការឪឡឹក១ នៃសង្កាត់កាកាបទី២ ដោយសារកម្មករបានមកជួលផ្ទះនៅតំបន់នោះ។
ការសម្រេចនេះបន្ទាប់ពីមានរោងចក្រ ឌីនហាន ដែលមានកម្មករ-កម្មការិនីប្រហែលជាជាង ២៦០០ នាក់ធ្វើការនៅក្នុងរោងចក្រ ដោយគិតត្រឹមយប់មិញ មានអ្នកឆ្លងរកឃើញរហូត ៦៣១ នាក់ ដែលជាតួលេខមួយខ្ពស់បំផុតដែលធ្វើឱ្យរដ្ឋបាលសាលារាជធានីភ្នំពេញមានការព្រួយបារម្ភក្នុងការឆ្លងរីករាលដាលជំងឺនេះ។
លោក ឃួង ស្រេង បានបញ្ជាក់ថា លោកសង្ឃឹមថា កម្មករទាំងអស់ក្នុងរោងចក្រ ឌីនហាន នឹងធ្វើតេស្តគ្រប់គ្នា ហើយស្អែកនេះនឹងចេញលទ្ធផលតេស្តរបស់ពួកគេបន្ថែមទៀត។
ជាមួយគ្នានេះ លោក ឃួង ស្រេង ក៏បានឱ្យដឹងដែរថា សមាជិកគ្រួសារមួយនាក់អាចចេញមកក្រៅដើម្បីទិញថ្នាំ ឬម្ហូបអាហារ ប៉ុន្តែមិនអាចឱ្យចេញទៅជួបអ្នកណាផ្សេងបានទេ ដោយសារអាជ្ញាធរនឹងធ្វើការតាមដានបុគ្គលនោះពេលចេញក្រៅតំបន់ដែលបិទខ្ទប់នេះ៕